باتىس قازاقستان وبلىستىق سوتىندا سوت جۇيەسىندە قولدانىلا باستاعان اقپاراتتىق تەحنولوگيالاردى تانىستىرۋ شاراسى ءوتتى. سوتتار اكىمشىسىنىڭ باسشىسى نۇرلان قاجعانوۆ وڭىردەگى كوپتەگەن مەملەكەتتىك باسقارما وكىلدەرىنە جاڭالىقتى تانىستىرىپ شىقتى.
بۇل شاراعا باتىس قازاقستان وبلىستىق ەڭبەك ينسپەكتسياسى, ءبىلىم بەرۋ, جۇمىسپەن قامتۋ جانە الەۋمەتتىك باعدارلامالار, كاسىپكەرلىك جانە يندۋستريالىق-يننوۆاتسيالىق دامۋ, جولاۋشىلار كولىگى جانە اۆتوموبيل جولدارى, تابيعي رەسۋرستار جانە قورشاعان ورتانى قورعاۋ, قۇرىلىس, ەنەرگەتيكا جانە تۇرعىن ءۇي-كوممۋنالدىق شارۋاشىلىق, مەملەكەتتىك ساتىپ الۋلار, مەملەكەتتىك ساۋلەت-قۇرىلىس باقىلاۋ باسقارماسى وكىلدەرى مەن قالالىق جانە مامانداندىرىلعان سوتتاردىڭ قىزمەتكەرلەرى ارنايى شاقىرىلعان.
سوت عيماراتىندا ەكسكۋرسيا وتكىزگەن سوتتار اكىمشىسىنىڭ باسشىسى نۇرلان قاجعانوۆ ەلىمىزدىڭ سوت وندىرىسىنە ەنگىزىلگەن زاماناۋي تەحنولوگيالاردى, جاڭارتىلعان سوت جۇيەسىنىڭ قۇرىلىمىن كورسەتتى. بۇل جاڭالىقتار سوت تورەلىگىن جۇزەگە اسىرۋدا ازاماتتاردىڭ مۇددەلەرى مەن قۇقىقتارىن ساقتاۋعا, جۇمىس ونىمدىلىگىن ارتتىرۋعا, قاۋىپسىزدىكتى كۇشەيتۋگە, قارجى ۇنەمدەۋگە باعىتتالعان.
مىسالى, بۇگىندە سوت پروتسەستەرىندە دىبىس-بەينە جازۋ جۇيەسى ىسكە قوسىلعان. بەينەكونفەرەنتس بايلانىس ارقىلى اۋداندىق سوتتارعا جانە تەرگەۋ يزولياتورىنا قوسىلىپ, سوت تورەلىگىن قاشىقتىقتا جۇزەگە اسىرۋ مۇمكىندىگى تۋدى.
– جاڭا تەحنولوگيالار سوتتارعا قىلمىستىق اتقارۋ جۇيەسى مەكەمەسىنىڭ ۇسىنىستارىن سوتتالۋشىلاردى جەتكىزبەي-اق قاراۋعا مۇمكىندىك بەردى. ال بۇل قارجىلاي شىعىنداردى ۇنەمدەپ, سوتتالعانداردى جەتكىزۋ كەزىندەگى قاۋىپ-قاتەردەن ساقتايدى, – دەيدى نۇرلان ەركىن ۇلى.
سوت عيماراتىنداعى كەزدەسۋ سوت ورگاندارىنا ارىزدار, وتىنىشتەر, شاعىمدار مەن وتىنىمدەردى سوتقا بەرۋگە ارنالعان «سوت كابينەتى» سەرۆيسىن تانىستىرۋمەن اياقتالدى.
باتىس قازاقستان وبلىستىق سوتىنىڭ ءباسپاسوز قىزمەتى بەرگەن دەرەكتەرگە قاراعاندا, 2018 جىلدىڭ باسىنان بەرى «سوت كابينەتى» سەرۆيسى ارقىلى وبلىس سوتتارىنا 8976 تالاپ- ارىز, 262 جەكە جانە زاڭدى تۇلعالاردىڭ وتىنىشتەرى, 5226 اكىمشىلىك ىستەر مەن ماتەريالدار جولدانعان. جاڭا سەرۆيستەردىڭ پايدالانۋ اياسى كەڭ جانە جۇرتشىلىق اراسىندا وڭ پىكىر تۋعىزىپ وتىر.
قازبەك قۇتتىمۇرات ۇلى, «ەگەمەن قازاقستان»
ورال