يسپانيانىڭ استاناسى – مادريدتە وتكەن ەۋروپانىڭ اشىق كۋبوگىندا قازاقستاننىڭ بىرنەشە دزيۋدوشىسى باق سىناعانىمەن, سولاردىڭ اراسىنان تەك بىرەۋىنە عانا قولا مەدال بۇيىردى. بۇل جۇلدەنىڭ يەگەرى – وتگونتسەتسەگ گالبادراح.
اسا جەڭىل سالماقتا بەلدەسەتىن وتگونتسەتسەگ جاراقاتىنا بايلانىستى ەم-دوم قابىلداپ, ءبىراز ۋاقىت بوز كىلەمنەن كورىنبەگەن ەدى. سوعان قاراماستان ول پيرەنەي تۇبەگىندە وتكەن جارىستا ءوزىن جاقسى قىرىنان كورسەتتى. العاشقى ەكى بەلدەسۋدە يسپانيا مەن يزرايل وكىلدەرىن ۇتقان وليمپيا ويىندارىنىڭ قولا جۇلدەگەرى جارتىلاي فينالدا جەرگىلىكتى بالۋان لاۋرا مارتينەسكە ەسە جىبەردى. ال قولا مەدال ءۇشىن وتكەن باسەكەدە گالبادراح بەلگيانىڭ بەتكە ۇستارى سوفيا اننا جۋرانى جەڭدى. ال وسى تۋرنيردە ونەر كورسەتكەن وزگە قىزدارىمىز العاشقى ءبىر-ەكى اينالىمنان اسا العان جوق.
ەرلەر باسەكەسىندە ەكى ورەنىمىز عانا تاتاميگە شىقتى. الايدا ەكەۋى دە ەل ءۇمىتىن اقتاي المادى. 60 كيلو سالماقتاعى رامازان ماماەۆ باستاپقىدا يتاليا مەن يزرايل وكىلدەرىنەن ايلاسىن اسىرعانىمەن, ءۇشىنشى كەزەڭدە فرانتسيالىق لۋكا ماكەنزەگە جول بەردى. جۇبانىش باسەكەسىندە قانداسىمىز فرانتسيانىڭ تاعى ءبىر دزيۋدوشىسى ۆينسەنت مانكۆيتسكە ەسە جىبەردى. 66 كيلو سالماق دارەجەسىندە بەلدەسكەن سۇڭعات جۇباتقان تۇساۋكەسەر كەزدەسۋىندە يسپانيالىق سالۆادور روكادان ۇتىلدى.
عالىم سۇلەيمەن, «ەگەمەن قازاقستان»