16-17 ماۋسىم كۇندەرى «داۋلەت» سپورتكومبيناتىندا, استانا قالاسىنىڭ 20 جىلدىق مەرەيتويىنا وراي كيوكۋشينكاي-كان كاراتەدەن بالالار, جاسوسپىرىمدەر, كىشى جاستاعى قىزدار, ەرلەر جانە ايەلدەر اراسىندا اشىق ازيا چەمپيوناتى وتەدى. بۇل چەمپيوناتتا كۋميتە جانە كاتا ءتۇرى بويىنشا 12 جاستان جوعارى سپورتشىلار 37 سالماقتا سىنعا تۇسەدى.
قۇرلىقتىق باسەكەگە 12 مەملەكەتتەن 250-گە جۋىق سپورتشى قاتىسادى دەپ جوسپارلانعان. قازىرگى تاڭدا چەمپيوناتقا يران, يراك, ءۇندىستان اۋعانستان, تاجىكستان, قىرعىزستان, رەسەي, جاپونيا, مونعوليا, تۇركمەنستان مەملەكەتتەرى قاتىساتىندىعىن راستادى.
جىلدىڭ بايراقتى باسەكەسىندە ەل نامىسىن ەرلەر اراسىنداعى الەم چەمپيونى كارمەنوۆ اليشەر, 2015 جىلدىڭ ازيا چەمپيونى, الەم بىرىنشىلىگىنىڭ كۇمىس جۇلدەگەرى گاراس نيكيتا, ايەلدەر اراسىنداعى الەم چەمپيوناتىنىڭ كۇمىس جۇلدەگەرى سابىرحان الەمگۋل, جاستار اراسىنداعى الەم چەمپيوناتىنىڭ كۇمىس جۇلدەگەرى ساۋىتوۆا مادينا سىندى ەلىمىزدىڭ ۇزدىك جاس تاتامي شەبەرلەرى قورعايتىن بولادى.