وتكەن اپتانىڭ دەمالىس كۇندەرى ەلورداداعى «قازاقستان» ورتالىق كونتسەرت زالىندا استانانىڭ 20 جىلدىق مەرەيتويىنا ارنالعان ۇلتتىق «بالا داۋىسى» بالالار ءان بايقاۋىنىڭ ءۇشىنشى ماۋسىمىنىڭ سالتاناتتى اشىلۋ ءراسىمى بولدى. ءاليا نازارباەۆانىڭ «جاندانۋ الەمى» قورىنىڭ ۇيىمداستىرۋىمەن ەلىمىزدىڭ دارىندى بالالارىنا ارنالعان اۋقىمدى جوبا مادەنيەت جانە سپورت مينيسترلىگىنىڭ, قازاقستان رەسپۋبليكاسى تۇڭعىش پرەزيدەنتى – ەلباسى قورىنىڭ قولداۋىمەن ءوتتى.
«بالا داۋىسى استانا جۇرەگىندە» مەرەكەلىك باعدارلاماسىندا ەلىمىزدىڭ تۇكپىر-تۇكپىرىنەن كەلگەن كىشكەنتاي دارىن يەلەرى قازاق ەستراداسىنىڭ جارىق جۇلدىزدارى – روزا رىمباەۆا, مايرا مۇحامەدقىزى, مارجان اراپباەۆا, جەڭىس سەيدوللا ۇلى جانە «الاۋ» توبىمەن بىرگە ونەر كورسەتتى. كورەرمەندەر حالىق اندەرىن, الەمدىك حيتتەردى جانە اۆتورلىق شىعارمالاردى تىڭداپ, جاڭا حورەوگرافيالىق قويىلىمدار مەن ۇمىتىلماس كەشتىڭ كۋاگەرى بولدى. ەلوردانىڭ ساحناسىندا شەتەلدەردىڭ تانىمال ارتىستەرى ونەر كورسەتتى. ولاردىڭ ىشىندە الەمدىك شوۋ باعدارلامالارىن باعىندىرىپ جۇرگەن قىرعىزستاندىق «تۇمار» بي توبى, مەرەكەگە ارناپ جاڭا ءان جازعان, تانىمال بارابانشى گاگاش, وزبەكستاننىڭ كىشكەنتاي جۇلدىزى, YouTube جەلىسىندە ميلليونداعان كورەرمەن جيناپ, تالانتىمەن تامساندىرعان جۋرابەك جۋراەۆ بار.
«بالا داۋىسى-2018» بايقاۋى تۇڭعىش رەت ەلوردادا ءوتىپ, سالتاناتتى شاراعا بايقاۋدىڭ يدەيا اۆتورى ءاليا نۇرسۇلتانقىزى نازارباەۆا كەلدى. ال وقۋ جانە سپورت سالاسىندا جەتىستىكتەرگە جەتىپ جۇرگەن استانالىق مەكتەپتەردىڭ 2 600 وقۋشىسى مەن مۇعالىمدەرى كەرەمەت كەشتىڭ سىيلى قوناقتارى بولدى.
سالتاناتتى اشىلۋ كونتسەرتىنەن كەيىن ونەرپازداردى ىرىكتەۋ تۋرى باستالدى.
بۇل اتالمىش بايقاۋدىڭ ءۇشىنشى تۋرى. بيىل ناۋرىزدىڭ 15-ءى مەن ءساۋىردىڭ 15-ءسى ارالىعىندا وتكەن قابىلداۋدا «بالا داۋىسى» ۇيىمداستىرۋ كوميتەتىنە 8-12 جاس ارالىعىنداعى بالالاردان 3765 ءوتىنىم كەلىپ ءتۇسىپ, بايقاۋ باستالعالى بەرگى رەكوردتىق كورسەتكىشتى كورسەتىپتى. الدىن الا قورىتىندى بويىنشا, ىرىكتەۋ تۋردىڭ فينالىنا 14 وبلىستان, الماتى جانە استانا قالالارىنان 81 قاتىسۋشى شاقىرىلعان. ولار مايرا مۇحامەدقىزى, جەڭىس سەيدوللا ۇلى جانە اسەت ارىستانبەك سىندى كاسىبي قازىلاردىڭ الدىندا ۆوكالدىق ونەرلەرىن عانا ەمەس, بي جانە ارتىستىك قابىلەتتەرىن كورسەتتى. ءسويتىپ «بالا داۋىسى» جۇلدىزدار ۇيىنە 81 بالادان 19 جاس تالانت شاقىرتۋ الدى. ەندىگى جەردە ولاردى وسى جىلدىڭ قىركۇيەك ايىندا دايىندىعى باستالاتىن سۋپەر-فينال كۇتۋدە. بالالار ۆوكال, اكتەرلىك شەبەرلىك, حورەوگرافيا, ءسوز ونەرى, ساحنا ونەرىنەن شەبەرلىك ساباقتارىن الادى.
27 قازاننان باستاپ 27 جەلتوقسانعا دەيىن تەلەكورەرمەندەر كىشكەنتاي ارتىستەردىڭ ونەرىن تاماشالاپ, ءوز سۇيىكتىلەرىنە داۋىس بەرەتىن بولادى. ءسويتىپ 2 اي ىشىندە تەلەكورەرمەندەر «حالىق سۇيىكتىسىن» انىقتايدى. ال 8 جەلتوقسان كۇنى استاناداعى «قازاقستان» ورتالىق كونتسەرت زالىندا اۋقىمدى سۋپەر-فينال وتەدى. تىكەلەي ەفيردە قازىلار «بالا داۋىسىنىڭ» بيىلعى جەڭىمپازىن انىقتايدى.
ۇلاربەك نۇرعالىم ۇلى, «ەگەمەن قازاقستان»