مەملەكەت باسشىسىنىڭ «تسيفرلى قازاقستان» ماقساتتى باعدارلاماسى – ەل دامۋىن زاماناۋي قاجەتتىلىك تالابىنا ساي جاڭا ساتىعا كوتەرەتىن باستاما. قازىرگى تاڭدا تسيفرلاندىرۋ جۇمىستارى ەلىمىزدەگى ءاربىر سالادا كەڭ قولعا الىنعان دەسەك, ماڭعىستاۋ وڭىرىندەگى بۇل باعىتتاعى جۇمىستار جايلى اۋىز تولتىرىپ ايتۋعا بولادى.
بيىل ايماقتا «تسيفرلى قازاقستان» باعدارلاماسى اياسىندا «ەلەكتروندى ەڭبەك بيرجاسى» ىسكە قوسىلىپ, جىل باسىنان بەرى 4 مىڭعا جۋىق ازامات ەڭبەك بيرجاسىنا تىركەلدى. جۇمىستى جەڭىلدەتىپ, جان-جاقتىلىققا باستايتىن باعدارلامانى جۇزەگە اسىرۋ بارىسىندا «ەڭبەك نارىعى» اۆتوماتتاندىرىلعان اقپاراتتىق جۇيەسى ىسكە قوسىلدى. بۇل اقپاراتتىق جۇيە جۇمىس ىزدەۋشىلەردى جانە جۇمىسسىز رەتىندە تىركەۋدى, جۇمىسپەن قامتۋدىڭ بەلسەندى شارالارىمەن قامتىلعاندارعا جولداما بەرۋ جانە مونيتورينگىلەۋدى, جۇمىسپەن قامتۋ سالاسىنداعى ەسەپتىلىكتى قامتاماسىز ەتۋدى جۇزەگە اسىرادى. جۇمىسپەن قامتۋ ورتالىقتارىنا جىل باسىنان بەرى 11 978 ادام جۇگىنگەن, ياعني وسى جۇيەگە تىركەلگەن.
الەۋمەتتىك-ەڭبەك سالاسىن تسيفرلاندىرۋدا ەلەكتروندى ەڭبەك كەلىسىمشارتتارىن تىركەۋ جۇيەسىن ەنگىزۋ بولدى.
– بۇل جۇيە جالپى ەڭبەك كەلىسىمشارتتارىنىڭ قويماسى جانە بۇكىل رەسپۋبليكا بويىنشا جۇمىس ىستەيتىن بارلىق ەڭبەك كەلىسىمشارتتارىنىڭ ەلەكتروندى فورماتىنا كوشۋگە مۇمكىندىك بەرەدى. بۇل جۇمىسپەن قامتۋ ۇدەرىسىن جەڭىلدەتەدى, ياعني قۇجاتتاردى جيناۋدىڭ قاجەتى جوق. ءوز كەزەگىندە جۇمىس بەرۋشى ءۇشىن قىزمەتكەرلەردىڭ قادرلىق قۇجاتتارىن جۇرگىزىلۋى جەڭىلدەتىلگەن جانە وڭتايلاندىرىلعان. ەڭبەك جانە حالىقتى الەۋمەتتىك قورعاۋ مينيسترلىگى وسى جوبانى ازىرلەۋشى رەتىندە اعىمداعى جىلدىڭ 1 شىلدەسىنە دەيىن ۇكىمەتكە ۇسىنىلاتىن زاڭناماعا تۇزەتۋلەر دايىنداۋ جوسپارلانۋدا, – دەيدى بۇل تۋرالى ەڭبەك باسقارماسىنىڭ باسشىسى شىڭعىس دۇيسەنوۆ.
قازىرگى تاڭدا ماڭعىستاۋ وبلىسىندا 49 453 زەينەتكەر تىركەلگەن. جاڭا ستاندارتتار بويىنشا زەينەتاقى الۋ ءۇشىن ازاماتتار ەندى «ازاماتتارعا ارنالاعان ۇكىمەت» مەملەكەتتىك كورپوراتسياسىنا ءوتىنىش بەرە الادى. بۇل ارقىلى بەرىلەتىن قۇجاتتاردىڭ سانىنىڭ قىسقارۋىنا قول جەتكىزۋگە بولادى جانە بارلىق قاجەتتى اقپارات اۆتوماتتاندىرىلعان بازادا ۇسىنىلاتىن بولادى. بۇل وزگەرىستەر زەينەتكە شىعاتىن ازاماتتاردىڭ 70 پايىزىن قامتيدى. اتالمىش جاعدايدا ۋاقىتتى ۇنەمدەۋ مۇمكىندىگى پايدا بولادى, ناقتىراق ايتساق, مەملەكەتتىك قىزمەت كورسەتۋ مەرزىمى 10 كۇنەن 8 كۇنگە دەيىن قىسقارماق.
«تسيفرلى قازاقستان» باعدارلاماسى ماڭعىستاۋ وبلىسىنىڭ ءبىلىم سالاسىندا دا جۇيەلى قولعا الىنعان. جۋىردا ايماقتىڭ ءۇش مەكتەبىندە IT-سىنىپتار اشىلعان بولسا, جاڭا وقۋ جىلىنا دەيىن تاعى 33 IT-سىنىپ قاتارعا قوسىلماق. ال مۇنايلى اۋدانىنىڭ قىزىلتوبە اۋىلىنداعى مەكتەپتە IT-سىنىپپەن بىرگە, IT الاڭ جاساقتالعان.
– الاڭدا قازاقستاننىڭ كارتاسى, كيىز ءۇي, ۇلتتىق اسپاپتار, قالقان, كىتاپتار, وزگە دە تاقىرىپتار بار. شتريح كود ارقىلى ءبىر تاقىرىپتى تاڭداعاندا, ول ۇياشىقتا ءبىراز مالىمەتتەر شوعىرلانعان. ماسەلەن, كىتاپتار ۇياشىعى ارقىلى قازاقستاندىق جانە الەمدىك كلاسسيكتەردىڭ شىعارمالارى, ۇلتتىق اسپاپتار ۇياشىعى ارقىلى قازاقتىڭ, ماڭعىستاۋدىڭ ونەرى مەن ونەرپازدارى تۋرالى ماعلۇمات الۋعا بولادى, – دەيدى «نۇر وتان» پارتياسى مۇنايلى اۋداندىق فيليالى توراعاسىنىڭ ءبىرىنشى ورىنباسارى مۇقانجان كامالوۆ.
بۇل تسيفرلاندىرۋ سالاسىنداعى باستاپقى جۇمىستار, الداعى ۋاقىتتا وسى باعىتتا جۇمىستار جۇيەلى جۇرگىزىلە بەرمەك.
گۇلايىم شىنتەمىرقىزى, «ەگەمەن قازاقستان»
ماڭعىستاۋ وبلىسى