الماتىدا مىڭنان اسا ەكسپونات كورەرمەن نازارىنا ۇسىنىلدى

ابايدىڭ «ايتتىم سالەم, قالامقاس» ءانىن اۋەلەتە شىر­قاعان اكتەرلەر توبى كورەر­مەن قاۋىمدى تەاتردىڭ ەكى قاناتىنا تىزىلگەن كوركەم دۇنيەلەردى تاماشالاۋعا شاقىردى.

سالتاناتتى كەشتە تەاتر ديرەكتورى اسحات ماەميروۆ بۇگىندە مۋزەي قورىندا ءۇش ءجۇز مىڭنان اسا قۇندى جادىگەردىڭ بار ەكەندىگىن جەتكىزدى. تەاتر باسشىلىعى مۋزەيدىڭ العاش­قى جاناشىرى زەينەپ مول­داباەۆاعا ارنايى العىس حات تابىس ەتىپ, ومىردەن وتكەن ساح­نا ساڭلاقتارىنا تيەسىلى بۇ­يىم­داردىڭ ەتەك-جەڭىن جيناپ, كوزىنىڭ قاراشىعىنداي قامقورلىق جاساپ, جۇيەلەپ جۇرگەن مۋزەي جەتەكشىسى نارگيز تامابەكقىزىنا شاپان جاۋىپ, قۇرمەت كورسەتتى.

 مۋزەيدەگى ەڭ كونە كوس­تيۋم «امانگەلدى» فيلمىندەگى ەلۋباي ومىرزاقوۆ كيگەن ەكى شاپانعا توقسانعا جۋىق جىلدىڭ ءجۇزى بولىپتى. ال ساحنا ساڭ­لاعى سەركە قوجامقۇلوۆتىڭ گريمەرلىك بولمەسىندەگى سارى شاپانى, ورىندىق, ايناسى, ت.ب. بۇيىمدارى جانە دە شاماسى وتكەن عاسىردىڭ 60-جىلدارى بولۋى كەرەك, ق.بادىروۆ, ءا.مامبەتوۆ, ت.ب. تەاتر تارلاندارى اڭگىمە-دۇكەن قۇرىپ وتىرعان كرەسلو وتكەن كۇندەردىڭ حابارشىسىنداي مەنمۇندالايدى.

مۋزەي ەكسپوناتتارىمەن كەلۋشىلەردى تانىستىرعان قازاق­­ستاننىڭ حالىق ءارتىسى ءاسانالى ءاشىموۆ ساحنا تارلان­­دارىنىڭ ءيىسى ءسىڭىپ, كيەسى جۇققان كيىمدەرى مەن بۇيىمدارىنا زەر سالا قاراپ, «ارقايسىمىز ءۇشىن ما­ڭىزى جوعارى وسىناۋ قادىرلى بۇ­يىمدارعا مەن بەيجاي قاراي المايمىن» دەدى تەبىرەنىستى ۇنىمەن. ال قازاقستاننىڭ حالىق ءارتىسى ءسابيت ورازباەۆ «بۇل جادىگەرلەردىڭ ەلىمىزدىڭ تاريحىندا الار ورنى ەرەكشە, ءبىزدىڭ باعا جەتپەس التىن قورىمىز» دەپ مۋزەي سورەسىندە ساپ تۇزەگەن ءار جىل­دارداعى سپەكتاكلدەر افيشاسىنا كورەرمەندەردىڭ نازارىن اۋداردى. سونىمەن بىرگە ءا.مامبەتوۆ قىزمەت ەتكەن جىلداردى ەسكە ءتۇسىرىپ, تالانتتى رەجيسسەردىڭ تەاتر­دىڭ باعىنا بىتكەن ەرەكشە تۇل­عا ەكەندىگىن ايتىپ, شاعىن ەستەلىكتەرىمەن ءبولىستى. مۋزەي جەتەكشىسى ن.تامابەكقىزى تەاتر­لاندىرىلعان كورىنىس بارى­سىندا ءسابيرا مايقانوۆا, نۇرمۇحان ءجانتورين, شاكەن ايمانوۆ, حاديشا بوكەەۆا, شول­پان جان­دار­بەكوۆا, ت.ب. ساحنا ساڭ­لاقتا­رى­نىڭ سپەكتاكلدەردە كيگەن كوس­تيۋمدەرىن تانىستىردى.

ەلۆيرا سەرىكقىزى, «ەگەمەن قازاقستان»

الماتى