قر پرەزيدەنتى نۇرسۇلتان نازارباەۆ پەن قحر توراعاسى سي تسزينپين بىرلەسكەن مالىمدەمەگە قول قويدى, دەپ حابارلايدى قازاقپارات.
ايتا كەتەيىك, وسى كۇندەرى ەلباسى نۇرسۇلتان نازارباەۆتىڭ قىتايعا مەملەكەتتىك ساپارى وتۋدە. بۇگىن ەكى مەملەكەت باسشىلارىنىڭ كەڭەيتىلگەن قۇرامداعى كەلىسسوزدەرى ءوتتى. ونىڭ قورىتىندىسى بويىنشا بىرلەسكەن مالىمدەمە قابىلداندى.
مۇنان بولەك, قىتايلىق ارىپتەستەرىمەن قر قارجى ءمينيسترى باقىت سۇلتانوۆ - ءۇش, ينۆەستيتسيالار جانە دامۋ ءمينيسترى جەڭىس قاسىمبەك پەن قر پرەمەر-ءمينيسترىنىڭ ورىنباسارى-اۋىل شارۋاشىلىعى ءمينيسترى ومىرزاق شوكەەۆ ەكى-ەكىدەن قۇجات راسىمدەدى.
اتاپ ايتقاندا, باقىت سۇلتانوۆ قحر باس كەدەن باسقارماسىنىڭ باسشىسى ني يۋەفەنمەن قر ۇكىمەتى مەن قحر ۇكىمەتى اراسىنداعى يادرولىق ماتەريالدار, راديواكتيۆتى ماتەريالدار, راديواكتيۆتى قالدىقتار مەن راديواكتيۆتى-قاۋىپتى زاتتاردىڭ زاڭسىز ورىن اۋىستىرۋىن بولدىرماۋ ءۇشىن ءوزارا ءىس-قيمىل جونىندەگى كەلىسىمگە, حالىقارالىق دامۋ جانە ىنتىماقتاستىق اگەنتتىگىنىڭ توراعاسى ۆان سياوتاومەن قر ۇكىمەتى مەن قحر ۇكىمەتى اراسىنداعى جەڭىلدىكپەن كرەديت بەرۋ تۋرالى رامالىق كەلىسىمگە, قارجى ءمينيسترى ليۋ كۋنمەن قر قارجى ءمينيسترى مەن قحر قارجى ءمينيسترى اراسىنداعى ءوزارا تۇسىنىستىك جانە ىنتىماقتاستىق تۋرالى مەموراندۋمعا قول قويدى.
ال جەڭىس قاسىمبەك قىتايدىڭ دامۋ جانە رەفورمالار جونىندەگى مەملەكەتتىك كوميتەتىنىڭ توراعاسى حە ليفەەمەن ەكى ۆەدومستۆو اراسىنداعى وندىرىستىك قۋاتتار مەن ينۆەستيتسيالار سالاسىنداعى قىتايلىق-قازاقستاندىق جوسپاردى بىرلەسىپ ازىرلەۋ جونىندەگى, يندۋستريالاندىرۋ, ينۆەستيتسيا جانە ولاردى قالىپتاستىرۋ تەتىكتەرى سالاسىنداعى بىرلەسكەن جوبالار تىزبەسىن بەكىتۋ جونىندەگى ءوزارا تۇسىنىستىك مەموراندۋمدارىن بەكىتتى.
ومىرزاق شوكەەۆ باس كەدەن باسقارماسىنىڭ باسشىسى ني يۋەفەنمەن قازاقستاننان قىتايعا ەكسپورتتالاتىن سيىر ەتىنە ينسپەكتسيالىق, كارانتيندىك جانە ۆەتەرينارلىق-سانيتارلىق تالاپتار جونىندەگى, جوڭىشقا تۇقىمى ەكسپورتىنا سانيتارلىق جانە فيتوسانيتارلىق تالاپتار حاتتامالارىنا قول قويدى.