بۇگىن استانا قالاسى ج.جاباەۆ اتىنداعى №4 مەكتەپ-گيمنازياسىندا ءلاززات ابدىلداقىزىنىڭ «قولونەر – رۋحاني جاڭعىرۋدىڭ جارقىن جولى» اتتى شەبەرلىك سىنىبى ءوتتى.
باسقوسۋدا ءلاززات ابدىلداقىزى ءوزىنىڭ وقۋشىلارى ارقىلى ءجۇندى ءيىرىپ, ودان ءجىپ جاساۋ, توقىما, كەستە توقۋ, ماتاعا سۋرەت سالۋ ادىستەرىن كورسەتتى. قازىر ونىڭ جەتەكشىلىگىمەن قولونەردىڭ قىر-سىرىن مەكتەپ وقۋشىلارى عانا ەمەس اتالعان ءبىلىم ورداسىنىڭ ۇستازدارى دا ۇيرەنىپ ءجۇر.
– بۇل باستامامدى قولعا العانىما دا جەتى-سەگىز جىلدىڭ كولەمى بولىپ قالىپتى. العاش رەت باستاعاندا مۇنداي دەڭگەيگە جەتەمىن دەپ ويلاماعان ەدىم, – دەيدى ءلاززات ابدىلداقىزى. – بۇلدىرشىندەر بارىنە يكەم كەلەدى. ۇيرەتكەنىڭدى بىردەن قاعىپ الادى. ەگەر وسى قالپىندا جالعاستىرار بولسا ەرتەڭ شاكىرتتەرىمنىڭ اراسىنان الەمگە تانىمال ديزاينەرلەر شىعاتىنىنا سەنىمدىمىن.
ءلاززات ابدىلداقىزى بۇدان بولەك ۇلتتىق كيىمدەردى تىگۋ, ساندەۋ جۇمىستارىن دا ۇيرەتەدى. ءىس-شارانىڭ كەلەسى بولىگىندە شاكىرتتەرى دايىنداعان كيىمدەردىڭ ءسان كورسەتىلىمى ءوتتى.