بۇگىنگى تاڭدا جاستار مەن جاسوسپىرىمدەر ءتۋريزمى مەن ولكەتانۋدى دامىتۋ ءبىزدىڭ مەملەكەتىمىزدە وتە وزەكتى ءارى ول ەلباسىنىڭ «بولاشاققا باعدار: رۋحاني جاڭعىرۋ» ماقالاسىندا قامتىلعان يدەيامەن ۇيلەسىم تابادى.
قازاقستاندا بالالار مەن جاسوسپىرىمدەر اراسىنداعى تۋريزم, ولكەتانۋ قىزمەتى سالاسىندا جيناقتالعان تاجىريبە از ەمەس. جاسوسپىرىمدەردىڭ تۋريستىك ورتالىقتارى حالىقارالىق قاتىناستار اياسىندا ىشكى جانە سىرتقى ءتۋريزمدى دامىتۋدا.
الايدا بالالار ءتۋريزمىن دامىتۋعا ارناۋلى تۋريستىك وكىلدەر سپەكترىنىڭ شەكتەۋلى بولۋى بالالار ءتۋريزمى ينفراقۇرىلىمىنىڭ دامىماۋى, زاڭدىق بازا جەتىسپەۋشىلىگى جانە بالالار ءتۋريزمىن دامىتۋداعى بىرىڭعاي ستاندارتتار قىزمەتىنىڭ جەتكىلىكسىزدىگى سياقتى فاكتورلار كەدەرگى بولۋدا. وسىنى ەسكەرەتىن بولساق, بۇگىنگى تاڭدا بالالار جانە جاسوسپىرىمدەر ءتۋريزمى مەن ولكەتانۋ رەسپۋبليكالىق ورتالىعىن قۇرۋ قاجەتتىلىگى تۋىنداپ وتىر. اتالعان ماسەلە بۇعان دەيىن دە بىرنەشە مارتە كوتەرىلگەن بولاتىن, دەگەنمەن بۇگىنگە دەيىن ناقتى شەشىمىن تاپپاي كەلەدى.
رەسپۋبليكالىق ورتالىقتىڭ جانىنان ەلوردادا رەسپۋبليكالىق جارىستار مەن فەستيۆالداردىڭ, سونىمەن قاتار جاس تۋريستەردىڭ ەكسكۋرسيالىق توپتارىن قابىلدايتىن ارنايى تۋربازالاردىڭ بولعانى جاقسى بولار ەدى. مۇنداي قۇرىلىم مىسالى, «تۋعان ولكەدەن – استاناعا دەيىن» اتتى رەسپۋبليكالىق تۋريستىك-ەكسكۋرسيالىق مارافوندى وتە ناتيجەلى وتكىزۋگە ىقپالىن تيگىزەتىنى ءسوزسىز. ال تۋريستىك-ولكەتانۋ باعىتىنداعى قوسىمشا ءبىلىم بەرۋ باعدارلاماسىن جۇزەگە اسىرۋشى ءبىلىم بەرۋ ۇيىمدارىنىڭ باسشىلارىنىڭ رەسپۋبليكالىق ۇيلەستىرۋ كەڭەسىنىڭ باسشىلىق دەڭگەيىن پرەمەر-ءمينيستردىڭ ورىنباسارى دەڭگەيىنە كوتەرسە, قۇبا-قۇپ بولار ەدى.
سونداي-اق بارلىق وقۋ ورىندارىنداعى, ءتىپتى ەڭ شالعاي قىستاقتارداعى بارلىق بالالاردى ءوزىنىڭ ىقپالىمەن قامتيتىن وبلىستىق, قالالىق, اۋداندىق ورتالىقتار نەمەسە بالالار ءتۋريزمى ستانسالار جەلىسىن قالىپتاستىرۋ بويىنشا شارالار قابىلداعان ءجون. رەسپۋبليكا بويىنشا مۇنداي ستانسالاردى قۇرۋ بارىسىندا, ولاردى جالعا الىناتىن ەمەس, مەنشىكتى ءۇي-جايلارمەن, جىل بويىنا سوزىلعان تۋريستىك كەشەندەرمەن نەمەسە ماۋسىمدىق تۋريستىك بازالارمەن قامتاماسىز ەتكەن دۇرىس. ارينە ولار قاجەتتى تۋريستىك قۇرال-جابدىقتارمەن تولىق قامتاماسىز ەتىلۋى قاجەت. ءبىزدىڭ ويىمىزشا, جوعارىدا ايتىلعان شارالاردى قابىلداۋ قوعامدىق سانانى جاڭعىرتۋعا باعىتتالعان مىندەتتەردى تولىققاندى جۇزەگە اسىرۋعا مۇمكىندىك بەرەدى. سوندىقتان ءبىز پرەمەر-مينيستر ب.ساعىنتاەۆتىڭ اتىنا دەپۋتاتتىق ساۋال جولداپ, اتالعان ماسەلەنى شەشۋ جولدارىن قاراستىرۋدى ۇسىندىق.
ناريمان تورەعاليەۆ, سەنات دەپۋتاتى