بۇگىن قوستاناي وبلىسىنا جۇمىس ساپارى اياسىندا قر پرەمەر-ءمينيسترى باقىتجان ساعىنتاەۆ رۋدنىي قالاسىندا «جاس قانات – 2006» جشس-دە بولدى, وندا «تسيفرلىق قازاقستان» مەملەكەتتىك باعدارلاماسى اياسىندا ىسكە اسىرىلىپ جاتقان «اقىلدى قۇس فابريكاسى» پيلوتتىق جوباسىنىڭ جۇمىسىمەن تانىستى, دەپ حابارلايدى primeminister.kz.
كاسىپورىندى ارالاۋ كەزىندە «جاس قانات – 2006» جشس ديرەكتورى قايرات مايشەۆ «بيزنەستىڭ جول كارتاسى – 2020» اياسىندا جۇرگىزىلىپ جاتقان جاڭعىرتۋ شارالارى تۋرالى ايتىپ بەردى. جالپى, كاسىپورىن جاڭعىرتۋدىڭ ءۇش كەزەڭىنەن ءوتتى, بارلىق قاجەتتى ينفراقۇرىلىم قۇرىلدى, ەڭ جوعارى تەحنولوگيالىق جابدىقتار ساتىپ الىندى. ينۆەستيتسيالار كولەمى 3 ملرد تەڭگەدەن اسادى.
پروتسەستەردى اۆتوماتتاندىرۋ جۇمىرتقا ءوندىرىسىن جىلىنا 7 ملن-نان 250 ملن داناعا, ياعني شامامەن 35 ەسەگە دەيىن ۇلعايتۋعا, ەت ءوندىرىسىن 30 توننادان 500 تونناعا دەيىن نەمەسە 15 ەسەگە ۇلعايتۋعا مۇمكىندىك بەردى. قۇستاردىڭ ورنى 100 مىڭنان 1,4 ملن-عا دەيىن نەمەسە 14 ەسەگە ارتتى. ەڭبەك ونىمدىلىگى 1,5 ەسەدەن استامعا ءوستى.
ب. ساعىنتاەۆقا سۇرىپتاۋ تسەحىندا قۋاتتىلىعى ساعاتىنا 120 مىڭ جۇمىرتقانى قۇرايتىن جاپوندىق «Nabel» جابدىعى تانىستىرىلدى. جاڭا تەحنولوگيالار ونىمدەردى قولمەن تاڭبالاۋ مەن سۇرىپتاۋدان بوساتۋعا مۇمكىندىك بەردى. بۇدان وزگە, كاسىپورىندا جۇمىرتقا سالاتىن قوراپتار شىعارۋ جەلىسى ىسكە قوسىلدى. ءوندىرىستى اۆتوماتتاندىرۋ كۇنىنە سەگىز ساعاتتىق جۇمىس كۇنىندە ميلليونعا جۋىق جۇمىرتقانى تاسىمالداۋعا جانە قاپتاۋعا مۇمكىندىك بەرەدى.
وندىرىلەتىن ءونىم ەلىمىزدىڭ بارلىق وڭىرلەرىندە ساتىلىپ, رەسەيگە, اۋعانستانعا, تاجىكستانعا جانە قىرعىزستانعا ەكسپورتتالادى. بيىل ءونىمدى يران مەن قىتايدىڭ جاڭا نارىقتارىنا ەكسپورتتاۋ باستالدى.
سونىمەن قاتار, الداعى ءۇش جىلدا تسيفرلىق تەحنولوگيالارعا 2 ملرد تەڭگەگە جۋىق ينۆەستيتسيا سالۋ جوسپارلانىپ وتىر. ERP (Enterprise Resource Planning) جۇيەسىن ەنگىزۋ تەحنولوگيالىق پروتسەستەردىڭ ساپاسىن جاقسارتۋعا جانە وندىرىستىك ماسەلەلەردى جەدەل شەشۋگە, سونىڭ ىشىندە قاشىقتان شەشۋگە جول اشادى. بۇدان وزگە, ودان ءارى جاڭعىرتۋ اياسىندا جۇمىرتقانى, ەت جانە باسقا دا ونىمدەردى تەرەڭ وڭدەۋگە ارنالعان اۆتوماتتاندىرىلعان جەلىنى ىسكە قوسۋ مۇمكىندىگى قاراستىرىلۋدا.
سونداي-اق, 2019–2021 جىلدارعا يمپورت الماستىرۋدى دامىتۋ ماقساتىندا الەمنىڭ جەتەكشى وندىرۋشىلەرىنىڭ تولىق اۆتوماتتاندىرىلعان جابدىعىمەن جابدىقتالعان اسىل تۇقىمدى رەپرودۋكتور قۇرىلىسى جوسپارلانعان. اتالعان جوبانى ىسكە اسىرۋ يمپورتتى 40% تومەندەتۋگە مۇمكىندىك بەرەدى.