كەشە ءمادريدتىڭ «رەالى» كوماندانى كەلەسى ماۋسىمدا يسپانيا ۇلتتىق قۇراماسىنىڭ قازىرگى باپكەرى حۋلەن لوپەتەگي جاتتىقتىراتىنىن رەسمي تۇردە جاريالادى. الەم چەمپيوناتىنىڭ باستالۋىنا ەكى كۇن قالعاندا مۇنداي جاڭالىقتى حابارلاۋىنا باستى سەبەپ – ۇلتتىق قۇراما ويىنشىلارىنىڭ بۇل قۇپيانى ءوزارا ساقتاي الماۋىندا بولعان كورىنەدى.
Radio Marca-نىڭ حابارلاۋىنشا لوپەتەگيدىڭ مادريدكە باراتىنىن العاشىندا «رەالدىڭ» التى فۋتبولشىسى عانا ءبىلىپتى. الايدا كوپ ۇزاماي بۇل مالىمەت وزگە كلۋبتىڭ ءبىر وكىلىنە دە جەتكەن كورىنەدى. ءتۇرلى باق ول ويىنشىنىڭ «رەال» تۋرالى كەراعار پىكىر بىلدىرەتىن جەرار پيكە ەكەنىن جاريالاپ جاتىر. لوپەتەگي سىبىستىڭ تاراپ كەتۋىنەن ساقتانىپ, «رەال» باسشىلىعىنا رەسمي تۇردە جاريالاۋىن ءوتىنىپتى.
ءبىر ايتا كەتەرلىگى لوپەتەگي 22 مامىر كۇنى يسپانيا قۇراماسىمەن 2020 جىلعا دەيىن كەلىسىمشارتىن ۇزارتىپ قويعان. ارادا ءبىر اپتا وتكەننەن سوڭ «رەالدىڭ» بۇرىنعى جەتەكشىسى زينەدين زيدان ماديردتەن كەتەتىنىن مالىمدەگەننەن كەيىن كوماندا باسشىلىعى جاڭا كوۋچتى ىزدەۋگە كىرىستى. تاڭداۋ يسپانيالىق مامانعان تۇسكەنى كوپشىلىكتى تاڭ قالدىرعانى جاسىرىن ەمەس. Marca باسىلىمى لوپەتەگي مەن قۇراما اراسىنداعى كەلىسىمشارتتى ۋاقىتىنان بۇرىن ءۇزۋ ءۇشىن كورولدىك يسپانيا فۋتبول فەدەراتسياسىنا ەكى ملن ەۋرو تولەيتىنىن حابارلادى.
شىنى كەرەك حۋلەن لوپەتەگيدىڭ مادريدكە باراتىنىن ەشكىم بولجاپ بىلگەن ەمەس, كوپشىلىك كۇتكەن جوق. ونىڭ كانديداتى ءتىپتى جۇرت كۇتكەن باپكەرلەردىڭ اراسىندا دا بولعان ەمەس. زيدان «رەالمەن» قوشتاسقان كەزدە بۋكمەكەرلەر كەلەسى باپكەر كىم بولاتىنى جايلى ءباس تىگۋ ءىسىن قابىلداي باستادى. بۇل تىزىمدە «توتتەنحەمنىڭ» جاتتىقتىرۋشىسى ماۋريسيو پوچەتتينو كوش باستاپ تۇرعان. سونداي-اق ارسەن ۆەنگەر, گۋتي, ماسسيميليانو اللەگري, انتونيو كونتە, ماۋريتسيو سارري, اندرە ۆيللاش-بواش, لۋيس فەليپە سكولاري, تيتە, يواحيم ليوۆ سەكىلدى مامانداردىڭ قاراسى كورىنگەن.
بىراق «رەال» پرەزيدەنتى فلورەنتينو پەرەستىڭ ويى مۇلدەم باسقا جاقتان شىقتى. ول كەلىسىمگە كەلۋ جاعىنان دا, قارجىلىق تۇرعىدان دا ىڭعايلى ءارى يسپانيالىق ويىنشىلارمەن بىردەن ءتىل تابىساتىن كانديداتتاردى قاراستىرعان سەكىلدى. ال لوپەتەگي «رەال» ءۇشىن تاڭسىق ەمەس. ول فۋتبولشى رەتىندە دە, باپكەر رەتىندە دە ءمادريدتىڭ قىزۋ تىرشىلىگىن كورگەن.
قانداي كوماندالاردى جاتتىقتىردى؟حۋلەن لوپەتەگي ويىنشى كەزىندە قاقپاشى بولعان. ايتا كەتەر ءبىر جايت ول «رەالدىڭ» ەجەلگى قارسىلاسى «بارسەلونادا» دا ونەر كورسەتكەن. الايدا نەگىزگى قۇرامنان ورىن الا الماي ەل-كلاسسيكو يەلەرىنىڭ قوسالقى تىزىمدەگى ويىنشىسى بولدى. «رايو ۆالەكانو» قاقپاسىن بەس جىل قورعاعاننان كەيىن 2002 جىلى ۇلكەن سپورتتان كەتتى.
ۇلكەن سپورتتان كەتكەنمەن فۋتبولدان قول ءۇزىپ قالمادى. باپكەر رەتىندە ءوزىن سىناپ, «رايو ۆالەكانونى» 2003 جىلى جاتتىقتىرعان. الايدا تاجىريبەسى جەتە قويمادى. لوپەتەگيدىڭ قول استىندا بۇل ۇجىم نەبارى 10 ويىن كورسەتتى. ول تۇستا «رايو» يسپانيانىڭ ەكىنشى دەڭگەيلى سەگۋنداسىندا ونەر كورسەتكەننەن كەيىن ءاربىر ماتچ ماڭىزدى بولاتىن. لوپەتەگيگە ۇزاق ۋاقىت بەرىلمەدى.
وسىدان كەيىن حۋلەن بەس جىل فۋتبولدان قول ءۇزىپ, تەك 2008 جىلى ورالدى. 2008/2009 ماۋسىمىندا «رەالدىڭ» فارم-كلۋبىنا جەتەكشىلىك ەتتى. ال ارى قاراي جۇمىسىن ۇلتتىق قۇرامالارمەن بايلانىستىردى. 2010-2014 جىلدار ارالىعىندا يسپانيا U19, U20 جانە U21 ۇجىمىن جاتتىقتىردى. ول 19 جاستاعى ويىنشىلارمەن ەۋرو-2012 دوداسىن جەڭىپ الدى, كەلەر جىلى جاستار قۇراماسىمەن ەۋرو-2013 ءتۋرنيرىن ۇتىپ, بىلىكتىلىگىن دالەلدەي ءتۇستى.
ول 2014 جىلى پورتۋگاليانىڭ «پورتۋىنا» كەتتى. ونىڭ جەتەكشىلىگىمەن «ايداھارلار» العاشقى ماۋسىمدا چەمپيوناتتى ەكىنشى ورىنمەن اياقتاپ, چەمپيون اتانعان «بەنفيكادان» نەبارى ءۇش ۇپاي قالىپ قويدى. الايدا كەلەر جىلى ۇجىمنىڭ كورسەتكىشى ناشارلاي تۇسكەندىكتەن ۋاقىتىنان بۇرىن قىزمەتىنەن بوساتىلدى.
2016 جىلى يسپانيا قۇراماسىنان ۆيسەنتە دەل بوسكە كەتكەننەن كەيىن ورنىنا لوپەتەگي تاعايىندالدى. ول «قىزىل فۋريالارمەن» بىرگە الەم چەمپيوناتىنىڭ ىرىكتەۋ كەزەڭىن ەش قينالماستان اياقتادى. يسپانيا بۇل ارالىقتا يتاليامەن عانا ءبىر ويىندا تەڭ ويناپ, ۇپاي جوعالتتى.
يسپانيانى كىم جاتتىقتىرۋى مۇمكىن؟وتكەن ايدا عانا لوپەتەگي ۇلتتىق قۇرامامەن كەلىسىمشارت مەرزىمىن ۇزارتتى. وسىعان قاراپ-اق حۋلەننىڭ ەكى اپتا بۇرىن «رەال» تۋرالى مۇلدەم ويلاماعانىن بىلۋگە بولادى. ەندى يسپانيانىڭ اقپارات قۇرالدارى ونىڭ ءىزباسارى تۋرالى بولجام جاساپ جاتىر.
تىزىمدە «روما», «سەلتا», «بارسەلونا» كلۋبتارىنىڭ ەكس-جاتتىقتىرۋشىسى لۋيس ەنريكە بار. بىراق «بارسەلونامەن» ۇلكەن جەتىستىككە جەتكەن مامان فەدەراتسيادان از جالاقى تالاپ ەتپەسى بەلگىلى. ودان كەيىنگى ورىندا «حەتافە», «سەۆيليا», «وليمپياكوس», «مارسەل» جانە «مالاگا» كلۋبتارىنىڭ بۇرىنعى جەتەكشىسى ميچەل تۇر. سونداي-اق يسپانيانىڭ جاستار قۇرامىن جاتتىقتىراتىن البەرت سەلادەستىڭ كانديداتۋراسى دا بار.
لوپەتەگي: مەسسي تاريحتاعى ۇزدىك ويىنشىلوپەتەگي كەلەر ماۋسىمدا «رەالدا»... ەندڭ كوماندانىڭ باس جۇلدىزى كريشتيانۋ رونالدۋمەن قانشالىقتى ءتىل تابىسا الاتىنى كوپشىلىكتى قىزىقتىرىپ وتىر؟! ول وسىعان دەيىنگى سۇحباتتارىندا پورتۋگاليالىقتىڭ باستى باسەكەلەسى ليونەل مەسسيدى ەڭ ۇزدىك ويىنشى سانايتىنىن بىرنەشە رەت مالىمدەگەن.
ماسەلەن 2016 جىلدىڭ قاراشاسىندا AS TV ارناسىنا مىناداي پىكىر ءبىلدىردى: «التىن دوپ» جۇلدەسى؟ مەن مەسسيدى ءبىرىنشى, راموستى ەكىنشى, رونالدۋدى ءۇشىنشى ورىنعا قويدىم. وسىعان دەيىن مەسسي سەكىلدى تۇراقتى دەڭگەيدە ويناپ كەلە جاتقان ويىنشىنى كورگەن ەمەسپىن», دەگەن.
ال بىرەر اپتا بۇرىن 20 minutos باسىلىمىنا بەرگەن سۇحباتىندا ارگەنتينالىق شابۋىلشىنى كەزەكتى رەت ۇزدىك ويىنشى رەتىندە ەسەپتەيتىنىن ايتتى.
«لەو مەسسي مەن كورگەن ويىنشىلاردىڭ ىشىندەگى ەڭ ۇزدىگى. ول سەكىلدى فۋتبولشىنى كورۋىمىز ەكىتالاي. ەشبىر ويىنشى كوماندانى مەسسي سەكىلدى تىعىرىقتاردان شىعارعان ەمەس. ونىڭ ويىنىن كورىپ وتىرىپ, راحاتتاناسىڭ. مەن ءۇشىن ول فۋتبول تاريحىنداعى ەڭ ۇزدىك ويىنشى», دەگەن ەدى حۋان لوپەتەگي.
وسىنداي پىكىرلەرىنەن كەيىن كوزقاراسىن وزگەرتەر مە ەكەن؟! الايدا كريشتيانۋ رونالدۋ چەمپيوندار ليگاسىنىڭ فينالىنان كەيىن وسى جازدا «رەالدان» كەتۋى مۇمكىن ەكەنىن مالىمدەگەن. بالكىم لوپەتەگي قازىردەن-اق پورتۋگاليالىقتىڭ مادريدتەن كەتەتىنىن بىلەتىن بولار!
دايىنداعان
ايان ءابدۋالي, «ەگەمەن قازاقستان»