ماڭعىستاۋدا وبلىسىندا اۆتوبۋس مارشرۋتتارىنىڭ ءتاريفى وزگەردى

تاسىمالداۋشىلاردان جولاقى قۇنىن كوتەرۋ جونىندەگى وتىنىشتەردىڭ تۇسۋىنە  نارىقتاعى جانار-جاعارماي باعاسىنىڭ تۇراقسىز ءوسۋى, قوسالقى بولشەكتەر مەن سەرۆيستىك قىزمەت كورسەتۋدىڭ قىمباتتاۋى, جاڭا اۆتوكولىك باعاسىنىڭ, اۆتوستانتسيالارداعى جالداۋ اقىسىنىڭ ءوسۋى جانە سونىڭ سالدارىنان تاسىمالداۋشىلاردىڭ ءجۇرىس شىعىندارىنىڭ اقتالماۋى سەبەپ بولعان.

قازاقستان رەسپۋبليكاسى كولىك جانە كوممۋنيكاتسيا ءمينيسترىنىڭ 2011 جىلعى 13 قازانداعى «تۇراقتى مارشرۋتتار بويىنشا جولاۋشىلار مەن باگاجدى تاسىمالداۋ جونىندە قىزمەت كورسەتۋگە تاريفتەر ەسەپتەۋ ادىستەمەسىن بەكىتۋ تۋرالى» № 614 بۇيرىعىنىڭ 2-تارماق 8-تارماقشاسىندا: «تۇراقتى مارشرۋتتاردا جولاۋشىلاردىڭ جول ءجۇرۋ قۇنى, ولارعا بايلانىسسىز باعا فاكتورلارى بويىنشا (وتىن جانە جاعارماي ماتەريالدارىنىڭ, اۆتوشينالاردىڭ, اككۋمۋلياتورلار مەن قوسالقى بولشەكتەر باعاسىنىڭ قىمباتتاۋى) تاسىمالداۋشىلاردىڭ ناقتى شىعىنى 10 %-دان ارتىق وزگەرگەن كەزدە تۇزەتىلەدى», ياعني جول ءجۇرۋ قۇنى قايتا قارالادى دەلىنگەن. اتالعان زاڭناماعا سايكەس جانە تاسىمالداۋشىلاردان تۇسكەن وتىنىشتەردىڭ نەگىزىندە ماڭعىستاۋ وبلىستىق جولاۋشىلار كولىگى جانە اۆتوموبيل جولدارى باسقارماسى تۇراقتى اۋدانارالىق (قالاارالىق, وبلىسىشىلىك) قاتىناستارى تاريفتەرى  جونىندەگى ارنايى كوميسسيا قۇردى.

كوميسسيا مۇشەلەرى وبلىسىشىلىك تۇراقتى جولاۋشى تاسىمالى مارشرۋتتارىنا قىزمەت كورسەتۋشى 8 تاسىمالداۋشىنىڭ جولاقى قۇنىن كوتەرۋ جونىندەگى وتىنىشتەرى مەن انىقتامالارىن, تاريف ەسەپتەرى مەن نەگىزدەمەلەرىن وتكىزىلگەن كوميسسيا وتىرىستارىندا ءتيىستى دەڭگەيدە قاراعان بولاتىن. ورتاق داۋىس بەرۋ ناتيجەسىندە كوميسسيا قۇرامىنىڭ جارتىسىنان كوپ بولىگى (75%) تۇراقتى جولاۋشى تاسىمالى مارشرۋتتارىنىڭ تاريف قۇنىن كوتەرۋدى قولداپ, ۇسىنىس بەرىپ, شەشىم شىعاردى.

تۇراقتى اۋدانارالىق (قالاارالىق, وبلىسىشىلىك) قاتىناستارى تاريفتەرى  1-قوسىمشاداعى وبلىستىق ءماسليحاتتىڭ 30.05.2018 ج. № 19/239 شەشىمىمەن كەلىسىلىپ, ماڭعىستاۋ وبلىسى اكىمدىگىنىڭ 31.05.2018 ج. №125 قاۋلىسىمەن بەكىتىلدى.

گۇلايىم شىنتەمىرقىزى,

«ەگەمەن قازاقستان»

ماڭعىستاۋ وبلىسى