قازىرگى زامانداعى قازاق ادەبيەتى وكىلدەرىنىڭ ەكى تومدىق انتولوگياسى بريتان كەڭەسىنىڭ قولداۋىمەن كەمبريدج ۋنيۆەرسيتەتىندە جارىق كورمەك.
بۇۇ-نىڭ التى تىلىنە اۋدارىلاتىن انتولوگيانىڭ مازمۇنى, قۇرىلىمى قانداي بولاتىنىن تالقىلاۋ ءۇشىن ادەبيەتىمىزدىڭ كورنەكتى وكىلدەرى الماتىداعى دوستىق ۇيىندە باس قوستى. «قازىرگى زامانعى قازاق مادەنيەتى الەم نازارىندا» جوباسى – ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنان تامىر تارتقان, يگىلىكتى شارۋا. مۇنداي اۋقىمدى اۋدارما جۇمىسى قاتاڭ باقىلاۋدا بولادى. نەگىزى جۇمىس توبىنا پرەزيدەنت اكىمشىلىگى ىشكى ساياسات ءبولىمىنىڭ مەڭگەرۋشىسى ايدا بالاەۆا جەتەكشىلىك ەتەدى. الماتىدا وتكەن جيىندا ايدا بالاەۆا اۋدارما ساپاسىنىڭ جوعارى بولۋىن جانە انتولوگيانىڭ تارالۋ ماڭىزدىلىعىنا توقتالعان بولاتىن. سوندىقتان دا قازاق قالامگەرلەرىنىڭ شىعارمالارىن اۋدارىپ, تاراتۋعا بريتان كەڭەسى مەن كەمبريدج ۋنيۆەرسيتەتى سياقتى بەدەلدى ۇيىمدار پەيىل تانىتىپ وتىر. جوبانى ۇيىمداستىرۋشى توپ انتولوگيانى فرانتسۋز, يسپان, قىتاي, اراب, ورىس تىلدەرىنە اۋدارعاندا دا ۇلكەن جەتىستىككە جەتۋدى كوزدەيدى.
مەملەكەتتىك سىيلىقتىڭ لاۋرەاتى, جازۋشى الىبەك اسقاروۆ: «جالپى ءبىزدىڭ قازاق ادەبيەتىندەگى ورنىن تولتىرا الماي جۇرگەن ءبىر كەمشىلىگىمىز بار. ول – نەبىر ءىنجۋ-مارجان جاقسى شىعارمالاردى شەتەلگە تانىتۋ. بۇرىن شەتەلگە تانىتۋ جاعى وتە اۋىر, قيىن جاعداي ەدى. ەلباسىنىڭ «بولاشاققا باعدار: رۋحاني جاڭعىرۋ» ماقالاسى اياسىندا قازىر قالامگەرلەر اراسىندا ۇلكەن سەرپىلىس بار. التى تىلگە اۋدارۋ ءۇشىن التى مەملەكەتكە بارۋ كەرەك. ونىڭ باسپاگەرلەرى بار, باسقاسى بار سولارمەن كەلىسسوز جۇرگىزۋ كەرەك. كەلىسىمگە قول قويۋ كەرەك. سونىڭ ءبارىن مەملەكەت جاساپ بەردى. ەندىگى مىندەت – سوعان لايىق ءىنجۋ-مارجانداردى تاڭداپ وتىرىپ, اۋدارۋعا بەرۋ», دەدى.
«پروستور» جۋرنالى باس رەداكتورىنىڭ ورىنباسارى ليۋبوۆ شاشكوۆا بولسا: «قازاق ادەبيەتىنىڭ كلاسسيكتەرى مەن جاڭا زامانعى وكىلدەرىن قامتيتىن ەكى تومدىق انتولوگيانىڭ ءبىر تومى – پوەزيا, ءبىر تومى – پروزا. ۇلكەن جۇمىس اتقارىلدى, ەندى جاقسىمىزدى جارقىراتىپ كورسەتە الۋىمىز كەرەك», دەپ پىكىر ءبىلدىردى.
ايدا بالاەۆانىڭ ايتۋىنشا, بۇل جوبا اقىن-جازۋشىلارىمىزدىڭ شەتەلمەن قارىم-قاتىناس ورناتۋىنا, قازاق ادەبيەتىن الەم جۇرتشىلىعىنا تانىتۋعا, الەمدىك ادەبي ۇردىسكە ات سالىسۋعا زور مۇمكىندىك بەرەدى.
سونىمەن قاتار انتولوگيا تەك كىتاپ فورماتىندا عانا ەمەس, ەلەكتروندى جانە اۋديو فورماتتا دا جارىق كورىپ, ونلاين پلاتفورمالاردا وقىرمان نازارىنا ۇسىنىلادى.
باعاشار تۇرسىنباي ۇلى, «ەگەمەن قازاقستان»