قازاقستان رەسپۋبليكاسى اقپارات جانە كوممۋنيكاتسيا مينيسترلىگىنىڭ ۇيىمداستىرۋىمەن الەۋمەتتىك بەينەروليكتەردىڭ ەڭ ۇزدىك يدەيالارىنا ارنالعان «نيەت» بايقاۋىنىڭ جەڭىمپازدارىن ماراپاتتاۋ ءراسىمى ءوتتى.
جيىن بارىسىندا اۋەلى بەلگىلى رەجيسسەر اقان ساتاەۆ ءسوز الىپ, اتالعان جوبانىڭ ماڭىزدىلىعىنا توقتالدى. بۇدان كەيىن «حابار» اگەنتتىگى تۇسىرگەن بالا تاربيەسىندە اتا-انانىڭ الاتىن ءرولى مەن بالانىڭ جاسىنان كەشكەن قيالىنىڭ وسە كەلە شىندىققا اينالۋى مۇمكىن ەكەندىگى تۋرالى ارنايى بەينەروليك كورسەتىلدى. ءوز سوزىندە «حابار» اگەنتتىگىنىڭ باسقارما توراعاسى الان اجىباەۆ, «قازاقستان» ۇلتتىق ارناسىنىڭ باسقارما توراعاسى ەرلان قارين جانە «قازمەديا» مەديا مەكتەبىنىڭ باسشىسى ماحاببات ەسەن ەلىمىزدىڭ اقپارات جانە كوممۋنيكاتسيا مينيسترلىگىنىڭ بۇل باستاماسى اسىرەسە قالىپتاسىپ كەلە جاتقان جاستار ءۇشىن ايرىقشا ماڭىزدى ەكەنىن ايتىپ, الداعى ۋاقىتتا دا مينيسترلىكتىڭ بۇل باستاماسىن قولدايتىندارىن جەتكىزدى.
تەلەارنالاردان كوپشىلىككە كورسەتىلگەن ەلىمىزدىڭ بەيبىت ءومىر مەن دوستىق مەكەنى تۋرالى بەينەروليكتەر تاۋەلسىز ەلىمىزدىڭ تابىستارىن كورسەتە بىلگەن تۋىندى بولسا, سونىمەن قاتار قوعامداعى قارتتار ءۇيى, جەتىم بالالار تاعدىرى سياقتى دۇنيەلەر دە وي سالارلىق دۇنيە بولدى. مۇندا ۇزدىك يدەيالاردىڭ كورىنىس تاپقانى ايقىن كورىنىپ تۇردى.
الەۋمەتتىك روليكتەردىڭ ەڭ ۇزدىك يدەيالارىنا ارنالعان «نيەت» بايقاۋىنىڭ باس جۇلدەسىن اقان ساتاەۆتىڭ جەتەكشىلىگىمەن الەۋمەتتىك بەينەروليك تۇسىرگەن الماتىلىق دميتري گالابير جەڭىپ الدى. جەڭىمپازدى اقپارات جانە كوممۋنيكاتسيا ءمينيسترى داۋرەن اباەۆ ماراپاتتاپ, ءبىر ميلليون تەڭگە كولەمىندە قارجىلاي سىيلىق پەن ارنايى ديپلوم تابىس ەتتى. ءوز سوزىندە داۋرەن اسكەربەك ۇلى كورسەتىلىپ جاتقان بەينەروليكتەردىڭ اسا ماڭىزدى جۇمىس ەكەنىن جانە بۇل جوبانىڭ الداعى ۋاقىتتا دا جالعاسىن تاباتىنىن ايتتى.
سونىمەن قاتار جۇلدەگەرلەر قاتارىنان قۋانىش وماروۆ جانە رينات تۇرعانبەكوۆ سياقتى ازاماتتار دا كورىندى. جۇلدەگەرلەرگە Apple MacBook نوۋتبۋگى مەن Canon فوتوكامەراسى تابىستالدى.
ايتا كەتەيىك, ەلىمىزدىڭ بارلىق وڭىرلەرىنىڭ تۇرعىندارىنان الەۋمەتتىك بەينەروليك يدەياسى بايقاۋىنا قاتىسۋ ءۇشىن 600-دەن استام ستسەناريلەر كەلىپ تۇسكەن ەكەن. ال وتكەن جىلى ەلىمىزدىڭ اقپارات جانە كوممۋنيكاتسيا مينيسترلىگىنىڭ تاپسىرىسى بويىنشا 131 بەينەروليك تۇسىرىلگەن.
حاميت ەسامان,
«ەگەمەن قازاقستان»