مەملەكەت باسشىسى, «نۇروتان» پارتياسىنىڭ توراعاسى نۇرسۇلتان نازارباەۆ بيىلعى قازاقستان حالقىنا جولداۋىندا قويعان باستى تالاپتاردىڭ ءبىرى – تسيفرلاندىرۋ ەكەنى بەلگىلى. تەاتر كيىم ىلگىشتەن باستالسا, تۇتاستاي ەلىمىزدەگى وندىرىستىك قۇرىلىمدار مەن الەۋمەتتىك سالالاردى جانە ءبىلىم بەرۋ مەكەمەلەرىن جاپپاي تسيفرلاندىرۋ ءىسى العاشقى كەزەكتە تسيفرلىق ساۋاتتاندىرۋ دەڭگەيىن كوتەرۋدەن باستالماق. بۇل مىندەتتەر ەڭ الدىمەن رەسپۋبليكا مەكتەپتەرىندە IT كلاسس جوبالارىن جۇزەگە اسىرۋدان باستاۋ الادى.
بۇگىنگى قوعامدىق ءومىردىڭ وسىنداي زاماناۋي تالابىنان تۋىنداعان ماسەلە رەسپۋبليكا وڭىرلەرى اراسىندا اقتوبە وڭىرىندە كەڭىنەن قانات جايىپ وتىر. وسى ورايدا وڭىردە العاشقى IT كلاستاردىڭ ءبىرى ءۇش تىلدە وقىتاتىن №21 ورتا مەكتەپ – گيمنازياسىندا اشىلدى.
IT كلاستاردى جوبالاۋ شەڭبەرىندە پروگراممالاۋ, نەمەسە پروگراممالاۋ ءتىلىن ۇيرەتۋ دەگەن ۇعىم بار. مۇنى رەسپۋبليكا مەكتەپتەرىندە جاپپاي وقىتۋ باعدارلاماسىنا ەنگىزىلگەن ينفورماتيكا ءپانىنىڭ اتقاراتىن قىزمەتىمەن شاتاستىرماعان ءجون. ويتكەنى بۇل مۇلدەم جاڭاشا تۇسىنىك. مۇنداعى ءبىرىنشى مىندەت جاس جەتكىنشەكتەردى پروگراممالاۋ تىلىنە جاتتىقتىرۋ بولسا, ەكىنشىدەن IT كلاستار روبوتتى تەحنيكامەن جۇمىس ىستەۋ داعدىلارىن دا بەرىك ورنىقتىرۋعا نەگىز قالاي الادى. مۇنىڭ ارعى جاعىندا وقۋشىلاردىڭ كۇردەلى تەحنيكالىق قۇرىلىمداردى تاجىريبەلىك تۇردە ءوز قولىمەن قۇرۋ ءىسىن مەڭگەرۋى دەگەن ءماندى دە ماڭىزدى ماسەلە بار. بۇل بىرىنشىدەن جاراتىلىستانۋ عىلىمدارى ىلىمدەرىنە, سونداي-اق فيزيكا-ماتەماتيكا پاندەرىنە ارقا سۇيەيدى,- دەدى گازەت تىلشىسىنە جوعارىدا اتالعان اقتوبە قالاسىنداعى مەكتەپ – گيمنازيانىڭ ديرەكتورى مارجانكۇل تويشىمانوۆا.
مۇنداعى اشىلعان IT كلاستار سوڭعى ۇلگىدەگى كومپيۋتەرلەرمەن جانە 3D پرينتەرلەرمەن, جوعارى جىلدامدىقتاعى ينتەرنەتپەن, سونىمەن بىرگە قاجەتتى ۆەب-باعدارلامالارمەن جابدىقتالعان. زاماناۋي جوبانىڭ جۇزەگە اسۋىنا «نۇروتان» پارتياسى باستاماشى بولىپ وتىر. اتاپ ايتقاندا «نۇروتان» پارتياسى اقتوبە قالالىق فيليالى توراعاسىنىڭ ءبىرىنشى ورىنباسارى مۇراتباي اجىباەۆتىڭ ايتۋى بويىنشا بيىل پارتيالىق جوبا اياسىندا وڭىردەگى 20 جوعارى ءبىلىم بەرەتىن مەكتەپتەردە IT كلاستار اشىلماق. ونىڭ دەنى بيىلعى جىلدىڭ ەكىنشى جارتى جىلدىعىنا دەيىن ىسكە قوسىلادى دەپ كۇتىلۋدە.
IT كلاستاردى جوبالاۋ ءبىرىنىشى كەزەكتە قارجىلاندىرۋ ماسەلەسىن وڭتايلى تۇردە شەشۋ قاجەتتىلىگىن تۋىنداتادى. وسى ورايدا ءاربىر IT كلاستاردى جاساقتاۋ ءۇشىن ءتورت ميلليون تەنگە قاجەت ەكەندىگىن ايتقان ءجون. بۇل رەتتە اقتوبە وڭىرىندە جەرگىلىكتى بيۋدجەتكە سالماق سالا بەرمەي, ونى ءبىلىم بەرۋ ءىسىنىڭ جاناشىرلارى, كاسىپكەرلەر جانە ۇكىمەتتىك ەمەس ۇيىمدار قاراجاتتارى ەسەبىنەن شەشۋ كوزدەلگەن. ءسوز سوڭىندا وبلىستىق جانە قالالىق «نۇروتان» پارتياسى فيليالدارى قولداۋىمەن قولعا الىنعان IT كلاستار اشۋ ماسەلەسى وبلىستا ىلكىمدى تۇردە جۇزەگە اسا باستاعانىن ايتقان ءجون.
تەمىر قۇسايىن,
«ەگەمەن قازاقستان»
اقتوبە