«ەگەمەن قازاقستاننىڭ» ارنايى جوباسى: جاسامپازدىق جەمىستەرى
جيىرما جىلدىڭ ىشىندە اتقارىلعان يگى ىستەردىڭ ارقاسىندا ءاربىر ءوڭىرىمىز وزگەرىپ, ءومىرىمىز جاقسارىپ كەلەدى. «ەگەمەن قازاقستان» گازەتى وسىنداي وركەندى وزگەرىستەردى بەينەلەيتىن ماتەريالداردى تۇراقتى جاريالاپ تۇرادى. تومەندە قوستاناي وبلىسىنىڭ ناۋىرزىم اۋدانىنداعى شولاقساي اۋىلىنان فوتورەپورتاج بەرىلىپ وتىر.اۋىل ادامدارىمەن اجارلى
ناۋىرزىم اۋدانىنداعى شولاقساي اۋىلى وبلىس ورتالىعىنان ەكى ءجۇز شاقىرىم جەردە ورنالاسقان. تاۋەلسىزدىكتىڭ ەلەڭ-الاڭىنداعى قيىندىقتار شالعايداعى شولاقساي اۋىلىنىڭ دا ەسىندە. جوسپارلى ەكونوميكا كەتىپ, نارىق كەلدى. شارۋاشىلىقتى جاڭاشا ۇيىمداستىرۋ كەرەك بولدى. ءتۇرلى ۇلت وكىلدەرى ايرانداي ۇيىعان شولاقساي اۋىلى بار قيىندىقتاردى جەڭە ءبىلدى. ەلباسى نۇرسۇلتان نازارباەۆتىڭ سارابدال ساياساتىنىڭ ارقاسىندا دامۋدىڭ داڭعىل جولىنا تۇسكەن ەلمەن بىرگە ەڭسەسىن تىكتەدى. 90-شى جىلدارى ومىرزاق يحتيلياپوۆتاي بىلىكتى ۇيىمداستىرۋشى كەلمەگەندە شولاقساي دا «بولاشاعى جوق» اۋىلدار قاتارىنا ەنىپ, وبلىس كارتاسىنان ءوشىپ كەتەر مە ەدى, كىم ءبىلسىن. ومەكەڭ الدىمەن شارۋاشىلىقتى دۇرىستادى. قازىر «شولاقساي» جاۋاپكەرشىلىگى شەكتەۋلى سەرىكتەستىگى 20 مىڭ گەكتار جەرگە ەگىن ەگەدى. مال دا بار. ەشقانداي نەسيە الماستان, شارۋاشىلىقتىڭ ءوز قارجىسىنا تەحنيكا پاركىن جاڭارتتى. رەسەيدەن, كانادادان جەر وڭدەيتىن, ەگىن سەبەتىن كەشەن, گەرمانيالىق كومبايندار الىندى. زاماناۋي وزىق تەحنيكا بولماي, جەردى كۇتە المايسىڭ. ديقان كۇتىمى كەلىسكەندە عانا جەر-انا يەتىنىن شولاقسايلىقتار جاقسى بىلەدى. «شولاقساي» وبلىستاعى ءوز ۇشاعى بار ساناۋلى شارۋاشىلىقتىڭ ءبىرى. قازىر تەحنيكالار باياعىداي قاردىڭ استىندا جاتپايدى, قىسى بويى ارناۋلى انگارلاردا ساقتالادى. «شولاقساي» جاۋاپكەرشىلىگى شەكتەۋلى سەرىكتەستىگى اۋىلدا 500 ادامدى جۇمىسپەن قامتىپ وتىر. – اۋىلداستاردى جۇمىسپەن قامتۋ از. ادامدار اۋىلدا تۇرۋ ءۇشىن ولاردىڭ الەۋمەتتىك تۇرمىسىن جاقسارتۋ كەرەك. ادام تۇرماسا اۋىل قالاي كوركەيسىن, – دەيدى ومىرزاق يحتيلياپوۆ. بىلىكتى باسشىنىڭ ءسوزى مەن ىسىندە الشاقتىق جوق. شارۋاشىلىق اۋىل تۇرعىندارىنا ءشوپتىڭ تونناسىن 2 مىڭ تەڭگەدەن ساتىپ, ونى ءار ۇيگە ءتۇسىرىپ بەرەدى. وبلىستىڭ وزگە اۋداندارىمەن سالىستىرعاندا مۇنىڭ وتە ارزان ەكەنىن ايتقان ءلازىم. اۋىل ناۋبايحاناسىندا پىسىرىلگەن 800 گرامم بولكە ناندى اۋىلداستار نەبارى 25 تەڭگەدەن الادى. ال وبلىستا 600 گرامم بولكە نان 42 تەڭگە تۇرادى. شارۋاشىلىق تۇرعىندارعا كومىردىڭ تونناسىن 3 مىڭ تەڭگەدەن ءتۇسىرىپ بەردى. ال وبلىستا كومىردىڭ تونناسى كەم دەگەندە 7 مىڭ تەڭگە. وتكەن جىلى اۋىل مەكتەبى 12 ميلليون تەڭگەگە قايتا ءجوندەۋدەن وتكىزىلدى. بۇرىن قاڭقاسى قالعان بالاباقشانى قايتا جاساپ, قاتارعا قوسۋ شارۋاشىلىققا 10 ميلليون تەڭگەگە ءتۇستى. مەكتەپتى كومپيۋتەرلەندىردى, ينتەراكتيۆتى تاقتا دا الىپ بەردى. شالعاي اۋىلدىڭ بالالارى وركەنيەتتىڭ جەتىستىكتەرىنەن كەنجە قالىپ وتىرعان جوق. اۋىلدا كلۋب تا, مەيرامحانا دا بار. ەل ءىشى جانازاسىز, تويسىز بولمايدى, سونداي جيىنداردىڭ بارلىعى دا اۋىلدىڭ تويحاناسىندا وتەدى. شولاقساي اۋىلىنا تابيعاتتىڭ ءوزى نۇرىن توككەن جەر. بۇل اۋىلدىڭ ءار ۇيىندە سۋى بۇلاقتاي كاۋسار تۇششى قۇدىق بار. ومەكەڭ قايسىبىر جىلدارى جاستار قالاعا كەتسە, اۋىلدىڭ ەرتەڭى نە بولار ەكەن دەپ ويلانىپ جۇرەتىن. الەۋمەتتىك تۇرمىسى جاقسى اۋىلدان جاستار نەگە قاشسىن. ءوزىنىڭ ۇلى ماديدەن باستاپ, قالاعا ءتۇرلى وقۋعا كەتكەن مەكتەپ تۇلەكتەرى اۋىلعا كەلدى. پەداگوگيكا ينستيتۋتىن بىتىرگەن ءمادي العاشىندا اۋىل مەكتەبىندە مۇعالىم بولىپ ىستەدى دە, سوڭعى ونشاقتى جىلدا اكەسىنە كومەكتەستى. قازىر شارۋاشىلىقتى باسقارۋدى تولىقتاي ءوز مىندەتىنە العان. اكەسى ءبىر ىزگە سالىپ بەرگەن شارۋاشىلىقتى ءمادي ودان ءارى دامىتقىسى كەلەدى. جاس شارۋاشىلىق باسشىسىنىڭ ەگىنمەن قاتار, مال شارۋاشىلىعىن ءورىستەتكىسى, جەمىس باعىن وسىرگىسى جانە جاس ماماندارعا ارناپ ءۇي سالعىسى كەلەدى. اۋىل مەكتەبى ۇجىمىنىڭ 80 پايىزى جاس ماماندار. ولاردىڭ بارلىعى دەرلىك شولاقساي اۋىلىنىڭ ءوز جاستارى, كەشە عانا وسى مەكتەپتى ءبىتىرىپ شىققان تۇلەكتەر. جاس بولسا دا بىلىكتى باسشى ءمادي ولارعا باسپانا قاجەتتىگىن ءبىلىپ وتىر. مىنە, تاۋەلسىزدىكتىڭ ءار تاڭى شولاقساي اۋىلىنا نۇر سەپتى. كوركەيدى, ەرتەڭىنە دە سەنىمدى. قوستاناي وبلىسى, ناۋىرزىم اۋدانى, شولاقساي اۋىلى. ________________________________ ارنايى بەتتى دايىنداعان «ەگەمەن قازاقستان» گازەتىنىڭ قوستاناي وبلىسى بويىنشا مەنشىكتى ءتىلشىسى ءنازيرا جارىمبەتوۆا.