فۋتبولدان 2017-18 جىلعى چەمپيوندار ليگاسى ءوز مارەسىنە جەتتى. كيەۆتە وتكەن ءتۋرنيردىڭ فينالدىق باسەكە «رەال مادريد» پەن «ليۆەرپۋل» اراسىندا ءوتىپ, ءتورت گول سوعىلعان ويىندا مادريد كومانداسىنىڭ 3:1 ەسەبىندەگى جەڭىسىمەن اياقتالدى.
ماتچتىڭ ءبىرىنشى تايمى قاقپاعا گول سوعىلماي تەڭ ەسەپپەن اياقتالدى. ال ەكىنشى تايمنىڭ 51-مينۋتىندا بەنزەما «ليۆەرپۋل» قاقپاشىسىنىڭ قاتەلىگىن ءتيىمدى پايدالانىپ, ويىنداعى ەسەپتى اشتى. جانكۇيەرلەر ەكىنشى گولدى كوپ كۇتكەن جوق. اعىلشىن كومانداسى قاقپاسىنا وتكىزىپ العان گولدان 4 مينۋتتان كەيىن ەسەپتى تەڭەستىرىپ كەتتى. گول اۆتورى – مانە. دەگەنمەن 64 جانە 83-مينۋتتاردا بەيلدىڭ سوققان گولدارى «رەالعا» ەۋروپا چەمپيوندار ليگاسىن قاتارىنان ءۇش رەت جانە جالپى 13-ءشى كۋبوگىن سىيلادى.
ءالي بيتورە,
«ەگەمەن قازاقستان»