قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆا حالىقارالىق III « ۇلى دالا» گۋمانيتارلىق عىلىمدار فورۋمىنا قاتىستى. بۇل تۋرالى akorda.kz حابارلادى.
باسقوسۋعا, سونداي-اق تۇركيا پرەزيدەنتىنىڭ كەڭەسشىسى ا.اتتار, قىرعىزستان پرەزيدەنتىنىڭ كەڭەسشىسى س.راەۆ, مونعوليا عىلىم اكادەمياسىنىڭ پرەزيدەنتى ر.دۇگەرين, حالىقارالىق ۇيىمدار باسشىلارى, ديپلوماتيالىق كورپۋس, مەملەكەتتىك ورگاندار وكىلدەرى, قوعام قايراتكەرلەرى جانە كورنەكتى عالىمدار قاتىستى.
گۇلشارا ابدىقالىقوۆا قۇتتىقتاۋ سوزىندە ەلباسىنىڭ:ء «بىزدىڭ قاسيەتتى جەرىمىزدى ىقىلىم زامانداردان ۇلى دالا دەپ, ال بابالارىمىزدى ۇلى دالانىڭ ۇرپاقتارى دەپ اتاعان. ءبىز – سولاردىڭ جالعاسىمىز, ۇلى دالانىڭ مۇراگەرلەرىمىز», – دەگەن سوزىنە توقتالدى.
– « ۇلى دالا» – بۇكىل تۇركى الەمىنىڭ باسىن بىرىكتىرەتىن مازمۇنى تەرەڭ, اياسى كەڭ كيەلى ۇعىم. وسى قاسيەتتى اتاۋ ەۋرازيانىڭ كەڭ-بايتاق كەڭىستىگىن مەكەندەگەن كۇللى حالىقتاردىڭ تاعدىرىن قامتيدى, – دەدى مەملەكەتتىك حاتشى.
قازىر قازاقستاندا «رۋحاني جاڭعىرۋ» باعدارلاماسى جۇزەگە اسىرىلىپ جاتىر. سونىڭ اياسىندا قازاق ءتىلى ءالىپبيىن كيريلليتسادان لاتىن گرافيكاسىنا كوشىرۋ جۇمىسى باستالدى. «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسىن ىسكە اسىرۋ ماقساتىمەن العاشقى 18 ەڭبەك قازاق تىلىنە اۋدارىلدى. «كيەلى نىسانداردىڭ 3d تۋرىمەن قامتىلعان ۆيرتۋالدى كارتاسى» ازىرلەندى.
2018 جىل – تۇركى دۇنيەسى كۇنتىزبەسىندەگى ەرەكشە بەلەس. بيىل تاۋەلسىز قازاقستاننىڭ سيمۆولى – استانانىڭ 20 جىلدىعى مەرەكەلەنەدى. سونداي-اق مۇسىلمان الەمىندەگى تۇڭعىش زايىرلى مەملەكەت – ازەربايجان دەموكراتيالىق رەسپۋبليكاسى قۇرىلۋىنىڭ 100 جىلدىعى, ءتۇبى ءبىر تۇركى حالقىنىڭ تۇعىرلى تۇلعالارى – قازاقتىڭ اقيىق اقىنى ماعجان جۇماباەۆتىڭ – 125, قىرعىزدىڭ زاڭعار جازۋشىسى شىڭعىس ايتماتوۆتىڭ 90 جىلدىعى تويلانۋدا.
مەملەكەتتىك حاتشى حالىقارالىق III « ۇلى دالا» گۋمانيتارلىق عىلىمدار فورۋمىنىڭ ادامزات دامۋىنداعى تۇركى الەمىنىڭ ورنى مەن مادەني-رۋحاني قۇندىلىقتارى, جاھاندىق جانە ايماقتىق وزەكتى ماسەلەلەر تالقىلاناتىن ينتەللەكتۋالدى سۇحبات الاڭى مارتەبەسىنە يە بولىپ ۇلگەرگەنىن ايتتى.
فورۋم 6 سەكتسيا بويىنشا وتەدى. وعان 250-دەن استام قازاقستاندىق عالىمدار مەن ولاردىڭ ازەربايجان, گەرمانيا, قىرعىزستان, قىتاي, موڭعوليا, وزبەكستان, رەسەي, تاجىكستان, تۇركيا جانە باسقا دا ەلدەردەن كەلگەن ارىپتەستەرى قاتىسادى. سونداي-اق, حالىقارالىق تۇركى اكادەمياسى شىعارعان كىتاپتاردىڭ كورمەسى بولادى.
فورۋم اياسىندا مەملەكەتتىك حاتشى گۇلشارا ابدىقالىقوۆا جيىنعا قاتىسۋشى ەلدەر دەلەگاتسيالارىنىڭ باسشىلارىمەن دە كەزدەستى.