فرانتسيادا ءوتىپ جاتقان «ۇلكەن دۋلىعا» ساناتىنا ەنەتىن فرانتسيا اشىق چەمپيوناتى, ياعني «رولان گارروس» تۋرنيرىنە قازاقستاندىق تەننيسشى يۋليا پۋتينتسەۆا شيرەك فينالعا جولداما الدى.
فرانتسيا اشىق چەمپيوناتىنا پۋتينتسەۆادان بولەك, قازاقستان قۇراماسىنان ميحايل كۋكۋشكين, الەكساندر نەدوۆەسوۆ, الەكساندر بۋبليك جانە زارينا دياس ءوز باقتارىن سىناۋ ءۇشىن فرانتسيا كورتىنا شىققان بولاتىن. الايدا اتالعان تەننيسشىلەرىمىزدىڭ جولى بولماي, قارسىلاستارىنان جەڭىلىپ قالادى. قازاقستاندىق تەننيسشىلەردەن تەك يۋليا پۋتينتسەۆا عانا جارىستى ءارى قاراي جالعاستىرۋعا مۇمكىندىك الدى.
جەكسەنبى كۇنگى جارىس كۇنىندە پۋتينتسەۆا (الەمنىڭ 98-راكەتكاسى) جۇلدە قورى 38 ميلليون ەۋرونى قۇرايتىن جارىستىڭ ءتورتىنشى اينالىمىنا شىعىپ, «رولان گارروس» تۋرنيرىندەگى ءوزىنىڭ ۇزدىك ناتيجەسىن قايتالادى. ءبىر جارىم ساعاتقا جالعاسقان ءۇشىنشى اينالىمدا چەحيالىق باربورا سترىتسوۆانى (الەمنىڭ 26-راكەتكاسى) جەڭدى. بۇل كەزدەسۋدە يۋليا قارسىلاسىنا قاراعاندا ساۋاتتى ويىن كورسەتىپ, جەڭىسكە ابدەن لايىق ەكەنىن كورسەتتى. كەزدەسۋدىڭ ءبىرىنشى سەتىندە وتانداسىمىز 6:4, ەكىنشى سەتتە 6:3 ەسەبىمەن ەش قيىندىقسىز باسىم ءتۇستى. بۇل ەكى تەننيسشىنىڭ ءوزارا ءۇشىنشى رەت كەزدەسۋى. بۇعان دەيىن يۋليا پۋتينتسەۆا پەن باربورا سترىتسوۆا ەكى رەت كەزدەسىپ, چەحيالىقتىڭ جەڭىسىمەن اياقتالعان-دى.
يۋليا پۋتينتسەۆا ماتچتان كەيىن ويىن تۋرالى ءوز پىكىرىن ايتتى. «نەگە ەكەنى بەلگىسىز, ايتەۋىر پاريجدە ۇنەمى جولىم بولعىش. سونداي-اق ماعان بۇل قالا قوسىمشا كۇش بەرەدى. بىرنەشە تۋرنيردە جىلدامدىعىم جەتىسپەي جەڭىلىپ قالىپ جاتاتىنمىن. وسى جولعى تۋرنيرگە فيزيكالىق مۇمكىندىگىمدى ارتتىرىپ, تىڭعىلىقتى دايىندىقپەن كەلدىم», دەيدى ول.
ءبىر قىزىعى, يۋليا پۋتينتسەۆا شيرەك فينالعا دەيىن «رولاند گارروس» تۋرنيرىندە وزىنەن رەيتينگى جوعارى تەننيسشىلەردى قوعاداي جاپىرىپ كەلەدى. مىسالى, الدىمەن الەمنىڭ 10-راكەتكاسى اعىلشىن دجواننا كونتانى, كەيىن امەريكالىق برەدي (86), قىتايلىق ۆان تسياندى (85) ۇتتى. ءتورتىنشى اينالىمدا چەح باربورا سترىتسوۆادان (26) ەكى سەتتە باسىم ءتۇستى. ءتىپتى پۋتينتسەۆنىڭ شيرەك فينالداعى قارسىلاسى دا رەيتينگ جاعىنان جوعارى تۇر. امەريكالىق تەننيسشى مەديسون كيز الەمنىڭ 16-راكەتاسى سانالادى. سونىمەن قاتار ول 2017 جىلعى US Open ءتۋرنيرىنىڭ فينالىنا دەيىن جەتكەن.
ايتا كەتەيىك, وسى جارىستىڭ شيرەك فينالىنا شىققانى ءۇشىن وتانداسىمىز دا رەيتينگتەگى جاعدايىن ءبىرشاما جاقسارتىپ الدى. ەگەر, يۋليا پۋتينتسەۆا كيزدى جەڭەتىن بولسا, توپ-50 تەننيسشىنىڭ قاتارىنا كىرەدى. فرانتسيا اشىق چەمپيوناتى 10 ماۋسىمدا اياقتالادى.
ءالي بيتورە, «ەگەمەن قازاقستان»