تاۋەلسىزدىكپەن قۇرداس مەكتەپ

«ەگەمەن قازاقستاننىڭ» ارنايى جوباسى: جاسامپازدىق جەمىستەرى

جيىرما جىلدىڭ ىشىندە اتقارىلعان يگى ىستەردىڭ ارقاسىندا ءاربىر ءوڭىرىمىز وزگەرىپ, ءومىرىمىز جاقسارىپ كەلەدى. «ەگەمەن قازاقستان» گازەتى وسىنداي وركەندى وزگەرىستەردى بەينەلەيتىن ماتەريالداردى تۇراقتى جاريالاپ تۇرادى.   تومەندە اقتوبە وبلىسىنىڭ قاندىاعاش قالاسىنداعى №4 قازاق ورتا مەكتەبىنەن  فوتورەپورتاج بەرىلىپ وتىر. 1988 جىلى ءشيلىساي رۋدنيگىنىڭ قارجى­لان­دىرۋىمەن قازىرگى قاندىعاش قالاسىندا ىرگەتاسى قالانعان №4 قازاق ورتا مەكتەبى 1991 جىلى تامىز ايىندا پايدالانۋعا بەرىلدى. بۇعان دەيىن اۋدان ورتالىعىندا بىردە-ءبىر قازاق مەكتەبى بولماعاندىقتان بۇل تاۋەلسىزدىكتىڭ التىن كۇرەك سامالىمەن مۇمكىن بولعان جاعداي ەكەنى ايتپاسا دا تۇسىنىكتى. مۇعالجارلىقتاردىڭ تاۋەلسىز­دىك­پەن كەلگەن بۇل قۋانىشتىڭ يگىلىگىن كورگەنىنە دە تۋرا 20 جىل بولىپ وتىر. بۇل مەكتەپتىڭ تازا قازاق ورتا مەكتەبى بولىپ اشىلۋىنا اسا زور ەڭبەك سىڭىرگەن ۇستاز كامالحان قۋانوۆ بولاتىن. ول 1991-1997 وقۋ جىلدارى مەكتەپ ديرەكتورى قىز­مەتىن ابىرويمەن اتقاردى. قر  «ءبىلىم بەرۋ ءىسىنىڭ ۇزدىگى», ى.التىنسارين مەدالدارى­نىڭ يەگەرى ءوز ورتاسىندا سىيلى ىسكەر باسشى بولدى. ودان كەيىن ءار جىلدارى مەكتەپتى باسقارعان ءابدىمۇرات كورگۋلين, بەك بايبولوۆ ءبىلىم ورداسىنىڭ ماتەريالدىق-تەحني­كا­لىق بازاسىنىڭ جاقسارۋىنا, ءبىلىمدى دە بىلىكتى ۇستازدار قاۋىمىنىڭ قالىپتاسۋىنا ۇيىتقى بولدى. ءبىلىم بەرۋدىڭ وزىق ادىستەرىن ەنگىزۋدە باستاماشىلدىق كورسەتتى. ديرەكتورلىق ەستافەتاسىن ۇستاعان ەسىم­حان شىمقاەۆ تا الدىڭعى تولقىن اعا­لارى سالعان جولدى لايىقتى جالعاستى­رىپ, وعان ءوزىنىڭ ىزدەنىستى باسشىلىق, ۇيىم­داستىرۋشىلىق شەبەرلىگىمەن ۇلەس قوسىپ كەلەدى. قر «ءبىلىم بەرۋ ءىسىنىڭ ۇزدىگى» ەسىمحان ابەن ۇلى كوپ جىلعى ەڭبەگىنىڭ ناتيجەسىندە مەكتەپتىڭ 2010-2011 وقۋ جى­لىن­داعى قورىتىندى كورسەتكىشتەرىنىڭ جو­عارى بولۋىنا بايلانىستى ىبىراي التىن­سارين اتىنداعى مەدالدى يەلەندى. 1991-2006 وقۋ جىلدارى ىشىندە اتالعان باسشىلارمەن قاناتتاس تىنىمسىز ەڭبەك ەتىپ, وقۋ-تاربيە جۇمىستارىن جاندان­دىرىپ دۇرىس جولعا قويا بىلگەن, وقىتۋدىڭ جاڭاشا ءادىس-تاسىلدەرىن جەتىلدىرۋدە جاق­سى باستامالار كوتەرگەن, ۇجىمنىڭ ءبىر­اۋىز­دىلىعى مەن ۇيىمشىلدىعىن ساقتاپ, جاڭالىقتىڭ جارشىلارى بولعان وقۋ- تاربيە ىستەرى بويىنشا مەكتەپ ديرەك­تور­لارىنىڭ ورىنباسارلارى سۆەتلانا كوشەر­باەۆا, شولپان مامبەتوۆا, كۇلاش ءسۇيىن­عارينا, اقمارال ايداروۆا ەڭبەكتەرىن اسا قۇرمەتپەن اتاپ وتكەن ءجون. ولار ءادىس­تەمەلىك جۇمىستاردى, مادەني شارالاردى, تاربيە ساعاتتارى مەن سايىستاردى اشىق ساباقتار مەن سەمينارلاردى جوعارى دارە­جەدە ۇيىمداستىرۋدىڭ شەبەرلەرى بولدى. وقۋ ءىسىنىڭ ورىنباسارلارى سۆەتلانا كوشەرباەۆا مەن شولپان مامبەتوۆانىڭ جاڭاشىلدىق ءىس-تاجىريبەلەرى اۋدان, وبلىس كولەمىندە تاراتىلىپ, 1998 جىلى قر «ءبىلىم بەرۋ ءىسىنىڭ ۇزدىگى» ءتوس بەلگىسىمەن مارا­پاتتالدى. №4 قازاق ورتا مەكتەبىنىڭ ابى­رويىن اسقاقتاتۋعا اتسالىسقان ۇستازدار – قر «ءبىلىم بەرۋ ءىسىنىڭ ۇزدىگى» كۇلزادا وراز­عاليەۆا, ەڭبەك ارداگەرلەرى امانگۇل ەرقا­سىموۆا, ىلگەك قۇلتاەۆا, رايا تۋرنيازوۆا, قا­لي­ما ەسەنامانوۆا, جۇماسۇلۋ ءجۇ­سىپوۆا, ال­فيرا ناگيموۆا, بايان كوشكىم­باەۆا, دامەجان مەدەتوۆا, ءانۋزا نۇرما­عان­بەتوۆا زەينەتكەرلىك دەمالىسقا وسى مەكتەپتەن شىقتى. سول كەزدەگى جاس ماماندار گۇلمادينا وبايدۋللينا, فاريدا قو­جا­توۆا, ايسۇلۋ دوستانوۆا, فاريدا قادىر­قۇلوۆا, گۇلايىم قا­ريەۆا, رايسا حايىرليەۆا بۇگىنگى كۇنگە دەيىن جاڭاشىلدىقپەن ەڭبەك ەتىپ كەلەدى. قازىرگى تاڭدا وقۋ-تاربيە جۇمىستارىن تۇرلەندىرىپ, جان-جاقتى جەتىلدىرىپ, ساباق بەرۋدىڭ ءادىس-تاسىلدەرىن جاڭاشالاندىرۋ ۇستازدار ۇجىمىنىڭ نەگىزگى ماقساتى. 1041 بالا وقيتىن مەكتەپتە 117 مۇعالىم جۇمىس ىستەيدى. 20 مۇعالىمنىڭ جوعارى, 50-ءىنىڭ ءبىرىنشى, ال 26-سىنىڭ ەكىنشى بىلىكتىلىك ساناتى بار. سوڭعى 3 جىلدىڭ قورىتىندىسى بويىن­شا 17 ۇستاز وبلىس اكىمىنىڭ «ۇزدىك ۇستاز» مارافون-بايقاۋىنىڭ جەڭىمپازدارى بولىپ, ولاردىڭ ارقايسىسى 120 000 تەڭگە گرانت يەگەرلەرى اتاندى. مەكتەپتە لينگافوندىق, مۋلتيمەديا­لىق, كومپيۋتەرلىك, ينتەراكتيۆتى تاقتا­لى, جاڭا قۇرىلىممەن جابدىقتالعان فيزيكا, حيميا, بيولوگيا ءدارىسحانالارى بار. سونداي-اق, 2008-2009 وقۋ جىلىنان باستاپ مۇمكىندىگى شەكتەۋلى بالالارعا ارنالعان كوررەكتسيالىق سىنىپ اشىلىپ, بالالار تالاپقا ساي ءدارىسحانادا ءبىلىم الۋدا. 2010-2011 وقۋ جىلىندا 63 تۇلەكتىڭ ەكەۋى «التىن بەلگى» جانە ەكەۋى «ەرەكشە اتتەستات» يەگەرلەرى اتاندى, 9 تۇلەك گرانتپەن وقۋعا ءتۇستى. مەكتەپ ۇبت-دان ورتاشا 93,9 بالل كورسەتكىشىن, ال تاڭداۋ پاندەرى بويىن­شا 100 پايىزدى كورسەتىپ, قالالىق مەكتەپتەر اراسىندا ءبىرىنشى ورىندى يەلەندى. رەس­پۋب­ليكالىق جانە وبلىستىق پاندىك وليمپيادالاردا, سونداي-اق ونەر بايقاۋ­لارىن­دا, سپورت جارىستارىندا جەڭىمپاز بولىپ ءجۇر­گەن مەكتەپ شاكىرتتەرى جەتەرلىك. مۇنداي جوعارى كورسەتكىشكە جەتۋ ۇجىمنىڭ اۋىزبىرلىگىن, ءپان مۇعالىمدەرى مەن سىنىپ جەتەكشىلەرى گۇلايىم كاريەۆا مەن رايگۇل ماساباەۆا, سالتانات كاريبەكتىڭ ۇلكەن جاۋاپكەرشىلىكپەن جۇمىس ىستەگەنىن كورسەتتى. «اۋىلدىڭ گۇلدەنۋى – قازاقستاننىڭ گۇلدەنۋى» جاستار مارافون-ەستافەتاسىنا 350 وقۋشى قاتىستى. ناتيجەسىندە وتكەن وقۋ جىلىندا «ەڭ ۇزدىك ءبىلىم بەرۋ مەكەمەسى» دەپ تانىلىپ, مەكتەپ جەڭىل اۆتو­كولىككە يە بولدى جانە اۋدان اكىمى سەرىك شاڭعۇتوۆ­تىڭ سىيلىعى – فاكس تاپ­سى­رىلدى. مۇنىڭ بارلىعى دا مەكتەپ ۇجى­مى­نىڭ ءبىر كىسىدەي ۇيىمشىلدىعى جانە بىلىك­تىلىگىنىڭ ناتيجەسى. ارنايى بەتتى دايىنداعان «ەگەمەن قازاقستان» گازەتىنىڭ اقتوبە وبلىسى بويىنشا مەنشىكتى ءتىلشىسى ساتىبالدى ءساۋىرباي.