اتىراۋ وبلىسىندا بەس مىڭنان استام مەكتەپ ءبىتىرۋشى ءۇشىن سوڭعى قوڭىراۋ سوعىلدى

اتىراۋ وبلىسىنىڭ اكىمى نۇرلان نوعاەۆ ء«بىلىم-يننوۆاتسيا» اتىراۋ وبلىستىق ليتسەي-ينتەرناتىن بىتىرۋشىلەردىڭ سوڭعى قوڭىراۋ سالتاناتىنا قاتىستى. بيىلعى جىلى 1993 جىلى اشىلعان  اتىراۋ وبلىستىق ليتسەي-ينتەرناتىنا  25 جىل تولادى.

ايتۋلى كۇندى مەرەكەلەۋ 49 تۇلەك ءبىتىرىپ وتىرعان ليتسەيدەگى وقۋ جىلىنىڭ اياقتالۋىمەن تۇستاس كەلدى.

ليتسەي ديرەكتورىنىڭ ورىنباسارى نۇربەك امانوۆتىڭ ايتۋىنشا  2017-2018 وقۋ جىلى وقۋ ورنى ءۇشىن جاقسى كورسەتكىشتەرمەن اياقتالدى.

- وسى وقۋ جىلىنىڭ تۇلەكتەرى وبلىستىق وليمپيادالاردا 45 جۇلدەلى ورىنداردى يەلەندى. رەسپۋبليكالىق دەڭگەيدە 12 وقۋشى ءتۇرلى جارىستار مەن وليمپيادالاردا جۇلدەلى ورىندار الدى. حالىقارالىق دەڭگەيدە 15 وقۋشى ءبىلىم بەرۋ كونكۋرستارىنىڭ جۇلدەگەرلەرى اتاندى, -دەدى ديرەكتوردىڭ وقۋ ءبولىمى جونىندەگى ورىنباسارى نۇربەك امانوۆ.

ليتسەيدىڭ ءۇش ءبىتىرۋشىسى گونكونگ جانە كانادانىڭ ۋنيۆەرسيتەتتەرىنە وقۋعا ءتۇستى. 12 تۇلەك نازارباەۆ ۋنيۆەرسيتەتىنە تىكەلەي گرانت الدى. سوڭعى قوڭىراۋ سالتاناتىنا اتىراۋ وبلىسىنىڭ اكىمى نۇرلان نوعاەۆ قاتىستى.

- مەملەكەت باسشىسى ءوز سوزدەرىندە جاستارىمىز الەمدىك ارەنادا باسەكەگە قابىلەتتى بولۋى قاجەتتىگىن ءجيى ايتىپ كەلەدى. مۇنىڭ نەگىزگى كريتەريلەرىنىڭ ءبىرى – ساپالى ءبىلىم الۋ. بۇگىنگى كۇنى وبلىس مەكتەپتەرىندە بۇل ءۇشىن بارلىق جاعداي جاسالعان. ءبىز مەكتەپتەردىڭ سانىن كوبەيتۋدەمىز, وقۋ ورىندارىنىڭ ماتەريالدىق-تەحنيكالىق بازاسىن جاقسارتۋدامىز. وسى ءساتتى پايدالانا وتىرىپ, اعىمداعى وقۋ جىلىن بىتىرۋشىلەردى قۇتتىقتايمىن, ولارعا جەتىستىكتەر, بىلىمگە دەگەن قۇشتارلىق پەن جەڭىستەر تىلەيمىن, - دەدى وقۋشىلارعا ارناپ سويلەگەن سوزىندە نۇرلان نوعاەۆ.