بۇل تۋرالى اقوردانىڭ ءباسپاسوز قىزمەتى حابارلادى.
راسىمگە قاتىسۋشىلارعا ارنالعان سوزىندە ەلباسى بيىل بۇكىل ەلىمىز بويىنشا 140 مىڭنان استام ستۋدەنت جوعارى وقۋ ورنىن ءبىتىرىپ, ديپلومدارىن الاتىنىن اتاپ ءوتتى.
– بۇگىن ءبىز قازاقستاننىڭ ەڭ ۇزدىك وقۋ ورنىنىڭ تۇلەكتەرىنە اق جول تىلەۋ ءۇشىن جينالىپ وتىرمىز. نازارباەۆ ۋنيۆەرسيتەتىنىڭ ءتورتىنشى جىلعى بىتىرۋشىلەرىن جانە ەلىمىزدەگى بارلىق وقۋ ورىندارىنىڭ تۇلەكتەرىن شىن جۇرەكتەن قۇتتىقتايمىن! – دەدى قازاقستان پرەزيدەنتى.
نۇرسۇلتان نازارباەۆ ءبىلىم ەكونوميكاسى مەن يننوۆاتسيالىق دامۋدى قالىپتاستىرۋ ىسىندەگى زەرتتەۋ ۋنيۆەرسيتەتتەرىنىڭ ءرولى مەن ماڭىزىن ەرەكشە اتاپ ءوتتى. سونداي-اق, قىسقا مەرزىم ىشىندە ۋنيۆەرسيتەت جاڭارۋدىڭ سيمۆولىنا جانە ەلىمىزدىڭ عىلىمي-زەرتتەۋ, يننوۆاتسيالىق جانە كادرلىق الەۋەتىنىڭ ءوسۋ ورتالىعىنا اينالعانىن ايتتى.
– نازارباەۆ ۋنيۆەرسيتەتىنىڭ عالىمدارى حالىقارالىق رەيتينگى جوعارى باسىلىمداردا 1700-دەن استام ماقالا جاريالادى. 36 پاتەنت الىندى. كورپوراتيۆتى دەمەۋشىلەر عىلىمي زەرتتەۋلەرگە 40-تان استام گرانت ءبولدى. ۋنيۆەرسيتەت يننوۆاتسيالىق كلاستەردى تابىستى قالىپتاستىرۋدىڭ نەگىزى بولدى. عىلىمي-تەحنيكالىق قىزمەت ناتيجەلەرىن كوممەرتسيالاندىرۋ اياسىندا 21 جوبا قولداۋعا يە بولدى, – دەدى قازاقستان پرەزيدەنتى.
مەملەكەت باسشىسى ۋنيۆەرسيتەتتىڭ ودان ءارى تابىستى دامۋى ەلىمىزدىڭ ادامي كاپيتالىنىڭ ارتۋىنا سەپتىگىن تيگىزىپ, قازاقستاندا بۇكىل ورتالىق ازيا ءوڭىرى اۋقىمىنداعى تولىققاندى ءبىلىم بەرۋ حابىن قالىپتاستىرۋعا مۇمكىندىك بەرەتىنىن ايتتى. نۇرسۇلتان نازارباەۆ قويىلعان مىندەتتەردى ىسكە اسىرۋ ءۇشىن وسى جوعارى وقۋ ورنىنا الدىڭعى قاتارلى زياتكەرلىك جانە عىلىمي رەسۋرستاردى جۇمىلدىرۋ, ءوندىرىس پەن كاسىپكەرلىكتىڭ يننوۆاتسيالىق مادەنيەتىنە باعىتتالعان وقۋ باعدارلامالارىنا بەت بۇرۋ, سونداي-اق قاشىقتىقتان ءبىلىم بەرۋ پلاتفورماسىن دامىتۋ ارقىلى ۋنيۆەرسيتەت جۇمىسىن جانداندىرۋدى تاپسىردى.
– ۋنيۆەرسيتەت ەلىمىزدىڭ عانا ەمەس, سونداي-اق الىس جانە جاقىن شەتەلدەردىڭ وقىمىستىلارىن تارتاتىن ورتالىققا, جاستاردىڭ جوبالارىن بىرلەسە جۇزەگە اسىراتىن ورىنعا جانە گارۆارد, كورسەر, حان اكادەمياسىنىڭ ونلاين-كۋرستارى ۇلگىسىمەن ءبىلىم بەرۋدىڭ ينتەرنەت-پلاتفورماسىنا اينالۋعا ءتيىس, – دەدى قازاقستان پرەزيدەنتى.
نۇرسۇلتان نازارباەۆ استانا ەكونوميكالىق فورۋمىندا كوتەرىلگەن جاھاندىق وزگەرىستەردىڭ بەس مەگاترەندى تۋرالى ايتىپ, ەلدىڭ اۋقىمدى ەكونوميكالىق, ساياسي جانە رۋحاني جاڭعىرۋىن جۇزەگە اسىرۋ ىسىندەگى وسكەلەڭ ۇرپاقتىڭ رولىنە باسا نازار اۋداردى.
– جاڭارعان قازاقستاننىڭ كەلبەتى دە, جاڭا فورماتسيانىڭ ۇرپاعى دا جانە مۇنى ومىردە ىسكە اسىراتىن دا سىزدەر بولاسىزدار. سىزدەردىڭ كۇش-قۋاتتارىڭىز, باستاماشىلدىقتارىڭىز, اقىل-ويلارىڭىز بەن كرەاتيۆتى ۇستانىمدارىڭىز وتانىمىزدىڭ تابىستى دامۋىنىڭ كەپىلى سانالادى. سىزدەر وزدەرىڭىزدىڭ قايتالانباس ءومىر جولدارىڭىزدى ءجۇرىپ وتكەلى تۇرسىزدار. مەن سىزدەردىڭ ارقايسىڭىزدى ماقتان تۇتامىن, – دەدى قازاقستان پرەزيدەنتى.
مەملەكەت باسشىسى ۇزدىك ديپلومداردى تاپسىرۋ ساتىندە نازارباەۆ ۋنيۆەرسيتەتىنىڭ وقىتۋشى-پروفەسسورلار قۇرامىن جانە تۇلەكتەردى تاعى دا قۇتتىقتاپ, ولاردىڭ ءوز يدەيالارىن جەمىستى جۇزەگە اسىرۋىنا تىلەكتەستىك ءبىلدىردى.