...العىس ايتادى
پوليتسيا قىزمەتكەرلەرىنە ريزامىز
قاراعاندى وبلىسى, نۇرا اۋدانىنىڭ امانتاۋ اۋىلىنىڭ اۋماعىنان 2017 جىلدىڭ ءساۋىر ايىندا جايىلىمنان توعىز باس جىلقى جوعالىپ, ءىز-ءتۇسسىز كەتكەن ەدى. سول جىلدىڭ قاراشا ايىندا وسى جىلقىلار وبلىستىڭ جاڭاارقا اۋدانى, اقتۇبەك اۋىلىنان تابىلىپ, كۇدىكتى ادام ۇستالىپ, جوعالعان مالىمىز تۇگەلدەي قايتارىلدى. ىزدەستىرۋ شاراسىن تياناقتى اتقارىپ, مالىمىزدىڭ تابىلۋىنا سەبەپكەر بولعان قاراعاندى وبلىسى جاڭاارقا اۋدانىنىڭ ىشكى ىستەر ءبولىمىنىڭ پوليتسيا قىزمەتكەرلەرى – مايور مەيرام سەرىكباەۆ, ۋچاسكەلىك ينسپەكتورلارى – مايور نۇربول تۋكەنوۆ, كاپيتان جانبولات مۇزدىباەۆ, اعا سەرجانت سايان قۇلشىبەكوۆ سىندى قىزمەتكەرلەرىنە العىسىمىز شەكسىز.
بۇل اتالعان ازاماتتار ءوز قىزمەتتەرىنە اسا جاۋاپكەرشىلىكپەن قاراپ, قاراپايىم حالىققا كومەكتەرىن بار كۇشتەرىمەن كورسەتكەندەرىنە ريزامىز. اتى اتالعاندار – بىلىكتى مامان, ءوز قىزمەتتەرىنە جاۋاپكەرشىلىكپەن قارايتىن ازاماتتار ەكەندىكتەرىن كورسەتتى.
ج.تولەۋباەۆ
قاراعاندى وبلىسى, نۇرا اۋدانى
...ۇسىنىس جاسايدى
«بايشەشەك» فۋتبول ءتۋرنيرى وتكىزىلسە
كەنتاۋ قالاسى اكىمدىگىنىڭ باستاماسىمەن قالامىزدىڭ ورتالىق فۋتبول ستاديونىندا ءجاسوسپىرىم بالالار ىرىكتەپ الىنا باستادى. وسى ستاديوندا «بالالار مەن جاسوسپىرىمدەر فۋتبول مەكتەبى» اشىلىپ, ونى جوعارى ءبىلىمدى مامان ءالي نۇرىمبەتوۆ باسقاردى. مۇندا بارلىق جاعداي جاسالىنىپ, سپورت كەرەك-جاراعىمەن قامتاماسىز ەتىلگەن. وسى ستاديوندا 1958-1964 جىلدارى ناۋرىز ايىندا ءداستۇرلى تۇردە «بايشەشەك» فۋتبول ءتۋرنيرى وتكىزىلىپ, «قايرات», «شاحتەر», كەنتاۋدان «گورنياك», شىمكەنت قالاسىنان «مەتاللۋرگ» جانە باسقا وبلىستاردان كوماندالار قاتىسقان بولاتىن. ەندى وسى ءداستۇرلى فۋتبول جارىسىن قايتا ۇيىمداستىرۋدىڭ ۋاقىتى كەلگەن سياقتى. كۇن جىلىنىپ, بايشەشەك اتقان مەزگىلدە فۋتبولدىڭ دا مەرەيى ۇستەم بولارى ءسوزسىز.
اسان ساپاروۆ, كەنتاۋ قالالىق «ارداگەر» قوعامدىق بىرلەستىگىنىڭ باسشىسى
...قىنجىلىسىن جەتكىزەدى
ماعجانعا ءبىر كوشەنى قيماعانى قالاي؟
قىزىلجار ءوڭىرى ۇلتتىڭ قامىن جەگەن, حالقىنا تىرەك بولعان تۇلعالاردان كەندە ەمەس. سولاردىڭ بىرەگەيى – ماعجان جۇماباەۆ. تىرىسىندە كوپ ازاپ كورىپ, سانالى عۇمىرى قۋعىن-سۇرگىندە وتكەن اقيىق اقىننىڭ بيىل اتاپ وتىلەتىن 125 جىلدىعى قارساڭىندا تۇركسوي حالىقارالىق ۇيىمىنىڭ باستاماسىمەن «ماعجان جىلىنىڭ» اتاپ ءوتىلۋى وتە قۇپتارلىق شارا بولسا كەرەك. بىلتىر كۇزدە پەتەرفەلد اۋىلدىق وكرۋگىندە كوشە اتاۋلارىن وزگەرتۋ تۋرالى جيىن ءوتىپ, وكتيابر كوشەسىنە الاشتىڭ اسىل پەرزەنتى, بارشانىڭ سۇيىكتى اقىنى ماعجان جۇماباەۆتىڭ اتىن بەرۋ تۋرالى ۇسىنىس ايتتىم. ءۇي-ءۇيدى ارالاپ, قول جينادىم. تۇرعىندار قۋاتتاعان حاتتى اۋىلدىق وكرۋگتىڭ اكىمىنە تاپسىردىم. الايدا جۇرتشىلىقتىڭ ءوتىنىش-تىلەكتەرى اۋداندىق اكىمدىك تاراپىنان ەسكەرۋسىز قالدى. سەبەبى تۇسىندىرىلمەدى.
ەندى مىنا قىزىقتى قاراڭىز: بيىل اۋداندىق «قىزىلجار» گازەتىندە «وكتيابر» كوشەسىن – «جەڭىس», «كومينتەرن» كوشەسىن – «تسەنترالنايا» دەپ اۋىستىرۋ تۋرالى اۋىلدىق وكرۋگ شەشىمىنىڭ جوباسى باسىلدى. «اپام دا اڭ-تاڭ, مەن دە اڭ-تاڭ» دەمەكشى, كوزىمىزگە سەنەر-سەنبەسىمىزدى بىلمەدىك. دەموكراتيالىق ءوسىپ-وركەندەۋ جولىنا قادام باسقان ەلدىڭ قيان شەتىندە كوپشىلىكتىڭ تاڭداۋىن بۇرمالاعان وسىنداي سوراقىلىقتاردىڭ ورىن الۋىن اقىن ارۋاعىن سىيلاماۋ, قورلاۋ دەپ سانايمىن. تاۋەلسىزدىك العانىمىزعا شيرەك عاسىردان اسسا دا, كەڭەس وداعى كەزىندەگى اتاۋلارعا جابىسىپ, ەسكىنىڭ سارقىنشاعىنان ايىرىلعىسى كەلمەي جۇرگەن شەنەۋنىكتەردىڭ بۇل ارەكەتى ەش اقىلعا سىيمايدى. تاعدىرى ايانىشتى, اياۋلى اقىنىمىز ماعجان جۇماباەۆقا ءبىر كوشەنىڭ اتىن قيماعاندارى قالاي؟! «تسەنترالنايا», «يۋجنايا», «نيجنيايا», «ۆەرحنيايا» سەكىلدى ماعىناسى تۇسىنىكسىز اتاۋلار مۇرتى قيسايماستان سول قالپى تۇر. تۇركى جۇرتى «پوەزيا پايعامبارى» رەتىندە ءپىر تۇتاتىن اقىننىڭ ەسىمى ەلەۋسىز قالماۋى ءتيىس.
ساعات قۋاندىقوۆ
سولتۇستىك قازاقستان وبلىسى, قىزىلجار اۋدانى, پەتەرفەلد اۋىلى
...ۇلگى تۇتادى
جاستار زياتكەرلىك ويىنداردان سىنعا ءتۇستى
ماڭعىستاۋ تەحنيكالىق كوللەدجىندە «ماڭعىستاۋ اۋداندىق جاستار رەسۋرستىق ورتالىعى» كوممۋنالدىق مەملەكەتتىك مەكەمەسىنىڭ ۇيىمداستىرۋىمەن, كوللەدج اكىمشىلىگىنىڭ قولداۋىمەن «نە؟ قايدا؟ قاشان؟» اتتى زياتكەرلىك ويىندارىنان جارىس وتكەن بولاتىن.
ءىس-شارانىڭ باستى ماقساتى – «رۋحاني جاڭعىرۋ» باعدارلاماسىنىڭ ماڭىزدىلىعىن ويىنشىلارعا ءتۇسىندىرۋ, جاستارعا قازاقستاندىق ءپاتريوتيزمدى ناسيحاتتاۋ, جاستار مەن ويىنشىلاردىڭ كوشباسشىلىق بەينەسىن قالىپتاستىرۋ.
ويىن ءۇش بولىمنەن تۇردى. ولار ء«بىلىم بيىگى», «دارىندىلىق», «بەينەسۇراق» دەپ اتالدى. ويىنشىلار مىندەتى تەك كوشباسشىلىق قاسيەتىن كورسەتىپ قانا قويماي, كوماندالىق جۇمىسىن كورسەتۋ ەدى. ءبارى دە ويداعىداي ۇيىمداستىرىلدى. بىرنەشە ساعاتقا سوزىلعان ويىندا جاس مامانداردىڭ ەڭ كوپ سۇراققا جاۋاپ بەرگەن «جۇيرىكتەر» كومانداسى جەڭىمپاز اتانسا, «بىلگىرلەر» كومانداسى ەكىنشى, ال «العىرلار» كومانداسى ءۇشىنشى ورىندى مىسە تۇتتى.
اينۇر اليەۆا, اۋداندىق جاستار ورتالىعىنىڭ مامانى
ماڭعىستاۋ وبلىسى
...وي بولىسەدى
قىز مىنەزدى ۇلدار كوبەيىپ بارادى
قازىرگى كەزدە مەكتەپ جاسىنداعى ەر بالالاردىڭ اراسىندا مىنەز-ق ۇلىقتارى مەن ءىس-قيمىلدارى قىزعا ۇقسايتىن جاس جەتكىنشەكتەر كوبەيىپ بارادى. ءوز باسىم مۇنداي كورىنىستەر مەكتەپتەردە تەك بىرىڭعاي ايەل ۇستازدار جۇمىس ىستەگەنىنىڭ سالدارى دەپ ەسەپتەيمىن. ءتىپتى بالاباقشادا دا ەركەك كىندىكتى بالدىرعانداردى ايەل ادامدار تاربيەلەيدى. مەكتەپتە تاعى دا سولاي. ونى ايتاسىز, ورتا ارناۋلى جانە جوعارى وقۋ ورىندارىندا دا نەگىزىنەن نازىك جاندىلار ساباق بەرەدى.
ونەبويى ايەل زاتىنىڭ اينالاسىنان شىعا الماعان ەر بالانىڭ كەيىن ناعىز ازامات بولىپ قالىپتاسىپ كەتۋى وڭايعا تۇسپەيدى. بىرىنشىدەن, ولاردىڭ بويىندا تەز ءارى ناقتى شەشىمدەر قابىلداي ءبىلۋ قاسيەتتەرى كەمشىن تۇسەدى. ەر-ازاماتقا ءتان ءبىتىم-بولمىس بولۋى ءۇشىن ەڭ الدىمەن مەكتەپتەردە ەر مۇعالىمدەردىڭ قاتارىن كوبەيتۋ كەرەك دەگەن ويدامىن. بۇل ۇلداردىڭ بويىندا ەرمىنەزدىلىكتىڭ قالىپتاسۋىنا اسەر ەتەرى كامىل.
تاعى ءبىر ايتارىم, قازىرگى كەزدە پەداگوگيكا تەك بىرىڭعاي ايەلدەر قىزمەت جاسايتىن ماماندىققا اينالىپ بارا جاتقانداي كورىنەدى. مۇمكىن مۇنداي جاعدايدا ارنايى باعدارلاما قابىلداپ, مۇعالىمدەر دايىندايتىن ارناۋلى جانە جوعارى وقۋ ورىندارىندا ەر بالالارعا بولىنەتىن كۆوتانى كوبەيتۋ كەرەك شىعار. سونىمەن بىرگە ولاردىڭ ەڭبەكاقى مولشەرىن ءوسىرۋ جونىندە دە جاڭاشا كوزقاراس قاجەت.
كوشكىنباي احمەتوۆ, ەڭبەك ارداگەرى
اقتوبە