قازىرگى ۋاقىتتا زاڭ شىعارۋ فۋنكتسياسىن جۇزەگە اسىرۋ بارىسىندا پارلامەنتتىڭ دەپۋتاتتارى «قازاقستان رەسپۋبليكاسىنىڭ زاڭناما ينستيتۋتى» مم-مەن بىرلەسكەن جۇمىس جۇرگىزەدى, سونداي-اق «رەسپۋبليكالىق قۇقىقتىق اقپارات ورتالىعى» رمك قامتاماسىز ەتەتىن ءتۇرلى اقپاراتتىق-قۇقىقتىق جۇيەلەردىڭ كونتەنتىن بەلسەندى قولدانادى. بۇل ۇيىمدار ۆەدومستۆولىق تۇرعىدان ادىلەت مينيسترلىگىنە باعىنىشتى جانە زاڭ جوباسىنىڭ تيىمدىلىگىن ارتتىرۋعا, ۇكىمەت قىزمەتىن قۇقىقتىق تۇرعىدان قامتاماسىز ەتۋگە, ەلدەگى قۇقىقتىق ساياساتتى قالىپتاستىرۋ مەن ىسكە اسىرۋدىڭ ىقپالدى تەتىگىن جاساۋعا باعىتتالعان ايرىقشا مىندەتتەردى ورىندايدى. سونىمەن قاتار قۇقىقتىق عىلىمنىڭ ءرولىن كۇشەيتۋ ماقساتىندا زاڭناما ينستيتۋتى قۇقىق جانە زاڭناما سالاسىندا ىرگەلى جانە عىلىمي-قولدانبالى زەرتتەۋلەر جۇرگىزەدى, ولاردى جەتىلدىرۋ باعىتتارى بويىنشا ۇسىنىستار ازىرلەيدى.
الدارىنا قويىلعان ماقساتتارعا جەتۋ ءۇشىن وسى ەكى ۇيىم قىزمەتكەرلەرى كۇن سايىن قۇقىقتىق اكتىلەردىڭ جوبالارىن ازىرلەۋدەن باستاپ, ولار رەسمي جاريالانعانعا دەيىنگى قۇقىقتىق شىعارماشىلىق پروتسەستىڭ بارلىق ساتىسىندا ۇلكەن جۇمىس اتقارادى.
الايدا بۇگىنگى كۇنى ولاردىڭ الاتىن ەڭبەكاقىلارى اتقاراتىن جاۋاپتى دا اۋقىمدى مىندەتتەرىنە سايكەس ەمەس. وسى ماسەلە اتالعان ۇيىمدار كادرلارىن ءجيى اۋىسۋلار مەن تۇراقسىزدىققا ۇرىندىرىپ, ىنتالاندىرۋدىڭ تومەندىگى ۇلكەن پروبلەمالار تۋدىرىپ وتىر. ورىن العان جاعداي ەلىمىزدەگى زاڭ جوبالاۋ جۇمىسىنىڭ ساپاسىنا كەرى اسەر ەتۋى مۇمكىن.
وسىعان بايلانىستى ءبىز زاڭناما ينستيتۋتى مەن رەسپۋبليكالىق قۇقىقتىق اقپارات ورتالىعى قىزمەتكەرلەرىنىڭ ماتەريالدىق جاعدايىنا الاڭداۋشىلىق بىلدىرە وتىرىپ, ولاردىڭ زاڭ شىعارۋ سالاسىنداعى جۇمىسىن كۇشەيتۋ, كونسۋلتاتسيالىق قىزمەتتەر نارىعىنداعى ماڭىزدىلىعىن ارتتىرۋ ماقساتىمەن ولاردى بىرىكتىرۋ ارقىلى كوممەرتسيالىق ۇيىم نىسانىندا ارەكەت ەتەتىن كاسىپكەرلىك قىزمەتكە قاتىستىرۋ مۇمكىندىگىن قاراستىرۋ كەرەك دەپ پايىمدايمىز. بۇل بيۋدجەتتىڭ ۇنەمدەلۋىنە جاردەمدەسىپ, اتالعان ۇيىمداردى ۇستاۋ شىعىندارىن ازايتادى, سونىمەن بىرگە ولاردىڭ قىزمەت كورسەتۋ نارىعىندا تابىس تابۋىنا, سول ارقىلى ەڭبەكاقىلارىن ارتتىرۋعا جانە الەۋمەتتىك جاعدايىن جاقسارتۋعا مۇمكىندىك بەرەر ەدى دەپ ويلايمىز. حالىقارالىق تاجىريبەگە قارايتىن بولساق, وسىنداي زاڭناما ينستيتۋتتارى جانە قۇقىقتىق اقپارات ورتالىقتارى وزدەرىنىڭ كوپتەگەن قىزمەتتەرىن اقىلى نەگىزدە كورسەتەدى.
ءبىز وسى ايتىلعان ماسەلەلەردى ۇكىمەت باسشىسى ب.ساعىنتاەۆتىڭ قۇزىرىنا جەتكىزىپ, زاڭ جوبالاۋ جۇمىسىنىڭ ساپاسىن جانە جۇرگىزىلەتىن قۇقىقتىق رەفورمالاردىڭ تيىمدىلىگىن ارتتىرۋ ماقساتىندا اتالعان ۇيىمداردى بىرىكتىرىپ, ولارعا كوممەرتسيالىق ۇيىم مارتەبەسىن بەرۋ مۇمكىندىگىن قاراستىرۋدى وتىندىك.
اسقار بەيسەنباەۆ, سەنات دەپۋتاتى