اقتوبە ماڭىنداعى گەورگيەۆكا قۇمدى وڭىرىندە قۇرىلىس جۇمىستارى كەزىندە عۇن داۋىرىندە جەرلەنگەن ادامنىڭ باس سۇيەگى تابىلدى.
«سول ساتتە ءبىز بۇنىڭ ناقتى نە ەكەنىن تۇسىنبەي قالدىق. باسىندا كوزگە ءجاي سۇيەك بولىپ كورىندى. كەيىن بۇل جانۋاردىڭ قالدىقتارى دەپ ويلادىق. قۇرىلىس ماشيناسى ءوز جۇمىسىن توقتاتقان ساتتە, ءبىز ادام باس سۇيەگىن الىپ شىققانىن بايقادىق. ادام سۇيەگىمەن بىرگە ونىڭ التىن اشەكەيلەرى دە تابىلدى. ءبىز تەز ارادا سول ايماقتى قورشاۋعا الىپ, 102 - گە حابارلاستىق», - دەپ ەسكە ءتۇسىردى قۇرىلىسشى باحىت دانات.
تابىلعان ادام سۇيەگى شامامەن ءبىزدىڭ زامانىمىزدىڭ II-IV عاسىرىندا جەرلەنگەن. سونىمەن قاتار, ول جەردەن جىلقى سۇيەگى دە تابىلىپ وتىر.
تاريحشىلاردىڭ ايتۋىنشا, ادامنىڭ التىن كيىمى مەن التىن اشەكەيلەرى ونىڭ عۇن ءداۋىرىنىڭ قۇرمەتتى ادامى ەكەنىن كورسەتەدى. ارينە, ناقتى دەرەكتەر تەك قانا ارنايى زەرتتەۋ جۇمىستارىنان كەيىن عانا بەلگىلى بولادى. سوندىقتان ماماندار بۇل تۋرالى ءالى ەشقانداي اقپارات بەرگەن جوق.
«بۇل ەرەكشە ادامنىڭ باس سۇيەگى. وتە قۇندى دۇنيەلەر دە تابىلدى. ازىرگە ول تۋرالى ەشقانداي دەرەك ايتا المايمىز, سەبەبى, ونىڭ اشەكەيلەرى مەن كيىمى التىن بولماۋى مۇمكىن. نەگىزىندە, عۇن داۋىرىندە ءومىر سۇرگەن ادام سۇيەگىنىڭ تابىلۋى اقتوبە وبلىسىندا ءبىرىنشى رەت بولىپ وتىرعان جاعداي»,- دەپ حابارلايدى مۇراجاي باسشىسى مەيرام دۇيسەنعالي.