بۇعاناسى قاتپاعان بالالاردى قانشا مىقتى بولسا دا ونداي جارىسقا قوسپايمىن. الدىمەن جاس شامالارىنا قارايمىن, مەنى قارسىلاستاردىڭ الەم چەمپيونى دەگەن اتاقتارى قورقىتپايدى.
ليفت ىشىندە تورتەۋمىز. ەرمەكتىڭ جۇزىنە بارلاي قارادىم. سابىرلى. قاننەن-قاپەرسىز تۇرعانداي... باسىنا تۇتقيىلدان قاۋىپ تونسە, ونىڭ تابان استىندا كۇللى دەنەسىمەن ادام تانىماستاي جيىرىلىپ وزگەرۋى لەزدە-اۋ دەپ تاڭدانا ءتۇستىم. ىسكە بىلەك, شىنتاق, ساۋساق كىرىسەدى... ءبىر سوزبەن ايتقاندا, مەيبۋكان-گودزيۋ-ريۋ كاراتەشىلەر قاس-قاعىم ساتتە, اينالۋعا مۇرشا بەرمەيتىن قۋىقتاي قۇجىرانىڭ ىشىندە ەڭ قاتەرلى دەگەن قارسىلاسىن تۇقىرتا الادى. «ليفت ىشىندە» تارماعى مەيبۋكانشىلار جارعىسىندا جازىلعان, گودزيۋ-ءريۋدىڭ وزگە جاۋىنگەرلىك ۇرىستاردان ءىس-قيمىل ەرەكشەلىگى دە وسىندا. بۇل جىگىتتەردىڭ ساۋساقتارى سۋىق قارۋ سانالادى. تاسەمەن بوپ بىتكەن اياق-قولدىڭ سپورت زالداعى كوز ىلەسپەس جىلدامدىقپەن سەرمەلگەنىن كورسەڭىز... وسى ەرمەك اباقوۆ ەدى مەنى سەنسەي نۇرلان كەرىمباەۆپەن تانىستىرعان. «سەنسەي» – جاپون تىلىنەن اۋدارعاندا جاسى ۇلكەن ادامعا, ۇستازعا, تالىمگەرگە ايتىلاتىن ءسوز. ءبىزدىڭ ءسوز قولدانىسىمىزدا كوپ پايدالاناتىن «اعا» سوزىنە جاقىندىعى دا جوق ەمەس. نۇرلان – قازاقستان مەيبۋكان گود-زيۋ كاراتە-دو فەدەراتسياسىنىڭ پرەزيدەنتى. ال ەرمەك – ۆيتسە-پرەزيدەنت. جاتتىعۋدا تەك قانا «اعا» سويلەيدى. «اعانىڭ» ايتقانى تالقىلانبايدى. سۇحباتتاسۋدا دا سولاي ەكەن. اڭگىمەنى نۇرلان كەرىمباەۆ باستادى.
– كاراتەنىڭ وتانى – وكيناۆا ارالى. وندا 1865 جىلعا دەيىن رەكيۋ يمپەراتورلىعى سالتانات قۇرعان. جاپونياعا كۇشتەپ قوسىلعاننىڭ وزىندە, وكيناۆالىقتار 1921 جىلعا دەيىن كاراتەنى سىرت كوزدەن تاسا, قۇپيا ۇستاعان. قورلىق كورسەتىپ, دۇنيەلەرىن تارتىپ العان سامۋرايلاردى قولمەن ۇرىپ, ءولتىرىپ قويادى ەكەن. ولاردىڭ ساۋساقتارى سۋىق قارۋ سانالعان, سوندىقتان قارۋ الىپ جۇرۋگە رۇقسات ەتىلمەگەن. جاپون يمپەراتورى العاش رەت بۇل ولكەگە ات باسىن بۇرعاندا ارالدا كاراتەنىڭ گويشە-ريۋ, گودزيۋ-ريۋ, شورەن-ريۋ, شيتا-ريۋ اتتى ءتورت مەكتەبى جۇمىس ىستەيتىن. وكيناۆا مەكتەبى تۇلەكتەرىنىڭ ويىن-ونەرىن تاماشالاعان يمپەراتور توكيودان مەكتەپ اشۋدى تالاپ ەتەدى. مەكتەپتەردىڭ باسشىسى تەدزيۋن مياگي توكيونىڭ الىستىعىن سىلتاۋ ەتىپ, ءبىرىنشى مەكتەپتى وساكادان اشادى.
– اڭگىمەڭىزدى تىڭداۋشىنى قىزىقتىرىپ باستايدى ەكەنسىز. ءسىزدىڭ تاريحقا تەرەڭدەپ ۇڭىلۋىڭىزدە ءبىر سىر بار-اۋ...
– مەن جاپونيادا جەتى رەت بولدىم... اسىرەسە كاميكادزەلەر ەڭ كوپ تۋعان وكيناۆادان العان اسەرىم ولشەۋسىز. ولار يمپەراتورعا ادالدىعىن كورسەتۋ ءۇشىن سونداي ارەكەتكە بارعان. بالىق قۇساپ قىرىلىپ قالعان ەل. جانىن اياماي سوعىسقان ەركەكتەرى ايەلدەرىنە «امەريكالىقتاردان جاقسىلىق كۇتپەڭدەر!» دەگەن ۋاعىز ايتقان. سودان قىز-كەلىنشەكتەرى جاۋدىڭ قولىنا تۇسكەندى قورلىق ساناپ, بيىك جاردان قۇلاپ ولە بەرگەن. «قىز قۇلاعان جار» دەگەن جەرگە مەنى ۇستازدارىم سان رەت ەرتىپ باردى. قاراپ تۇرىپ وجەتتىك ساباعىنان ءدارىس العانداي بولاسىڭ. الگى تەدزيۋن مياگي عوي گودزيۋ-ءريۋدىڭ نەگىزىن قالاعان. ۇرىپ-تەبۋ – گو (قاتتى), كوز شۇقۋ, قول قايىرۋ, لاقتىرۋ – دزيۋ (جۇمساق). ءبىر سوزبەن قاتتى مەن جۇمساقتىڭ قوسىلۋى دەگەن ماعىنانى بىلدىرەدى. 30-شى جىلدارى گودزيۋ-ريۋ العاش پاتەنت الادى. سوعىستان كەيىن تەدزيۋن مياگي بويتۇمارداي بولعان قارا بەلبەۋدى شاكىرتى مەيتاتسۋ ياگيعا تاپسىرادى...
– ساۋساقتارى سۋىق قارۋ سانالاتىن مەيبۋكاندى تاڭداۋىڭىزعا جوعارىداعى تاريحي وقيعالار سەبەپشى ەكەن دە...
– 1990 جىلى قازاقستانعا حاري دە سپا ەسىمدى 6 دانى بار گوللانديالىق شاقىرىلىپ, بىزدە تۇڭعىش كاراتە مەكتەبى اشىلدى. سودان كسرو تارار الدىندا الماتىعا اتاقتى موريو حيگاوننا كەلىپ, گودزيۋ-ريۋدەن وداقتىق العاشقى چەمپيونات وتكىزدى. ول 1991 جىلى كۇزدە وكيناۆاداعى دۇنيەجۇزىلىك جارىسقا ۇلاستى. كۇنشىعىس ەلىنە جولدىڭ اشىلعانى دا سول جىلدار. وكيناۆادا ۇستازدار كوپ ەكەن. قايسىسىن تاڭدارىمىزدى بىلمەدىك... بۇرىن مەيبۋكاندا تەك قانا ادام سۇلباسىنداعى بەلگىلى نۇكتەلەر ارقىلى وقىستان ۇرىپ-سوعۋ, قارسىلاسىن سۇلاتىپ سالۋ, ءولتىرۋ بولسا, قازىر ونىڭ وزگەشە باعىتپەن دامىعانىن تۇسىندىك. جاپونياعا العاشقى ساپارىم ەسىمدە, موريو حيگاوننانىڭ جاتتىعۋ زالىنا باردىق. ادام كوپ. زال تار. كوپتىڭ ءبىرى بولىپ جۇردىك. ءۇش جىل ۇيرەندىم. مەنتاليتەتى, كىرىپ-شىعۋى, ءجۇرىس-تۇرىسى مۇلدەم باسقا. تىزەرلەپ وتىرادى. بەت الدى ءسوز ايتۋ جوق. ۇلكەن كىسىگە قۇرمەتى ەرەكشە. الدىنان قيا باسپاۋ دەگەن بىزدە دە بار عوي. مەنىڭ ول ورتاعا تەز بەيىمدەلۋىمە ەلدەگى ۇقساس ادەت-عۇرىپ اسەر ەتتى.
الماتىعا ورالعان بويدا ينتەرنەت ارقىلى جوعارىدا ايتقان مەيتاتسۋ ياگيدىڭ دەرەگىن تاپتىم. قۋانىشىمدا شەك جوق. سەنسەيدىڭ وزىمەن سكايپ ارقىلى سويلەستىم. جاسى 80-90-نان اسقان جاپون اقساقالدارى-ۇستازدار اعىلشىن ءتىلىن بىلمەيدى. وكيناۆا ارالى تۇرعىندارىنىڭ ءوزى ەسكى ديالەكتىمەن سويلەيدى ەكەن. امالىن تاۋىپ تىلدەستىك. مەنىڭ ءىنىم اعىلشىنشا, كەلىنىم جاپونشا سويلەيدى. ارمانداي بولعان بەيتانىس ۇستازعا سىرىمدى اشتىم: «مەيبۋكاننان جەكەشە وتاۋ قۇرىپ, باعىمىزدى سىناپ كورەيىك دەگەن ويىم بار, شاكىرتىم جەتەرلىك, حيگاوننانىڭ زالى تار, كىسى كوپ...» دەگەندى دە ايتىپ سالدىم. ءتۇسىندى. «ساعان بىردەن جەكەمەنشىك مەكتەپ اشا المايمىن, الدىمەن كەل كورەيىك, كىم ەكەنىڭدى» دەدى. سودان نە كەرەك, ون بالانى الىپ, قولى اشىق ءبىر اعامىزدىڭ دەمەۋشىلىگىمەن وكيناۆاعا ۇشتىق تا كەتتىك. بۇل 2011 جىلدىڭ 1 تامىزى ەدى. وكيناۆانىڭ ناحا دەگەن باس قالاسىندا ءبىر اي جاتتىقتىق. مەيتاتسۋ ياگيدىڭ اتاسى 2003 جىلى 93 جاسىندا دۇنيەدەن وزعان كىسى. جاپون يمپەراتورىنىڭ قولىنان «اتى اڭىزعا اينالعان ادام» دەگەن ەلدەگى ەڭ مارتەبەلى وردەندى العان. ياگيلەر اۋلەتىمەن وسىلاي تابىستىق...
– «كورمەگەن جەردىڭ وي-شۇقىرى كوپ دەگەندەي», ءتىل تابىسۋ, وزگە ەل داستۇرىنە بەيىمدەلۋ وڭاي بولماعان شىعار؟
– ءبىر قىزىق ايتايىن... بىردە مەنىڭ ءۇش شاكىرتىمدى ياگي ۇستاز ۇيىنە الىپ كىردى. اۋدارماشىمىز اعىلشىن ءتىلدى كانادالىق قىز ەدى, بىرگە كىردى. كەيىن ايتقانى: «وسى مەكتەپتە 5 جىلدان بەرى اۋدارماشىلىق قىزمەت ەتەمىن, ۇستازدىڭ ۇيىنە ءبىرىنشى رەت باس سۇقتىم». جاپون ءداستۇرى قىزىق. قوناقتى دالادا كۇتەدى. ءبىز بارعاندا شاپانىمىزدى ۇمىتپاي, وعان قوسا ءار شاكىرت ءوز اتىنان ۇستازعا ءبىر-ءبىر كادەسىي الىپ بارعانبىز. ەندى قىزىق بولعاندا ۇستازىمىز ءار بالاعا, جەكە-جەكە كادەسىي جاسادى. ات-تونىمىزدى الا قاشساق, قويمادى. ول ول ما, تاماقتى مەيرامحانادان ىشەمىز. بىردە «ۇستاز, مەنىڭ ەسەپتەۋىمشە ءسىزدىڭ بۇگىنگە دەيىن بەرگەن ءدارىسىڭىز تولەنگەن قاراجاتتان اسىپ كەتتى, مەيرامحانا بىزگە, ءتىپتى, ارتىق» دەسەم, «جوق, سەندەر قوناقسىڭدار» دەپ ءبىرىمىزدى قالدىرماي مەيرامحاناعا اپارادى. بوتەن جۇرتتى ۇيىنە دە كىرگىزبەيتىن حالىقتىڭ بىرەگەي وكىلىنىڭ – اتى اڭىزعا اينالعان مەيبۋكان شەبەرىنىڭ بۇل ارەكەتى ءبىزدى تاڭعالدىردى. مەنىڭ بالالارىمنىڭ سىرى وزىمە ءمالىم. امەريكاعا, ۇندىستانعا, ەۋروپاعا بارساق الدىمەن تاڭسىق تاماعىن, اششى-تۇششىسىن كوپ بولسا ءۇش كۇن جەيدى دە, تىجىرىنادى. سودان ۇيدەن ءۇيىپ-توگىپ اپارعان قازىنىڭ ءبىر ءتىلىمىن كەسىپ بەرسەم, نانعا قوسىپ قاسقىرشا قارپيدى. بىراق سولاردىڭ ەشقايسىسى دا 74 جاستاعى سەنسەي مەيتاتسۋ ياگيدىڭ مەيرامحاناسىنىڭ ءدامى مەن قوناقجايلىعىن ءالى ۇمىتا الماي ءجۇر.
– ءسىز اتتاي قالاپ العان مەيبۋكاننىڭ قازاقستانداعى قازىرگى جاي-كۇيى قالاي؟
– مەيبۋكاندى قازاقستاندا مەن باسقاشا جولمەن دامىتتىم. شاكىرتتەرىم نەگىزگى ءتاسىل-ايلاسى بويىنشا اسكەري سامبوعا, قويان-قولتىق ۇرىسقا, جيۋ-جيتسيعا, ارالاس جەكپە-جەككە وزدەرىن باتىل قارسى قويا الاتىن دارەجەگە جەتتى. «مىناۋ قانداي كاراتە؟» دەپ تاڭدانعاندار كوپ. كورەيلەردىڭ كاراتەسىن مىسىمىزبەن-اق باسىپ تاستايمىز. وعان وڭاي جولمەن جەتكەنىمىز جوق, ارينە, ءاۋ باستا قارسىلاستارىمىزدى لاقتىرايىق دەسەك, ءبىزدى لاقتىرىپ جىبەرەدى, ۇرايىق دەسەك الدىمىزدى الادى, تىرپ ەتكىزبەدى. كاراتەنىڭ تاريحىنىڭ ءوزى دە سولاي باستالعان. جانىن امان الىپ قالۋ ءۇشىن جاپوندار بارلىق امال جاساعان عوي! ەكىنشى دۇنيەجۇزىلىك سوعىستان كەيىن كاراتە اقش-تاعى دامۋ بارىسىندا «...كوزدەن شۇقيدى, بۇتتان تەبەدى, ساۋساق سىندىرادى, قۇلاققا ۇرادى...» دەپ امال-تاسىلدەردى قىسقارتىپ, بارىنان جۇرداي ەتكەن. اللا تاعالامنىڭ بىزگە بەرگەن ءبىر ءىلتيپاتى شىعار, وكيناۆادا مەيبۋكاننىڭ تازا تۇرىندەگى, ساف كۇيىندەگى ساباقتارىنان ءدارىس الدىق. الىپپەسىن ۇيرەندىك. سوعىستان سوڭ امەريكالىق بازالار وكيناۆادا قونىستانعاندا اسكەريلەر جاپپاي كاراتە گودزيۋ-ءريۋدى ۇيرەنەدى. ودان اقش-قا تاراتادى. اسكەري جەكپە-جەكتىڭ اقش ارمياسىندا وتە جاقسى دامۋىنىڭ نەگىزى سودان. امەريكالىقتار ءالى كۇنگە دەيىن وكيناۆالىق ۇستازداردىڭ قىر سوڭىنان قالمايدى. ول ءۇشىن قاراجاتىن ايامايدى, بىلەسىز بە؟ بارلىعى 6 جىلدىڭ ىشىندە قازاقستان بويىنشا ون وبلىستان ءوز مەكتەبىمدى اشتىم. سوڭعى ءتورت جىل بويى مەيبۋكان گودزيۋ-ريۋدەن قازاقستان چەمپيوناتىن وتكىزىپ ءجۇرمىن. الماتى مەن استانا قالالارىن قوسقاندا 12 كوماندامىز بار.
– «الىستان اربالاعانشا, جاقىننان دوربالا» دەيدى. ءتۇۋ يت ارقاسى قيانداعى كۇنشىعىس ەلىنە بارماي-اق, مىناۋ كورشى جاتقان رەسەي سپورتشىلارىنان ۇيرەنۋدىڭ رەتى كەلمەدى مە؟ كاراتەدەن ورىستاردىڭ دا جەتىستىكتەرى جەتىپ ارتىلادى...
– دۇرىس ايتىپ وتىرسىز... ءسىز بىلەسىز بە, رەسەيدىڭ ارناۋلى «بوەتس» تەلەارناسىن جۇرگىزەتىندەردىڭ بارلىعى دا گودزيۋ-ريۋشىلەر؟! العاشىندا جاپونيادا ءبىز ولارمەن ءبىر زالدا جاتتىعۋ جاسادىق. اعاش ۇرامىز, تاس ۇرامىز, اۋىردى لاقتىرامىز. سوندا جاپوندىق ۇستاز مەنىڭ بالالارىمدى ءۇش ساعات «قۋالاپ» شارشاتا الماي قويعان, قاتتى ريزا بولىپ, سىناققا شىداي الماي قاشىپ كەتەتىندەر تۋرالى ايتتى. زالعا كىرسەڭىز ىلعال. ساۋنادا جۇرگەندەيسىڭ. ونىڭ ۇستىنە ەلدىڭ تابيعاتى دا ىلعالدى. كوپ سپورتشىنىڭ اششى تەرى شىققان سوڭ, جۇرەكتەرى قىسىلىپ قالادى. ورىس سپورتشىلارى ەكى ساعاتتان سوڭ شىداي الماي زالدى تاستاپ, سىرتقا شىعىپ كەتەدى. ەكى ساعاتتان كەيىن توبەلەس باستالعاندا عوي ءبىزدىڭ بالالار جاراۋ اتتاي جۇرەدى دە, الگىلەر... ورتا جولدا قالادى. بىراق سوعان قاراماستان ورىستار گودزيۋ-ريۋگە ءوز ستيلدەرىن قوستى. كەيبىر تاسىلدەردى ىشىنە بۇگىپ جاسىرىپ تۇرادى. ال ءبىز ءوز جولىمىزدى ىزدەدىك, تاپتىق.
– جاپونداردى تاڭداندىرا الدىق پا؟
– كاتانى كوپ جاتتاۋ جادتى شىنىقتىرادى. №140 مەكتەپتە وقيتىن مەنىڭ ەكى بالام دا ماقاتاەۆتىڭ كۇللى ولەڭىن جاتتاپ العان, مانەرلەپ وقۋدان ءبىرىنشى ورىن الدى. مىسالى, ءبىزدىڭ اتاقتى تايقازانىمىز ءبىر عانا بىلتەلى شاممەن قايناعان, ياعني گەومەتريالىق ەسەپ ساي كەلىپ تۇر. كەيىن ەرميتاجعا اپاردى, ەكى توننا كومىر جاقسا دا قازان قاينامادى. مەيبۋكاندا دا سونداي, گەومەتريالىق دالدىك, كوزدىڭ تىك قادالۋى, تىنىس الۋدىڭ مۇلتىكسىزدىگى ءبارى-ءبارى ءبىر-بىرىنە تىعىز بايلانىستا. جاپوندار جاتتىعۋ ۇستىندە 45 مينۋت تاپجىلماي وتىرۋدى تالاپ ەتەدى, قۇراندى ىشتەي قايتالاپ وقىپ وتىرا بەرەمىن. كەيبىرەۋلەر, اسىرەسە ەۋروپالىقتار 15 مينۋتتان اسا وتىرا المايدى, تۇرىپ كەتەدى. نەمەسە مولداس قۇرادى, ودان تىزەرلەيدى. تىزەگە وتىرۋ دا بىزگە جات ەمەس. جاپوندار اڭ-تاڭ, «تىزەرلەپ وتىرۋ ءبىزدىڭ ادەتىمىز» دەيدى. ء«بىز دە سوندايمىز». كەلىندەرىمىز قۇدالىق بىتكەنشە وسىلاي وتىرا بەرەدى ەمەس پە؟! سولاي دەسەم ولار ريزا بوپ ابدەن كۇلدى. مەن اۋىلداعى اتالارىمىز كەشكە دەيىن تاپجىلماي ءبىر ورىندا وتىرۋعا بار دەيمىن. جاپون ۇستازدارىمىزدىڭ ءبىر سۇيسىنگەنى – ءبىزدىڭ بالالاردىڭ قابىلەتى. ء«بىزدىڭ بالالار بەس جىل جاتتايتىن ءادىس-تاسىلدەردى قالايشا ءۇش جىلدا يگەرىپ ۇلگەردىڭىزدەر؟» دەيدى. جاپوندا 5 جاسار بالا 2 كاتا, 10 جاستاعىسى 4 كاتا ءبىلۋ كەرەك. ال مەنىڭ 10 جاستاعى ءبىر بالام 15 كاتانى جاتتاپ العان. ادىلەت مۇرزالين, سىرىم قالجان سەكىلدى بالالارىم بارلىق جاعىنان زەرەك. جاپون اسەرلەرىن تالداي وتىرىپ, ءبىز ءوز ەرەكشەلىكتەرىمىزدىڭ ايشىقتالعانىن بايقادىق. مەيبۋكانعا ءوزىمىز دە يكەمدى بولىپ شىقتىق.
– بالالار شەكتەن شىقپاي ما؟
– تاربيە كۇشتى. قۇتىرماۋ كەرەكتىگىن باسا ايتامىز, ءار بالا كۇشىم بار دەپ تاسىپ كەتسە نە بولادى؟ كىرپىش سىندىراتىن دارەجەگە جەتكەن مەيبۋكانشى قارسىلاسىنىڭ باسىنا ساۋساعىمەن ەبەدەيسىز نۇقىپ قالسا, ميىنا قان قۇيىلادى. سوندىقتان ول جاعىن ەسكەرتەمىن. ءبىز ارنايى ەسەپتە تۇرامىز. وكيناۆالىق مەيبۋكانشىنىڭ تاعى ءبىر قاسيەتى, قايناپ جاتقان قازاننان تاس السا دا قولدارى كۇيمەيدى. ادام ەنەرگەتيكاسىن ءبىر جەرگە ءتۇيىپ-جيناۋ دەگەن سول. بۇل ارادا ولار قىتايلىق شاو ءليننىڭ تىنىس الۋ جۇيەسىنىڭ ەرەكشە تاسىلدەرىن پايدالانادى. شىنىلاردى وقىس ۇرعاندا سىندىرماي پىشاقپەن كەسكەندەي ەتىپ بولە سالادى. مىنە, ونداي دارەجەگە جەتكەندە بالالاردىڭ وزدەرى دە باسىلادى. ساۋساقتارىنىڭ سۋىق قارۋعا اينالىپ كەتكەنىن بىلەدى.
– ماڭداي تەردىڭ وتەۋى قايتتى ما؟
– ەلىمىزدە وتەتىن ەرەجەسىز جەكپە-جەككە بالالاردى قوسىپ, سىناپ وتىرامىز. توبىمدا 12 الەم چەمپيونى, 12 ازيا چەمپيونى بار. كەز كەلگەن چەمپيوناتقا بارار كەزدە بالانىڭ اتا-اناسىنان رۇقسات سۇرايمىن. باقتيار ەسىمدى 19 جاستاعى بالام بار. الەمدەگى, ەۋروپاداعى, ازياداعى ارىپتەستەرىن مويىنداتتى. جيۋ-جيتسيدەن دە قابىلەتى زور. پارتەردە دە مىقتى. بىراق ءالى جاس. بۇل جەڭىستەر وعان 23-24 جاستا كەلۋى كەرەك ەدى. بۇعاناسى قاتپاعان بالالاردى قانشا مىقتى بولسا دا ونداي جارىسقا قوسپايمىن. الدىمەن جاس شامالارىنا قارايمىن, مەنى قارسىلاستاردىڭ الەم چەمپيونى دەگەن اتاقتارى قورقىتپايدى. كەشەگى ءبىر وتكەن جارىستا ءبىزدىڭ قارسىلاسىمىز سونداي چەمپيوندارىن الىپ كەلىپتى, «كاراتەشىلەر عوي, پارتەردى, قىلقىندىرۋدى بىلمەيدى» دەگەن بولسا كەرەك. مەنىڭ باقتيارىم اتاعى دارداي وزىنەن ەكى جاس ۇلكەن وزبەك شەبەرىن پارتەرگە جەتكىزبەي سۇلاتىپ سالدى. ەكى جاس كىشى, ەكى كيلوگرامعا سالماعىمىز از بولسا دا, سويتتىك... ارمان وسپانوۆىمىز ەشكىمنىڭ سالماعىنا دا قارامايدى, دالدەپ ۇرعانىن قۇلاتادى. كەشە ون جۇپ شىقتى, ءبىزدىڭ جەكپە-جەك كەمى ەكى راۋندپەن اياقتالىپ جاتتى. ەڭ ۇزاعى – 38 سەكۋند!..
– ءوزىڭىز, وتباسىڭىز تۋرالى ايتىڭىزشى؟
– ءۇش ديپلومىم بار. زووتەحنيك, فيلولوگ, سپورتشى... ناندى قاي ديپلوممەن جەپ ءجۇرسىڭ, سونى ايت دەيسىز عوي... سپورتشىعا بەرىلەتىن اتاقتىڭ بارلىعىن الدىم. ۇلىم الەم چەمپيونى, مەيبۋكانشى. ينجەنەر-تەحنولوگ. ەكى قىزىم كاراتەمەن ازداپ شۇعىلداندى دا تاستاپ كەتتى. ءوزىمنىڭ اعايىندارىم سپورتشىلار, جۇلدە العاندار, ىنىلەرىمنىڭ بارلىعى كاراتەشى. وڭ قولىم – ەرمەك ەكەۋمىزدىڭ ارمانىمىز, شىركىن, بار قازاق مەيبۋكانشى بوپ كەتسە...
– اڭگىمەڭىزگە راقمەت.
اڭگىمەلەسكەن
تالعات ءسۇيىنباي, «ەگەمەن قازاقستان»