مەملەكەت باسشىسىنىڭ تاپسىرماسىنا سايكەس وسى جىلى اقتوبە وبلىسىندا «باقىتتى بالا» اۋقىمدى الەۋمەتتىك جوباسى جۇزەگە اسىرىلۋدا. ونىڭ باستى ماقساتى – بالالارعا, ولاردىڭ ينتەللەكتۋالدىق, فيزيكالىق, رۋحاني-ادامگەرشىلىك جاعىنانان دامۋىنا قولايلى جاعداي جاساۋ.
جوبانىڭ باستى باعىتتارىنىڭ ءبىرى بالالاردىڭ دەمالىسى مەن بوس ۋاقىتىن ءتيىمدى پايدالانۋىن ۇيىمداستىرۋ, سونىمەن قاتار ولاردى ساۋىقتىرۋ بولىپ تابىلادى. وسى جىلدىڭ جازىندا 118 مىڭ اقتوبەلىك وقۋشى نەمەسە بارلىق بالانىڭ 93 %-ى لاگەرلەردە دەمالا الادى, سونىڭ ىشىندە الەۋمەتتىك جاعدايى تومەن وتباسىلاردان شىققان 16 مىڭ بالاعا جانە 700 قيىن بالاعا جولداما بەرىلەدى.
بۇگىندە وبلىس بويىنشا قالا سىرتىندا ون لاگەر جۇمىس جاسايدى, وندا وقۋشىلاردى قابىلداۋعا دايىندىق بەلسەندى تۇردە ءجۇرىپ جاتىر. بۇعان قوسا, دارىندى بالالارعا ارنالعان «ۆوستوك» جىل بويعى لاگەرى جۇمىس جاسايدى. «اسەم» بالالار لاگەرىنىڭ جانىنان «ارتەك» ۇلگىسىندەگى جىل بويعى دەمالىس بازاسى قۇرىلۋدا.
العا اۋدانىنىڭ بەستاماق اۋىلىندا التى كەزەڭنىڭ ىشىندە 600-دەي بالانى قابىلدايتىن قازاقستانداعى العاشقى ينكليۋزيۆتى لاگەر اشىلادى. مۇندا ەرەكشە ءبىلىم بەرۋدى قاجەت ەتەتىن بالالارعا دەفەكتولوگتار, لوگوپەدتەر, پسيحولوگتار, فيزيكالىق تەراپيا وقىتۋشىلارى مەن باسقا دا مامانداندىرىلعان مۇعالىمدەر كومەك بەرەدى. لاگەردە سونداي-اق, لوگوپەد, سەنسورلى كابينەتتەر, ماسساج بەن فيزيوتەراپيا كابينەتتەرى جۇمىس جاساپ, ينكليۋزيۆتى بالالار الاڭى قۇرىلماق. ايتا كەتەيىك, قوبدا اۋدانىنىڭ ەگىندىبۇلاق اۋىلىندا تاعى ءبىر جىل بويعى لاگەردىڭ قۇرىلىسىنا دايىندىق باستالدى.
بيىل 366 وقۋشى الماتى وبلىسىنداعى «بوبەك» جانە اقمولا وبلىسىنداعى «بالداۋرەن» رەسپۋبليكالىق ساۋىقتىرۋ لاگەرلەرىنە بارادى. تاعى 70 بالا «قاپشاعاي-بالداۋرەن» رەسپۋبليكالىق ءبىلىم بەرۋ-ساۋىقتىرۋ لاگەرىندە دەمالادى.
وقۋدا ەرەكشە جەتىستىگىمەن, شىعارماشىلىق جانە سپورتتا ۇزدىك بولعان وقۋشىلار وبلىس اۋماعىنان تىس جەرلەردە دەمالۋعا اتتانادى. وسىلايشا, وبلىستىڭ 3350 وقۋشىسى «باقىتتى بالا» جوباسى اياسىندا الماتى, وڭتۇستىك-قازاقستان, قىزىلوردا جانە جامبىل وبلىستارىنىڭ قاسيەتتى جەرلەرىندە ساياحات جاساسا, 2600 وقۋشى تۋعان ءوڭىردىڭ مادەني جانە تاريحي كورىكتى جەرلەرىمەن تانىسۋ ءۇشىن «ىرعىز-تورعاي» تابيعي قورىعىنا بارادى. اقتوبە وبلىسىنىڭ تاريحى تۋرالى كوبىرەك بىلۋگە جانە دەمالۋعا ەلىمىزدىڭ وزگە ايماقتارىنان 70 وقۋشى دەمالۋعا مۇمكىندىك الادى.
شىعىس قازاقستان وبلىسىنىڭ «دارىن» لاگەرىنە 400 بالا, تاعى 120 بالانى رەسەي فەدەراتسياسى ورىنبور وبلىسىنىڭ «سولنەچنايا سترانا» لاگەرىنە جىبەرىلەدى. بەس دارىندى بالا تاتارستاندىق «بايتيك» لاگەرىندە روبوتوتەحنيكا سالاسىن تەرەڭىرەك ۇيرەنۋگە مۇمكىندىك السا, تاعى ءبىر جاس اقتوبەلىك مالايزيانىڭ ارنايى لاگەرىندە شەت تىلىنەن ءبىلىمىن تەرەڭدەتە الادى.
سونىمەن قاتار, قازاقستان مەن قىتاي حالىق رەسپۋبليكاسىنىڭ اراسىنداعى ىنتىماقتاستىق تۋرالى كەلىسىم بويىنشا اقتوبە وبلىسىنىڭ وقۋشىلارى ءۇشىن قىتاي لاگەرىندە دەمالۋعا 5 كۆوتا بولىنگەن. سونداي-اق, وزبەكستاننىڭ قازاقستانداعى جىلى اياسىندا تامىز ايىندا بايقوڭىر-تۇركىستان-تاشكەنت-سامارقاند باعىتىمەن 100 بالاعا ارنالعان تۋريستىك ساپار ۇيىمداستىرىلادى.
تەمىر قۇسايىن,
«ەگەمەن قازاقستان»
اقتوبە وبلىسى