كەشە مەملەكەت باسشىسى نۇرسۇلتان نازارباەۆ ۇجىمدىق قاۋىپسىزدىك تۋرالى شارت ۇيىمىنىڭ باس حاتشىسى نيكولاي بورديۋجانى قابىلدادى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى.
ن.بورديۋجا پرەزيدەنتتى ۇقشۇ-نىڭ اعىمداعى جىلدىڭ جەلتوقسان ايىندا ءماسكەۋدە وتەتىن ۇجىمدىق قاۋىپسىزدىك كەڭەسىنىڭ سەسسياسىنا دايىندىق بارىسىنان حاباردار ەتتى.
– تامىز ايىندا استانادا ۇقشۇ-عا مۇشە ەلدەر مەملەكەت باسشىلارىنىڭ بەيرەسمي ءسامميتى ءوتتى. جوعارى دەڭگەيدە وتكەن كەزدەسۋ وتە ناتيجەلى بولدى. پرەزيدەنتتەر ۇيىمدى دامىتۋدىڭ ساليقالى, تۇبەگەيلى ماسەلەلەرى جونىندە ۋاعدالاستى. بۇگىن مەن قازاقستان پرەزيدەنتىن مەملەكەت باسشىلارىنىڭ استانادا قول جەتكىزگەن كەلىسىمدەردىڭ ورىندالۋ بارىسىنان حاباردار ەتتىم. ءماسكەۋدەگى سەسسيادا بىرقاتار ءماسەلەلەر تالقىلانىپ, ۇقشۇ-نىڭ دامۋىنا ايتارلىقتاي سەرپىن بەرەتىن قۇجاتتار قارالاتىن بولادى. ۇيىمعا ءتوراعالىق ەتۋ قازاقستان رەسپۋبليكاسىنا وتەدى. ادەتتە, قازاقستاننىڭ توراعالىعى وتە كرەاتيۆتى جانە تابىستى بولادى, سوندىقتان ءبىز كەلەسى جىل ۇقشۇ قىزمەتى قارقىندىلىعىمەن جانە ءتيىمدى ناتيجەلەرىمەن ەرەكشەلەنەدى دەپ سەنەمىز, – دەپ اتاپ ءوتتى ن. بورديۋجا.