قازاقستاندا ۇيالى تەلەفونداردى سمس ارقىلى ونلاين تىركەۋگە مۇمكىندىك بەرىلەدى, دەدى اقپارات جانە كوممۋنيكاتسيالار ءمينيسترى داۋرەن اباەۆ قوعامدىق كەڭەس وتىرىسىندا.
«وتكەن جىلى اۋىلدىق ەلدى مەكەندەردى كەڭ جولاقتى ينتەرنەتپەن قامتۋ جوباسى بويىنشا تىڭعىلىقتى جۇمىستار جۇرگىزىلدى. جوبانىڭ ماقساتى - 2021 جىلعا دەيىن 1 249 ەلدى مەكەندە تۇرىپ جاتقان 2 ميلليوننان استام تۇرعىندى جىلدام ينتەرنەتپەن قامتاماسىز ەتۋ. اعىمداعى جىلى بارلىق كونكۋرستىق پروتسەدۋرالار جۇرگىزىلگەننەن كەيىن 55 اۋىلدىق ەلدى مەكەندى قامتيمىز دەپ ۇمىتتەنەمىز», - دەدى مينيستر.
سونىمەن قاتار داۋرەن اباەۆ ۇيالى بايلانىستىڭ ابونەنتتىك قۇرىلعىلارىن تىركەۋگە قاتىستى دا پىكىر ءبىلدىردى. ونىڭ ايتۋىنشا, وتكەن جىلى بۇل باعىتتا دايىندىق جۇمىستارى جۇرگىزىلىپ, ەرەجەسى بەكىتىلگەن. حالىق اراسىندا دۇربەلەڭ بولماۋى ءۇشىن مينيسترلىك تىركەۋ پروتسەسىن بارىنشا جەڭىلدەتىپ وتىر. ءتىپتى, ازاماتتار ونلاين رەجىمدە جانە سمس ارقىلى دا ۇيالى تەلەفونىن تىركەۋگە مۇمكىندىك الادى.