قارماقشى اۋدانىندا جاڭا مەكتەپ پەن بالاباقشا اشىلدى

قارماقشى اۋدانىنىڭ ورتالىعى جوسالى كەنتىندە ءۇ.تومانوۆ اتىنداعى № 183 مەكتەپتىڭ اشىلۋى ءوتتى.

وبلىس اكىمى مەكتەپ قىزمەتكەرلەرى مەن وقۋشىلارىن جاڭا عيماراتتىڭ اشىلۋىمەن قۇتتىقتادى.

«ەلباسىمىز نۇرسۇلتان ءابىش ۇلى نازارباەۆ 2020 جىلعا دەيىن ءبىلىم سالىسىنا قاتىستى 3 مىندەت قويعان بولاتىن: ءۇش اۋىسىمدىق جانە اپاتتىق مەكتەپتەردى جويۋ جانە 3-6 جاستاعى بۇلدىرشىندەردى بالاباقشامەن قامتۋ. ۇشەۋىن دە قىزىلوردا وبلىسى مەرزىمىنەن بۇرىن ورىندادى. 2015 جىلى ءۇش اۋىسىمدىق مەكتەپتەردى تۇبەگەيلى جويۋعا قول جەتكىزدىك جانە 3-6 جاس ارالىعىنداعى بۇلدىرشىندەردى مەكتەپكە دەيىنگى تاربيەمەن قامتاماسىز ەتۋدى مەرزىمىنەن بۇرىن 100 پايىزعا ورىندادىق. مۇندا مەملەكەتتىك-جەكەمەنشىك ارىپتەستىكتى دامىتۋدىڭ ۇلەسى باسىم ەكەنىن ايتۋ كەرەك. بۇگىنگى كۇنى بالاباقشالاردىڭ 66 پايىزى مەملەكەتتىك-جەكەمەنشىك   نەگىزىندە جۇمىس ىستەيدى.  سونداي-اق, 2016 جىلى ەكونوميكالىق كۇردەلى احۋالعا قاراماستان ءبىز اپاتتىق جاعدايداعى مەكتەپتەر ماسەلەسىن تولىقتاي شەشتىك. ءبىزدىڭ دارىندى دا قابىلەتتى بالالارىمىز وسىنداي شالعاي ەلدى مەكەندەردەگى مەكتەپتەردە دە بار ەكەندىگىنە ءشۇبامىز جوق. جاقسى وقىپ, مۋعالىمدەردىڭ سەنىمىن اقتاۋلارىڭىزعا تىلەكتەسپىن», - دەدى ايماق باسشىسى.

سونداي-اق, قارماقشى اۋدانىنىڭ يىركول اۋىلدىق وكرۋگىندە 50 ورىندىق «سامال» بالاباقشاسى پايدالانۋعا بەرىلدى.

بۇرىنعى بالاباقشا 1977 جىلى سالىنىپ, 1997 جىلى جابىلىپ قالعان. 2004 جىلى نىسان قايتا اشىلدى. دەگەنمەن, بالاباقشا عيماراتى تيپتىك جوباعا سايكەس بولماي, جاڭا عيمارات سالۋ قاجەت بولدى.ەندى اۋىلدا بارلىق جاعدايى جاسالعان جاڭا عيمارات سالىندى.

اتاپ وتەيىك, سوڭعى بەس جىلدىڭ وزىندە قارماقشى اۋدانىندا 4 مەملەكەتتىك بالاباقشا,  3 مەكتەپ, 3 اۋىلدىق كلۋب, 1 تاريحي ولكەتانۋ مۇراجايى, 3  دارىگەرلىك امبۋلاتوريا جانە تاۋلىگىنە 250 كەلۋشىگە ارنالعان اۋداندىق ەمحانانىڭ قۇرىلىسى جۇرگىزىلىپ, حالىق يگىلىگىنە بەرىلدى. ودان بولەك, تورەباي بي اۋىلدىق وكرۋگىندە بالاباقشانىڭ قۇرىلىسى جانە تورەتام كەنتىندە دەنە شىنىقتىرۋ ساۋىقتىرۋ كەشەنى قۇرىلىستارى جۇرگىزىلۋدە.

سونداي-اق, ايماق باسشىسى جالاعاش اۋدانىنىڭ «تاڭ» اۋىلدىق وكرۋگىندەگى «ماناق بابا» فەرمەرلىك قوجالىعىنىڭ جۇمىسىمەن تانىستى. قوجالىقتا وازيستىك سۋارۋ تەحنولوگياسى ەڭگىزىلىپ, 12 گا اۋماقتا جەمىس-جيدەكتەر مەپن كوكونىستەر وسىرىلۋدە.

ەستەرىڭىزگە سالا كەتەيىك, «جاسىل ەكونوميكاعا كوشۋ بارىسىندا قازاقستاندى قولداۋ» وازيستىك سۋارۋدىڭ گيبريدتىك جۇيەسىن ەڭگىزۋ پيلوتتىق جوباسى بۇۇدب باستاماسىمەن قىزىلوردا وبلىسىندا  جۇزەگە اسىرۋ ءۇشىن ۇسىنىلىپ, «استانا ەكسپو-2017» حالىقارالىق كورمە اياسىندا تانىستىرىلعان ەدى. وبلىس اكىمدىگى يننوۆاتسيالىق جوبانى قولداپ, ونى جۇزەگە اسىرۋ ءۇشىن جەر تەلىمىن بەردى.

جوبا اياسىندا جەراستى سۋىن كۇن ەنەرگياسىمەن شىعارىپ, ەگىستىك القاپتارعا جىبەرىلەدى. وازيستىك سۋارۋدىڭ ارقاسىندا ونى پايدالانۋ تيىمدىلىگى ارتادى. بولاشاقتا بۇل جوبا قازاقستاننىڭ باسقا ايماقتارىندا دا جالعاسىن تابادى.