كەشە «رۋحاني جاڭعىرۋ» باعدارلاماسى جانە استانانىڭ 20 جىلدىعى اياسىندا بەيبىتشىلىك جانە كەلىسىم سارايىندا ەلوردانىڭ ەڭ ۇزدىك دارىگەرلەرىنە تۇڭعىش رەت تاعايىندالعان «ALTYN SHIPAGER» سىيلىعى سالتاناتتى تۇردە تابىس ەتىلدى.
بيىل 20 جىلدىق مەرەيتويى اتالىپ وتەتىن ەلىمىزدىڭ باس قالاسىندا بۇگىندە 20 مىڭعا جۋىق اق حالاتتى ابزال جاندار ەڭبەك ەتەدى. وسىناۋ 20 جىلدا استانا تۇرعىندارىنىڭ سانى 3,7 ەسەگە ۇلعايىپ, شاھار جىل سايىن 40-50 مىڭ اداممەن تولىعىپ وتىر. 20 جىل ىشىندە ەلوردادا 25-تەن اسا مەديتسينالىق نىسان سالىنىپ, 8 ميلليونعا جۋىق وتا جاسالدى. مەديتسينا قىزمەتكەرلەرى كۇنى قارساڭىندا ۇيىمداستىرىلعان ماڭىزدى شارانىڭ اشىلۋ سالتاناتىندا سويلەگەن سوزىندە وسىنداي دەرەكتەردى العا تارتقان استانا قالاسىنىڭ اكىمى اسەت يسەكەشەۆ دەنساۋلىق ساقتاۋ سالاسىنا اركەز ايرىقشا كوڭىل بولىنەتىنىن, جىل سايىن 90 ميلليارد تەڭگەگە جۋىق قارجى قاراستىرىلاتىنىن, بىلتىر 4 مىڭعا تارتا دارىگەر بىلىكتىلىگىن ارتتىرعانىن اتاپ ءوتتى. «دارىگەرلەردىڭ جۇمىسىن جاقسى بىلەمىن. ەرەكشە قادىرلەيمىن. ويتكەنى, ءوزىم پەدياتر-دارىگەردىڭ بالاسىمىن. استانا ۇلكەن شاھار بولعاندىقتان مۇنداعى مەديتسينا قىزمەتكەرلەرىنىڭ جۇمىسى وڭاي ەمەس. كەلىمدى-كەتىمدى جۇرت كوپ. قالا ەمحانالارىنا كۇن سايىن 8 مىڭنان استام تۇرعىن كەلسە, 400-گە جۋىق ناۋقاس اۋرۋحاناعا جاتقىزىلىپ, 120-عا جۋىق اۋىر وتا جاسالادى. جەدەل جاردەم قىزمەتىنە تاۋلىگىنە – 1500, جىلىنا – 500 مىڭ شاقىرتۋ تۇسەدى ەكەن. سوندىقتان سىزدەردىڭ ەرەن ەڭبەكتەرىڭىزدى ەسكەرە وتىرىپ, وسى «ALTYN SHIPAGER» سىيلىعىن تاعايىنداۋدى ءجون كوردىك. بارلىقتارىڭىزدى ءتول مەرەكەلەرىڭىزبەن شىن جۇرەكتەن قۇتتىقتايمىن!» دەپ ىستىق لەبىزىن ءبىلدىردى.
سونداي-اق قالا اكىمى ءا.يسەكەشەۆ استانالىق اق جەلەڭدى ابزال جانداردىڭ ىشىندە ەرەكشە كوزگە ءتۇسىپ, حالىقتىڭ ءىلتيپاتىنا يە بولعان 6 دارىگەرگە باسپانا كىلتىن سالتاناتتى تۇردە تابىس ەتتى. ال بيىل استانا دارىگەرلەرىنە تۇڭعىش تاعايىندالعان «ALTYN SHIPAGER» سىيلىعى 12 اتالىم بويىنشا يەلەرىن تاپتى. س.اقشولاقوۆ, م.الشىنباەۆ, ا.بايگەنجين, ن.باتپەنوۆ, ۆ.بەنبەرين, م.قۇلجانوۆ, ق.وماروۆ, يۋ.پيا, ن.پەتۋحوۆا, م.شايداروۆ سەكىلدى ەلىمىزگە عانا ەمەس, حالىقارالىق دەڭگەيدە تانىمال بىلىكتى دارىگەرلەر «مەديتسيناعا قوسقان ۇلەسى ءۇشىن», استانا قالالىق №1 ەمحاناسىنىڭ وتولارينگولوگيا ورتالىعىنىڭ جەتەكشىسى گۇلميرا مۇحاماديەۆا «ۇزدىك دارىگەر», قوعامدىق دەنساۋلىق ساقتاۋ سالاسىنىڭ بىلىكتى مامانى سارحات بەيسەنوۆ «ۇزدىك ەپيدەميولوگ», استانا مەديتسينا ۋنيۆەرسيتەتىنىڭ وقىتۋشىسى بالابي ايعوجين «ماماندىعىنا ادالدىق», №2 قالالىق ەمحانانىڭ باس دارىگەرى يۆان لي «دەنساۋلىق ساقتاۋ ءىسىنىڭ ءتيىمدى مەنەدجەرى», №1 پەريناتالدى ورتالىقتىڭ ءبولىم مەڭگەرۋشىسى اسىلجان ەرەكەشوۆ «بىرەگەي وتا جاساعانى ءۇشىن», ونكولوگيا ورتالىعىنىڭ ءبولىم مەڭگەرۋشىسى دارحان احمەدين «دياگنوستيكا مەن ەمدەۋدىڭ جاڭا ءادىسىن ەنگىزگەنى ءۇشىن», «حابار 24» تەلەارناسىنىڭ باس ديرەكتورى ولگا گورەليك «اقپاراتتىق سەرىكتەس» اتالىمدارىمەن ماراپاتتالدى. «حابار» تەلەارناسىنىڭ ارنايى سىيلىعى قالالىق العاشقى مەديكو-سانيتارلىق قىزمەت كورسەتۋ قىزمەتىنىڭ مامانى التىنشاش تابىلديناعا بەرىلدى. №1 قالالىق ەمحانا «تسيفرلاندىرۋ كوشباسشىسى», «سالاماتتى استانا» مەديتسينالىق ورتالىعى «مەديتسينالىق جەكە قىزمەت كورسەتۋشى ۇزدىگى» اتالىمدارىن يەلەنىپ, ءار اتالىم جەڭىمپازدارىنا 1 ميلليون تەڭگەنىڭ سەرتيفيكاتتارى تابىس ەتىلدى.
ماراپات الىپ, مەرەيلەرى ۇستەم بولعان دارىگەرلەردىڭ بارلىعى دا ءوز ءىسىنىڭ كانىگى شەبەرلەرى دەۋگە بولادى. «ۇزدىك دارىگەر» اتالىمىن يەلەنگەن گۇلميرا مۇحاماديەۆا №1 قالالىق ەمحانادا 25 جىل بويى تابان اۋدارماي ەڭبەك ەتىپ كەلەدى. ال «بىرەگەي وتا جاساعانى ءۇشىن» اتالىمىنىڭ جەڭىمپازى, №1 پەريناتالدى ورتالىقتىڭ ءبولىم مەڭگەرۋشىسى اسىلجان ەرەكەشوۆ ءۇش ايعا دەيىنگى, ياعني 550 گرامنان جوعارى سالماقتاعى نارەستەلەرگە وتا جاسايدى. ول وسى ۋاقىتقا دەيىن 2 مىڭعا جۋىق وتا جاساعانىن ايتادى. اكەسى, اناسى, جۇبايى دا دارىگەر, سونىمەن بىرگە بالاسى دا بۇگىندە دارىگەرلىكتى وقىپ جاتىر ەكەن. «وسىدان 10 جىل بۇرىن استانادا انا مەن بالا عىلىمي ورتالىعى اشىلدى. سول جەردە قازاقستان بويىنشا ءبىرىنشى رەت نارەستەلەر حيرۋرگياسى بولىمشەسى جۇمىس ىستەي باستادى. وسى ون جىلدىڭ ىشىندە قانشاما نارەستەنىڭ جانىن ساقتاپ قالدىق. ءبىز تۋا بىتكەن اقاۋلارى بار سابيلەرگە جىلىنا 300-گە جۋىق وپەراتسيا جاسايمىز. 270 گرامدىق شاقالاققا جاساعان وپەراتسيا ەشقاشان ەسىمنەن كەتپەيدى. وعان ءبىر مەزەتتە ءبىر ەمەس, ءۇش وتا جاسادىق. بالامىز امان قالدى. قازىر التىعا كەلدى. قۇدايعا شۇكىر. بۇل سىيلىق تەك ماعان ەمەس, مەنىڭ قاسىمداعى دارىگەرلەرگە, ارىپتەستەرىمە كورسەتىلگەن قۇرمەت, جۇمىستارىنا بەرىلگەن ۇلكەن باعا دەپ ەسەپتەيمىن», دەيدى بالا جاناشىرى.
العاش رەت قىزىل كىلەممەن ءجۇرىپ وتكەن ەلوردالىق دارىگەرلەردىڭ ەلىمىزدەگى مەديتسينانىڭ دامۋى مەن جاڭارۋىنا قوسقان ۇلەسى زور ەكەنى بەلگىلى. استانانىڭ 20 جىلدىق مەرەيتويى اياسىندا العان ماراپاتتارى اق جەلەڭدى ابزال جاندارعا ايرىقشا كوڭىل-كۇي سىيلادى.
ازامات قاسىم,
«ەگەمەن قازاقستان»
استانا