«بۇل كوممەرتسيالىق ۆاكتسينا جانە ول ۇلكەن جانە كىشى قاجىلىققا باراتىندارعا ارنالعان ەدى. 4600 دوزا اكەلىنىپ, 22 500 تەڭگەدەن ساتىلعان. الايدا, قاجىلىق تامىز ايىندا وتەتىن بولعاندىقتان بۇل ۆاكتسينا نارىققا شىعارىلدى», دەدى جانداربەك بەكشين ورتالىق كوممۋنيكاتسيالار قىزمەتىندەگى بريفينگتەن كەيىن اگەنتتىك ءتىلشىسىنىڭ ساۋالىنا وراي.
ونىڭ ايتۋىنشا, قازىر تاعى دا ۆاكتسينا جەتكىزىلىپ, ولار دەنساۋلىق ساقتاۋ باسقارمالارى ارقىلى قالالىق ەمحانالارعا جەتكىزىلەتىن بولادى.
«ولاردا ەكپە جاسايتىن كابينەتتەر بولعاندىقتان شىعىنداردى قىسقارتۋعا مۇمكىندىك بار. ياعني, شپريتس پەن ماقتا شىعىنى قوسىلىپ, ۇستەمە باعاسى ازايادى. ءبىرىنشى پارتيانى جەكە ۇيىمدار ساتىپ العاننان جانە ولار تاپشىلىقتى پايدالانىپ باعانى وزدەرى قويىپ وتىر. ال ۆاكتسينانىڭ وزىندىك قۇنى 17500 تەڭگەنى قۇرايدى», - دەدى باس سانيتار دارىگەر.
بۇگىن ۇكىمەت وتىرىسىندا پرەمەر-مينيستر باقىتجان ساعىنتاەۆ دەنساۋلىق ساقتاۋ مينيسترلىگىنە مەنينگوكوككە قارسى ۆاكتسينا باعاسىن تومەندەتۋدى تاپسىرعان بولاتىن.
ايتا كەتەيىك, جىل باسىنان بەرى قازاقستاندا مەنينگيت ينفەكتسياسىمەن 58 ناۋقاس تىركەلدى. ولاردىڭ 18-ءى 14 جاسقا دەيىنگى بالالار. دەرتتەن 13 ادام كوز جۇمدى, سونىڭ ىشىندە بەسەۋى 14 جاسقا دەيىنگى جەتكىنشەكتەر ەكەندىگىن بەلگىلى.