ۇلتتىق ۇلاننىڭ «وڭتۇستىك» وڭىرلىك قولباسشىلىعىندا جەرگىلىكتى ۇلت وكىلى ەمەس اسكەري قىزمەتشىلەردىڭ اراسىندا «مەملەكەتتىك ءتىل – مەنىڭ ءتىلىم» سايىسىنىڭ ەكىنشى كەزەڭى ءوتتى, دەپ حابارلايدى ۇلتتىق ۇلاننىڭ «وڭتۇستىك» وڭىرلىك قولباسشىلىعىنىڭ ءباسپاسوز قىزمەتى.
سايىستىڭ ماقساتى مەملەكەتتىك ءتىل ساياساتىن ناسيحاتتاۋ, تىلگە قۇرمەتتى ارتتىرۋ, قازاق ءتىلىن جەتىك ۇيرەنۋگە ىنتالاندىرۋ, اسكەري قىزمەتشىلەرگە مەملەكەتتىك ءتىلدى مەڭگەرتۋدىڭ وڭ تاجىريبەسىن تاراتۋ بولدى.
اتالعان سايىس ۇلتتىق ۇلاندا بىرنەشە جىل قاتارىنان وتكىزىلىپ كەلەدى. جىل سايىن سايىستىڭ تالابى كۇشەيىپ, زامانعا ساي جاڭالىقتار ەنگىزىلىپ وتىرادى. ءتىل تاقىرىبى عانا ەمەس, تاريحتى, سالت-ءداستۇردى, وتانسۇيگىشتىكتى ناسيحاتتاعان شارانىڭ جەكە قۇرامدى تاربيەلەۋدە اتقارىپ كەلە جاتقان ءرولى زور.
«وڭتۇستىك» وڭىرلىك قولباسشىلىققا قاراستى شىمكەنت, تاراز, قىزىلوردا قالالارى مەن الماتى وبلىسىنىڭ ۇزىناعاش اۋلىنان شاقىرىلعان ۇلاندىق سايىسكەرلەر الماتى قالاسىندا وتەتىن شاراعا ۇلكەن دايىندىقپەن كەلگەن. كىلەڭ سايدىڭ تاسىنداي ىركىتەلگەن جىگىتتەر الدىمەن وزدەرىن تانىستىرۋدان باستادى. سايىسقا جەتى ۇمىتكەر قاتىستى, اتاپ وتسەك, 7552 اسكەري بولىمىنەن سەرجانت ششەلوكوۆ الەكساندر ۆلاديميروۆيچ, 3650 اسكەري بولىمىنەن اعا لەيتەنانت كرۋك ۆيكتور ۆلاديميروۆيچ, 5571 اسكەري بولىمىنەن سەرجانت نايمۋشين اندرەي الەكساندروۆيچ, 5513 اسكەري بولىمىنەن سەرجانت باكلاگين ۆلاديمير الەكساندروۆيچ, 5547 اسكەري بولىمىنەن اعا لەيتەنانت يباتۋللين رۋسلان پاۆلوۆيچ, 6506 اسكەري بولىمىنەن اعا لەيتەنانت پودولياك سۆياتوسلاۆ ۆلاديميروۆيچ, 6698 اسكەري بولىمىنەن سەرجانت مۇستافاەۆ نۋراددين داگەستانوۆيچتەر, 28237 اسكەري بولىمىنەن قاتارداعى مامىكين الەكساندر الەكساندروۆيچتەر باق سىناسىپ, ءوز بولىمدەرىنىڭ نامىسىن قورعادى.
ماقال-ماتەل ايتۋدان جارىسقا تۇسكەن اسكەريلەر اراسىندا سەرجانت ششەلوكوۆ الەكساندر قاتارلاستارىنان وق بويى وزىپ شىقتى, ول ءوزىن تانىستىرۋدا دا دومبىرانى ايتىستىڭ ماقامىمەن شەرتىپ, كورەرمەندى بىردەن باۋراپ العان ەدى. شىمكەنتتەن كەلگەن ازەربايجان ۇلتىنىڭ وكىلى سەرجانت مۇستافاەۆ نۇراددين قازاقتىڭ سالت-ءداستۇرىن تەرەڭ ويلى سوزدەرمەن جەتكىزىپ, پاراساتتى قازاق ەر-ازاماتىنىڭ تۇلعاسىن سومداپ شىقتى. ءنۇرادديننىڭ ءتىلى جاتىق, ويىن ەركىن جەتكىزەتىندىگى بايقالدى.
ال سايىسكەرلەر ىشىندەگى ەڭ جاسى قاتارداعى مامىكين الەكساندرعا توتەپ بەرەر قارسىلاس بولمادى. جاس كەلسە, ىسكە دەگەن وسى بولار. الەكساندردىڭ ءسوز ساپتاۋى, وي قورىتۋى, تانىم-تۇيسىگى مەن ءبىلىمى ارتىمىزدا كەلە جاتقان جاس تولقىن ۇرپاقتىڭ شىعار بيىگىن كورسەتكەندەي. ول وسى شارانىڭ وزىنە جاڭا ۇلگى الىپ كەلدى. كۇنى كەشە, وتان قورعاۋشىلار كۇنى جاۋىنگەرلىك پارادتا شىرقالعان «مەن قازاقپىن» ءانىن رۋحتانىپ, ارقالانىپ ايتتى.
سونداي-اق, ءتىل بايقاۋىنىڭ بارىسىندا ب.مومىش ۇلىنا ارناۋ, تىلگە قۇرمەت, قازاقستاننىڭ جەتىستىكتەرى, استانانىڭ 20 جىلدىعى, وتاندى ءسۇيۋ تاقىرىپتارىندا شەشەن سويلەۋگە تالپىنىس بولدى.
سايىس قورىتىندىسى بويىنشا كورەرمەندەر كوزايىمى بولعان 5547 اسكەري ءبولىمىنىڭ اسكەري قىزمەتشىسى, تاتار حالقىنىڭ وكىلى, اعا لەيتەنانت ر.يباتۋللين ارنايى گراموتامەن ماراپاتتالدى. 6698 اسكەري بولىمىنەن كەلگەن سەرجانت ن.مۇستافاەۆ 3-ورىندى, 7552 اسكەري بولىمىنەن قاتىسقان سەرجانت ا.ششەلوكوۆ 2-ورىندى, ال 28237 اسكەري بولىمىنەن سايىسقا تۇسكەن قاتارداعى ا.مامىكين 1-ورىندى يەلەنىپ, ديپلومدارمەن جانە باعالى سىيلىقتارمەن ماراپاتتالدى.
مەملەكەتتىك ءتىل مارتەبەسى ۇلىقتالعان كەشكە قازاقستان حالقى اسسامبلەياسىنىڭ الماتى قالاسىنداعى وكىلدەرى قاتىسىپ, ۇلتتىق-مادەني ورتالىقتاردىڭ ءان-شاشۋلارى سىيعا تارتىلدى. قازاقتىڭ قولونەر بۇيىمدارىنان كورمە قويىلدى. اتالعان باعدارلاما مەن كورمەنى ۇيىمداستىرۋعا قولداۋ كورسەتكەن قازاقستان رەسپۋبليكاسى پرەزيدەنتىنىڭ جانىنداعى «قوعامدىق كەلىسىم» رەسپۋبليكالىق مەملەكەتتىك مەكەمەسى الماتى قالاسىنداعى «دوستىق» ءۇيىنىڭ بىرقاتار مۇشەلەرى العىس حاتتارمەن ماراپاتتالدى.