وڭتۇستىك قازاقستان وبلىسىندا 700 مىڭعا جۋىق وتباسى بار. جىل سايىن شاڭىراق كوتەرەتىن 20 مىڭعا جۋىق جاس وتباسىنا جاراسىمدى جانۇيا قۇندىلىعىن كەڭىنەن ناسيحاتتاۋ ماڭىزدى.
وسى ورايدا ەلباسى باستاماسىمەن جىل سايىن وتكىزىلىپ كەلە جاتقان «مەرەيلى وتباسى» ۇلتتىق بايقاۋىنىڭ اتقارار ءرولى ۇلكەن. ءبىر شاڭىراق استىندا بەرەكەلى ءومىر ءسۇرۋدىڭ ماڭىزدىلىعىن ارتتىرۋ, وتباسىلىق ءومىر سالتى, اتا-انالىق پارىز, جاۋاپكەرشىلىك سەكىلدى ۇعىمداردى ەل ساناسىنا ءسىڭىرۋ ماقساتىنداعى «مەرەيلى وتباسى-2018» ۇلتتىق بايقاۋى وبلىستىق كەزەڭىنىڭ جەڭىمپازدارى انىقتالدى. ءشامشى قالداياقوۆ اتىنداعى وبلىستىق فيلارمونيادا وبلىس اكىمىنىڭ ورىنباسارى ەربول سادىر جەڭىمپازداردى سالتاناتتى تۇردە ماراپاتتاپ, وبلىس اكىمىنىڭ ديپلومى مەن قارجىلاي سىيلىعىن تابىس ەتتى.
بايقاۋدىڭ وبلىستىق كەزەڭىنە اۋدان, قالادان 38 وتباسى ۇسىنىلعان. كوميسسيا وتىرىسىندا ولاردىڭ 30-ى ىرىكتەلىپ, جەڭىمپازدارى انىقتالدى. سەگىز وتباسىنىڭ قۇجاتتارى سايكەس كەلمەگەنى سەبەپتى, بايقاۋعا قاتىستىرىلماپتى. وسى ۇزدىكتەردىڭ اراسىنان باس جۇلدەگە لايىقتى دەپ تانىلعان قازىعۇرت اۋدانىنان كەلگەن مۇحتار مومىنوۆ پەن ماقتارالدىق ساپارالى سەرىكباەۆ جانۇيالارى مەرەيلى وتباسى اتانىپ, 1 000 000 تەڭگەدەن قارجىلاي سىيلىققا يە بولدى. ياعني قىركۇيەك ايىندا استانا قالاسىندا وتەتىن رەسپۋبليكالىق بايقاۋعا وڭتۇستىكقازاقستاندىق ەكى وتباسى جولداما الدى. سونداي-اق, ۇلتتىق بايقاۋدىڭ وبلىستىق قورىتىندى كەزەڭىنە قاتىسقان بارلىق 28 وتباسىعا وبلىس اكىمى ج.تۇيمەباەۆتىڭ العىس حاتى مەن 200 000 تەڭگە قارجىلاي سىيلىق تابىس ەتىلدى.
ەركىن دوسىمباي,
وڭتۇستىك قازاقستان وبلىسى