«پاميات» قوعامدىق قورىنىڭ توراعاسى, سولتۇستىك قازاقستان وبلىسىنىڭ قۇرمەتتى ازاماتى بولات ساعىندىقوۆتىڭ باستاماسىمەن بوستاندىق اۋىلىندا قۋعىن-سۇرگىن قۇرباندارىنا ارناپ ەسكەرتكىش-تاقتا ورناتىلدى.
اتالمىش شاراعا بوزداقتاردىڭ تۋعان-تۋىسقاندارى, زيالى قاۋىم وكىلدەرى مەن جەرگىلىكتى تۇرعىندار قاتىستى. سالتاناتتى راسىمدە سويلەگەن سوزىندە بولات ماعاز ۇلى ەسكەرتكىش-تاقتاعا مۇحامەديا اشەتوۆ, ساپار ءلايمىشوۆ, عابدۋسالام بەككەنين, حامزات يزراپيلوۆ, قاليمولدا قاراباتىروۆ, حاميت ءمۇرسىلىموۆ, ابىكەي ماحامبەتوۆ, سۇلتان تىلەگەنوۆ, نۇعىمان وراڭكين, ماعاز ساعىندىقوۆ, ەميامان راحمەتوۆ سىندى وسى اۋىلدا تۋعان جانە ەڭبەك ەتكەن 11 ازاماتتىڭ ەسىمدەرى جازىلعانىن جەتكىزدى.
«بۇل ەسكەرتكىش-تاقتا قۋعىن-سۇرگىن قۇرباندارىنا ەمەس, ولاردىڭ ەسىمدەرىن كەيىنگى وسكەلەڭ ۇرپاقتىڭ ءبىلىپ ءوسۋى, قادىر تۇتۋى ءۇشىن قاجەت. ولاردىڭ ەڭبەك جولى مەن نە ءۇشىن وپات بولعانىن تانىتۋ – ءبىز ءۇشىن پارىز. تەك ءبىزدىڭ اۋدان بويىنشا عانا 250-دەن استام ادام زۇلمات زاماننىڭ قۇربانى بولدى. ء«ولى ريزا بولماي, ءتىرى بايىمايدى»», دەدى ءوز سوزىندە مامليۋت اۋدانىنىڭ اكىمى جاستىلەك سىزدىقوۆ.
پەداگوگيكالىق قىزمەتتىڭ ارداگەرى, وسى اۋىلدىڭ تۋماسى قاجىمۇرات ناسيەۆ بوستاندىقپەن بىرگە كورشى بەكسەيىت جانە جويىلىپ كەتكەن ۇشكول اۋىلدارىنان قۇربان بولعان ازاماتتاردى قامتيتىن «قۋعىن-سۇرگىننىڭ ازالى تاريحى» اتتى كىتاپشانى جەرگىلىكتى مەكتەپ پەن اۋىلدىق كىتاپحاناعا, بوزداقتاردىڭ ۇرپاقتارىنا تارتۋ ەتتى.
اۋىلداستارى بولات اعامىزدىڭ تۋعان جەرىندە دە تاماشا ءبىر يگىلىكتى شاراعا باستاماشى بولىپ, ۇلگى-ونەگە بولارلىق ءىستى جۇزەگە اسىرعانىنا ريزاشىلىقتارىن ءبىلدىردى.
ءومىر ەسقالي, «ەگەمەن قازاقستان»