16-24 ماۋسىم ارالىعىندا ۆەنگريانىڭ باس شاھارى – بۋداپەشتە ۆاتەرپولدان ەرلەر اراسىنداعى الەمدىك ليگانىڭ سۋپەرفينالدىق سايىستارى وتەدى. بۇل جارىستا چەرنوگوريا, حورۆاتيا, يسپانيا, ۆەنگريا, اقش, اۋستراليا, جاپونيا جانە قازاقستاننىڭ ۇلتتىق قۇراما كوماندالارى كۇش سىناسادى.
ايتۋلى دودا 2002 جىلدان بەرى ۇزدىكسىز ۇيىمداستىرىلىپ كەلەدى. گرەكيانىڭ پاترى قالاسىندا وتكەن تۇساۋكەسەر تۋرنيردە رەسەي سپورتشىلارى توپ جارسا, ودان كەيىن نيۋ-يورك پەن لونگ-بيچتە ۆەنگريانىڭ ۆاتەرپولشىلارىنا تەڭ كەلەر ەشكىم تابىلمادى. 2005 جانە 2006 جىلدارى بەلگراد پەن افينادا جالاۋى جەلبىرەگەن جارىستا سەربيا مەن چەرنوگوريا قۇرامالارى شاشاسىنا شاڭ جۇقتىرمادى. كەيىننەن جوعارىدا اتالعان مەملەكەتتىڭ ىرگەسى سوگىلىپ, ولاردىڭ ارقايسىسى جەكە-جەكە كوماندا جاساقتايدى. بۇل رەتتە دە ولار نەسىبەسىز بولعان جوق. 2009 جىلى پودگوريتسادا وتكەن دودا چەرنوگوريانىڭ جەڭىسىمەن اياقتالسا, سەربيانىڭ سۋ دوبى شەبەرلەرى توعىز مارتە باس جۇلدەنى ولجالادى.
2012 جىلعى الەمدىك ليگانىڭ سۋپەرفينالى الماتىدا ۇيىمداستىرىلعانىن جانكۇيەرلەر ۇمىتا قويعان جوق. وسى سپورت ءتۇرىنىڭ شوق جۇلدىزدارى الاتاۋ باۋرايىندا التى كۇن بويى ايقاسىپ, سولاردىڭ اراسىنان حورۆاتيا سۋىرىلىپ شىقتى. فينالدا حورۆاتتار يسپانيادان ايلاسىن اسىرسا, قولا مەدال يتالياعا بۇيىردى. وكىنىشكە قاراي, بارلىق باسەكەدە جەڭىلىس تاپقان جەرلەستەرىمىز الماتىداعى ءتۋرنيردى ەڭ سوڭعى ورىنمەن قورىتىندىلاعان بولاتىن.
بۋداپەشتە جارىس جولىنا شىعاتىن كوماندالاردىڭ بارلىعى دا وتە مىقتى. وزگە دودالاردى ايتپاعاندا وليمپيا ويىندارىنىڭ وزىندە عانا ۆەنگريا ۆاتەرپولشىلارى 9 مارتە جەڭىمپاز اتاندى. اقش, يسپانيا جانە حورۆاتيا ءبىر-ءبىر رەتتەن ءدال سول تۇعىردان كورىندى. سەربيامەن ءبىر تۋدىڭ استىندا ونەر كورسەتكەن كەزدە چەرنوگوريا كۇمىس مەدالدى يەلەندى. اۋستراليا مەن جاپونيا وليمپيادا مەن الەم چەمپيوناتتارىندا جۇلدە الماعانىمەن, ولاردىڭ دا قازىرگى قارقىنى كۇشتى. مىنە, ۆەنگريادا وتەتىن الەمدىك ليگانىڭ سۋپەرفينالىندا قازاقستاننىڭ سۋ دوبى شەبەرلەرىنە وسىنداي مىقتىلارمەن ايقاسۋعا تۋرا كەلەدى.
عالىم سۇلەيمەن,
«ەگەمەن قازاقستان»
الماتى