ينۆەستيتسيالار جانە دامۋ مينيسترلىگىندە وبلىس, استانا مەن الماتى قالالارىنىڭ اكىمدىكتەرىن وڭىرلىك جوسپارلارمەن كوپپاتەرلى تۇرعىن ۇيلەردى (كتۇ) قۇرالداندىرۋ جانە تولىق ماسشتابتى تەحنيكالىق تۇگەندەۋ جونىندەگى تىڭداۋ اياقتادى. اتالعان جۇمىس تكش سالاسىنداعى بىرىڭعاي ينتەلەكتۋالدىق اقپاراتتىق جۇيەنى ودان ءارى ەنگىزۋ ماقساتىمەن جۇرگىزىلدى.
تىڭداۋدىڭ ناتيجەسىندە 16 جول كارتاسىنا قول قويىلدى. وسىعان سايكەس 16 ايماقتاعى 190 قاناتقاقتى ۇيلەردە, ول شامامەن 15 مىڭ پاتەر, جالپى ۇيلىك جىلۋدى, سۋدى جانە ەلەكتردى ەسەپتەۋ قۇرالدارى (جۇق) ورناتىلاتىن بولادى. جۇق تۇتىنۋشىلارعا ناقتى قولدانعان رەسۋرستار ءۇشىن عانا تولەۋ مۇمكىندىگىن بەرەدى.
ايتا كەتەرلىك ءجايت, مۇنداي جىلۋدى ەسەپتەۋ قۇرالى تۇرعىندارعا جىلۋدى تۇتىنۋداعى شىعىنىن 36% ۇنەمدەۋگە مۇمكىندىك بەرەدى. بۇعان قوسا, تەرموجاڭعىرتۋ مەن اۆتوماتتاندىرىلعان جىلۋ ءتۇيىنىن (اجت) ورناتۋ ەلەمەنتتەرى بار كتۇ كۇردەلى جوندەۋ جۇمىسىن جۇرگىزۋ ارقىلى سىرتقى اۋانىڭ تەمپەراتۋراسىنا بايلانىستى جىلۋدى تۇتىنۋدى رەتتەۋ مۇمكىندىگىمەن, شىعىستاردى 60% دەيىن تومەندەتۋگە بولادى.
قاناتقاقتى رەجيمدە جاراقتاندىرۋ جۇمىستارى اعىمداعى جىلدىڭ 30 قىركۇيەگىنە دەيىن اياقتاۋ جوسپارلانىپ وتىر. سونىمەن بىرگە, بۇدان ءارى جوسپاردا كۆارتالداردى, ايالدامالاردى, پاركينگتەردى «اقىلدى» باعدارشامدارمەن, كوشە جارىقتارىمەن جاراقتاندىرۋ, «اقىلدى» كولىكتى جۇرگىزۋ, ويىن الاڭدارىندا جانە كوشەدە بەينەباقىلاۋ ورناتۋ مەن باسقا دا جاڭالىقتاردى ەنگىزۋ جوسپارلانىپ وتىر.
بيىلعى جىلدىڭ 1 قاراشاسىنا دەيىن, «اقىلدى» كۆارتالداردى E-SHANYRAQ جۇمىس اتاۋى بىرىڭعاي ينتەللەكتۋالدىق اقپاراتتىق جۇيەلەرگە قوسۋ جوسپارلانۋدا. قازىرگى كەزدە بۇل جوبا بويىنشا قر ينۆەستيتسيالار جانە دامۋ مينيسترلىگىنىڭ قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتى جانە «تكش قازورتالىعى» اق بىرلەسكەن جۇمىستى اتقارىپ وتىر. سونداي-اق, جۇيەگە 51 تابيعي مونوپوليالار سۋبەكتىسى مەن 25 پيك قوسىلاتىن بولادى. پيلوتتىق ۇيلەردە مۇنداي جوبانى ىسكە اسىرۋ جۇيەنىڭ بارلىق تۇتىنۋشىلارىنا ونىڭ مۇمكىندىكتەرىن باعالاۋ جانە ونىڭ تيىمدىلىگىنە تەكسەرۋ مۇمكىندىگىن بەرەدى.
كتۇ قۇرالداندىرۋ جانە تۇگەندەۋ بويىنشا جۇمىستار كتۇ سانى مەن جاعدايى تۋرالى ناقتى دەرەكتەردىڭ بولماۋىنا بايلانىستى, ولاردى ءارتۇرلى ستاندارتتاردا جۇمىس ىستەيتىن ورتالىقتاندىرىلماعان قۇرالداردى ساتىپ الۋ ارقىلى ەسەپتەۋ قۇرالدارىمەن جاراقتاندىرۋ باستالدى. جالپى تكش تسيفرلاندىرۋعا بايلانىستى, ايتا كەتەر ءجايت, قازاقستانداعى وسى سالادا اقپاراتتىق رەسۋرستارعا بىرىڭعاي ءادىس قاراستىرىلماعان. قازىرگى ۋاقىتتا, قر يدم «تۇرعىن ءۇي قاتىناستارى» زاڭىنا تۇزەتۋلەردى ەنگىزۋدى قاراستىرۋدا, وعان ينفراقۇرىلىمدىق-تۇرعىن ءۇي-كەشەنىنىڭ بىرىڭعاي اقپاراتتىق جۇيەسىن جاساۋ تۋرالى نورماسى, سونىمەن بىرگە قاجەتتى تالاپتار مەن نورماتيۆتەر قوسىلاتىن بولادى.
«وسىلايشا, كوممۋنالدىق جەلىلەردى تسيفرلاندىرۋ ەسەپتەۋ قۇرالدارىنىڭ كورسەتكىشتەرىن اۆتوماتتى جيناۋعا جول اشادى. بۇل ادامي فاكتوردى جويادى جانە ەسەپ-شوتتاردى قويۋ كەزىندە اشىقتىقتى قامتاماسىز ەتەدى. ۇيلەردى باسقارۋدىڭ ونلاين-جۇيەسى باسقارۋشى كومپانيالاردىڭ (پيك) وپەراتسيالىق قىزمەتىن اشىق جۇرگىزۋ مۇمكىندىگىن بەرەدى. بۇدان باسقا, تابيعي مونوپوليالار سۋبەكتىلەرىنىڭ جوسپارلى تسيفرلاندىرۋى ولاردىڭ قىزمەتىنىڭ اشىقتىعىن قامتاماسىز ەتەدى جانە ەنەرگيا رەسۋرستارىن ءوندىرۋ مەن تۇتىنۋ بالانسىن جاقسارتادى. بارلىق وسى دەرەكتەر بىرىڭعاي ينتەللەكتۋالدى اقپاراتتىق جۇيەنىڭ نەگىزىن قۇرايدى», - دەيدى «تكش قازورتالىعى» اق باسقارما توراعاسىنىڭ ورىنباسارى مەيرجان مايكەنوۆ.
ەستەرىڭىزگە سالا كەتەلىك, اعىمداعى جىلدىڭ ءساۋىر ايىندا قر پرەمەر-ءمينيسترىنىڭ ورىنباسارى اسقار جۇماعاليەۆتىڭ توراعالىق ەتۋىمەن تكش تسيفرلاندىرۋ بويىنشا وتىرىستار جۇرگىزىلىپ, قر ينفراقۇرىلىمدىق-تۇرعىن ءۇي كەشەنىنىڭ نەگىزگى باعىتتارىن دامىتۋ تالقىلانعان بولاتىن.
كەڭەس قورىتىندىسى بويىنشا جەرگىلىكتى اتقارۋشى ورگاندارىنا كتۇ قۇرالداندىرۋ بويىنشا وڭىرلىك باعدارلامانى ازىرلەۋدىڭ, تۇرعىن ءۇي قورىن جانە ورناتىلعان ەسەپتەۋ قۇرالدارىن, قولدانىستاعى اقپاراتتىق جۇيەلەر مەن رەسۋرستاردى تۇگەندەۋدى جۇرگىزۋ ماسەلەلەرىن پىسىقتاۋ, سونىمەن بىرگە سالانى دامىتۋدىڭ نەگىزگى ينديكاتورلارىن تسيفرلاندىرۋ جانە قۇرالداندىرۋ بويىنشا وڭىرلىك جول كارتاسىن ازىرلەۋ تاپسىرىلعان بولاتىن.
ايناش ەسالي,
«ەگەمەن قازاقستان».
الماتى