قۇرمانعازى اتىنداعى قازاق ۇلتتىق كونسەرۆاتورياسىندا ونەرتانۋ عىلىمدارىنىڭ دوكتورى, پروفەسسور ساۋلە وتەعاليەۆانىڭ 60 جىلدىق مەرەي تويىنا ارنالعان «زاماناۋي مۋزىكالىق تۇركولوگيانىڭ كوكەيكەستى ماسەلەلەرى» تاقىرىبىندا حالىقارالىق عىلىمي-پراكتيكالىق كونفەرەنتسيا ءوتتى. كونفەرەنتسيا جۇمىسىنا الەمنىڭ سەگىز ەلىنەن كەلگەن 50-دەن استام ەتنومۋزىكاتانۋشى قاتىستى.
ساۋلە وتەعاليەۆا يۋنەسكو – جانىنداعى ءداستۇرلى مۋزىكا بويىنشا حالىقارالىق كەڭەستىڭ قازاقستانداعى ساراپشىسى ءارى وكىلى جانە ەتنومۋزىكولوگيا بويىنشا ەۋروپالىق سەمينار, «ەتنوسولفەدجيو» كۋرسى نەگىزىندە بىرنەشە كىتاپتار مەن باعدارلامالاردىڭ اۆتورى. ەلىمىزدەن بولەك رەسەي, وزبەكستان, ليتۆا, فينليانديا, گەرمانيا, جاپونيا, وڭتۇستىك كورەيا ەلدەرىندە 200 - دەن اسا عىلىمي ماقالالارى جاريالانعان. زەرتتەۋشىنىڭ «ماڭعىستاۋدىڭ دومبىرا ءداستۇرى», «ورتالىق ازيا حوردوفونى», «باتىس قازاقستاننىڭ دومبىرا داستۇرلەرىندەگى «تۇرىكمەن كۇيى» ءتارىزدى ىرگەلى ەڭبەكتەرى كوپشىلىككە كەڭىنەن تانىس. ونەر زەرتتەۋشىلەرىنىڭ حالىقارالىق دەڭگەيدەگى ءماجىلىسى كورنەكتى عالىمنىڭ مەرەيتويىنا ورايلاستىرىلۋى دا سوندىقتان.
عىلىمي-پراكتيكالىق كونفەرەنتسيا ەۋرازيانىڭ تۇركى تىلدەس ەلدەرىنىڭ مۋزىكالىق اسپاپتارى مەن اسپاپتىق مۋزىكاسى, تۇركى تىلدەس ەلدەردىڭ مۋزىكاسىنداعى دىبىس فەنومەنى جانە دىبىس بيىكتىگىنىڭ جۇيەسى, تۇركى تىلدەس ەلدەردىڭ مۋزىكالىق-پوەزيالىق جانە تەاتر ونەرى, مۋزەي, وقۋ ۇردىسىندەگى تۇركى تىلدەس ەلدەردىڭ مۋزىكاسى ءتارىزدى نەگىزگى ءتورت باعىت بويىنشا ءوربىدى.
اننا نەكرىلوۆا, يل-ۆۋ-پاك, يگبال مامەدزادە, قىزىربەك جاناسىل ۇلى, ۆيولەتتا يۋنۋسوۆا, گەننادي ماكاروۆ, يگور ماتسيەۆسكي, جەرانسكا-كومينەك سلاۆوميرا سىندى اتى الەمگە ايگىلى مۋزىكا مايتالماندارى مەن ونەر زەرتتەۋشىلەرى سان عاسىرلاردان بەرى ارقاۋى ۇزىلمەي كەلە جاتقان ساف ونەردىڭ وتكەنى مەن بۇگىنى جايىندا ورامدى ويلارىن ورتاعا سالىپ, ونى كەلەشەك ۇرپاققا قىلاۋسىز جەتكىزۋدىڭ جولدارىن تالقىلادى. وڭتۇستىك كورەيا عالىمدارى دج. بەيليدىڭ ىشەكتى اسپاپتاردا ورىنداۋشىلىقتى ۇيرەنۋدىڭ جاڭا عىلىمي زەرتتەۋلەرىمەن ءبولىسىپ, يل-ۆۋ-پاك, اننا نەكرىلوۆا, گەنناديا ماكاروۆا, قىزىربەك جاناسىل ۇلى مەن يگبالا مامەدزادە ونەر سۇيەر قاۋىم ءۇشىن شەبەرلىك سىنىپتارىن وتكىزدى. سونداي-اق, ءازىربايجاننان كەلگەن مۋزىكانت «تار» جانە «ساز» اسپاپتارىنىڭ سالىستىرمالى تالداۋ ناتيجەلەرى تۋرالى بايانداما جاساسا, گەننادي ماكاروۆ ۆولگا مەن ورال ماڭى تاتارلارىنىڭ ورتاعاسىردىڭ سوڭىنداعى مۋزىكالىق – اسپاپتىق مادەنيەتى تۋرالى ءدارىس وقىدى.
ر. كارۋتتستىڭ تۇركىستاندىق اندەر جيناعى مەن اسپاپتىق پەسالارى تۋرالى كىتابى مەن ارنايى ءفيلمنىڭ تۇساۋى كەسىلىپ, جيىن سوڭى ءداستۇرلى مۋزىكانىڭ ۇلكەن كونتسەرتىنە ۇلاستى. كونفەرەنتسيا ماتەريالدارى بويىنشا «زاماناۋي تۇركىتانۋدىڭ وزەكتى ماسەلەلەرى» تاقىرىبىندا دايىندالعان عىلىمي ماقالالار جيناعى ازىرلەندى.
ارمان وكتيابر,
«ەگەمەن قازاقستان»
الماتى