پرەمەر-مينيستر كۇن تارتىبىنە كىرىسپەستەن بۇرىن دەنساۋلىق ساقتاۋ ءمينيسترى ەلجان ءبىرتانوۆتىڭ مەنينگوكوكك ينفەكتسياسىنىڭ تارالۋى تۋرالى ەسەبىن تىڭدادى.
"ەلجان امانتاي ۇلى, بۇل ماسەلە راسىندا دا حالىق اراسىندا الاڭداۋشىلىق تۋعىزىپ وتىر. سول سەبەپتى, جاي عانا ايتىپ وتكەن از, اقپاراتتىق-تۇسىندىرمە جۇمىستارىن جانداندىرۋ قاجەت. الەۋمەتتىك جەلىدە كوپ تالقىعا ءتۇسىپ جاتىر. سىزدەر ايتقان مالىمدەمەلەر بىرىنە جەتسە, بىرىنە جەتپەيدى. ەگەر شتاب قۇرساڭىز, شتاب جۇمىسى جاريا تۇردە جۇرگىزىلۋى كەرەك. ءار وبلىستا اتقارىلىپ جاتقان جۇمىستاردى, ءاربىر بولعان جاعدايدى ءتۇسىندىرۋ كەرەك", دەدى باقىتجان ساعىنتاەۆ.
سونىمەن بىرگە, پرەمەر-مينيستر ۆاكتسينانى ەگۋ نەمەسە ەكپەۋ سۇراقتارىنىڭ تۋىنداپ وتىرعانىن باسا ايتتى.
"كەشە ۇلكەن كاسىپورىننىڭ باسشىسى كەلدى, "جۇمىسشىلارىمنىڭ اراسىندا الاڭداۋشىلىق باستالدى, ولارعا ەگۋ جۇمىسىن جۇرگىزەيىن بە, جۇرگىزبەيىن بە؟" دەپ سۇرادى. ونى ايتىپ, ءتۇسىندىرىپ جاتقان ەشكىم جوق. ۆاكتسينانى ءوز ەركىمەن الۋ, ەگۋ ماسەلەسى دە حالىق اراسىندا كۇننەن-كۇنگە كوتەرىلىپ كەلە جاتىر. باعاسى وتە قىمبات. ءبىر وبلىستا 40 مىڭ, ءبىر وبلىستا 20 مىڭ تۇرادى. وسىنداي جاعداي بوپ جاتقاندا مينيسترلىكتەر, قۇرمەتتى اكىم مىرزالار, سىزدەر دە باقىلاۋعا الىپ, كەرەگىنشە كومەك كورسەتىپ, باعاسىن ءتۇسىرۋ كەرەك. دۇرلىگۋگە جول بەرمەۋ كەرەك", - دەدى ساعىنتاەۆ.
ول اۋرۋحانالاردىڭ كەلۋشىلەردى وبلىسقا قاراستى, قالاعا قاراستى دەپ قابىلدامايتىنىن دا ەسكە سالدى.
"مۇنداي ماسەلەلەردى جىلدام شەشۋ كەرەك قوي, ەلجان امانتاي ۇلى. كەشە وقىپ وتىرمىز, تالعاردان قاسكەلەنگە دەيىن ەكى ساعات. ال اناسى بالاسىن ءۇش ساعاتتا جوعالتتىم دەپ وتىر. تالعاردان قاسكەلەنگە جەتكەنشە قاي زامان؟ نەگە وسىنداي ماسەلەلەردى جەدەل تۇردە بۇيرىقتارىڭىزدى بەرىپ, شەشىم شىعارمايسىزدار؟ اكىمدەردىڭ شەشىمى بولسا, اكىمدەرگە ايتۋ كەرەك, مۇنداي جاعدايلاردا بارلىق اۋرۋحاناعا تاپسىرما بەرسىن, وسى ينفەكتسيامەن كەلگەن ناۋقاستىڭ ءبارىن بىردەن قابىلداسىن. بۇل جونىنەن كەمشىلىكتەر بار. بۇگىن جولعا شىقساڭىز, ءبارىن ءوز كوزىڭىزبەن كورىپ, قاجەتتى شەشىمدەردى قابىلداپ, حالىققا ءتۇسىندىرۋ جۇمىستارىن جۇرگىزىڭىز", دەپ ءوز ءسوزىن تۇيىندەدى پرەمەر-مينيستر.