ورتالىق كوممۋنيكاتسيالار قىزمەتىنىڭ الاڭىندا «Challenge «سەنىڭ جاڭا قىرىڭ» رەسپۋبليكالىق سپورت باستاماسىنىڭ ىسكە قوسىلۋىنا ارنالعان ءباسپاسوز ءماسليحاتى ءوتتى.
2018 جىلدىڭ 4 ماۋسىمىنان باستاپ قازاقستاندا Challenge «سەنىڭ جاڭا قىرىڭ» اتتى بۇقارالىق سپورت باستاماسى ىسكە قوسىلادى. فيزيكالىق بەلسەندىلىكتى ناسيحاتتاۋ ماقساتىندا ونلاين-جوبانى ىسكە اسىرۋ باستاماسىن «Samruk-Kazyna Trust» الەۋمەتتىك جوبالاردى دامىتۋ قورى قولعا الدى.
ءباسپاسوز ءماسليحاتىنا Challenge «سەنىڭ جاڭا قىرىڭ» جوباسىنىڭ ۇيىمداستىرۋشىسى ۆاليحان تەن, وليمپيادا چەمپيونى ەرماحان ىبىرايىموۆ, ءارتىس, قازاقستاننىڭ ەڭبەك سىڭىرگەن قايراتكەرى, جوبانىڭ برەند-امباسسادورى مۇرات مۇتىرعانوۆ, تنت تەلەارناسىنىڭ «تانتسى» تەلەجوباسىنىڭ قاتىسۋشىسى ءمادينا بەيسەكەەۆا, «Samruk-Kazyna Trust» الەۋمەتتىك جوبالاردى دامىتۋ قورىنىڭ باسقارۋشى ديرەكتورى-رەسمي وكىلى ليما دياس قاتىستى.
«قازاقستاندا Challenge «سەنىڭ جاڭا قىرىڭ» بۇقارالىق سپورت باستاماسى 2018 جىلدىڭ 4 ماۋسىمىندا باستالادى. ونىڭ نەگىزگى ماقساتى – قازاقستان حالقىنىڭ اراسىندا سالاماتتى ءومىر سالتىن قالىپتاستىرىپ, سپورتقا دەگەن سۇيىسپەنشىلىگىن وياتۋ. جوبانى قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ قولداپ, قازاقستاندىقتاردى سپورتپەن شۇعىلدانۋعا جانە بەلسەندى ءومىر سالتىن ۇستانۋعا شاقىراتىن بەينە ۇندەۋ جولدادى. «Challenge «سەنىڭ جاڭا قىرىڭ» – بۇل ەلدىڭ ءومىر سالتىنداعى جاھاندىق وزگەرىستەر. 2018 جىلى جوبانىڭ ءساتتى ءوتۋىنىڭ كورسەتكىشى رەتىندە قازاقستاندا سپورتپەن اينالىساتىن ادامداردىڭ سانى 2017 جىلعا قاراعاندا 300 مىڭعا كوتەرىلەدى دەپ جوسپارلانىپ وتىر. ءدال وسى قازاقستاندىقتاردىڭ بويىندا سالاماتتى ءومىر سالتىن ۇستانۋدىڭ داعدىلارى مەن پرينتسيپتەرىن تاربيەلەۋ جوسپاردا بار», دەپ اتاپ ءوتتى ءوز سوزىندە «Samruk-Kazyna Trust» الەۋمەتتىك جوبالاردى دامىتۋ قورىنىڭ رەسمي وكىلى ليما دياس.
جوبا ۇيىمداستىرۋشىسى ۆاليحان تەننىڭ ايتۋى بويىنشا, Challenge «سەنىڭ جاڭا قىرىڭ» باستاماسى قازاقستاندىقتاردا سپورتپەن شۇعىلدانۋ ادەتىن قالىپتاستىرۋ ماقساتىندا جۇزەگە اسىرىلادى. «بۇل ءۇشىن 21 كۇن ىشىندە فيزيكالىق جاتتىعۋلارعا تەك جارتى ساعات ۋاقىت ءبولۋ جەتكىلىكتى», دەيدى ول.
سونىمەن قاتار جوبا اياسىندا مۇمكىندىگى شەكتەۋلى بالالارعا ەرەكشە نازار اۋدارىلادى. ولار ءۇشىن ارنايى الماتى قالاسىندا تانىمال تۇلعالاردىڭ قاتىسۋىمەن ۇيىمداستىرىلاتىن 3 وففلاين-جاتتىعۋ وتكىزۋ جوسپارلانىپ وتىر.
راۋان قايدار, «ەگەمەن قازاقستان»