سەمەيدەگى ينتەرنات تاربيەلەنۋشىلەرى «وتانىمىز – كەڭەس وداعى, استانامىز – ماسكەۋ» دەپ جازىلعان وقۋلىقتارمەن وقىپ جاتىر

سەنەسىز بە, سەنبەيسىز بە, سەمەيدەگى ەستۋ قابىلەتى بۇزىلعان بالالارعا ارنالعان مەكتەپ-ينتەرناتتىڭ تاربيەلەنۋشىلەرى ءالى كۇنگە دەيىن, ەلىمىزدىڭ تاۋەلسىزدىك العانىنا 30 جىلعا جۋىقتاسا دا وسىنداي شۋماقتاردى وقىپ, جاتتاۋعا ءماجبۇر بولىپ كەلەدى. مۇنى جاقىندا وبلىسىمىزعا جۇمىس ساپارىمەن كەلگەن مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ جانىنان قۇرىلعان رەسپۋبليكالىق ارنايى مونيتورينگتىك توپتىڭ مۇشەلەرى انىقتادى. «مەنىڭ سوزىمە سەنبەسسىزدەر بالكىم. بىراق شىندىعى وسى, بالالارىمىز «وتانىمىز - كسرو, ەلدىڭ باستى قالاسى – ماسكەۋ» دەپ جازىلعان وقۋلىقپەن وقىپ جاتىر», - دەگەن-ءدى رەسپۋبليكالىق ارنايى مونيتورينگتىك ءتوپتىڭ تورايىمى ايگۇل سولوۆيوۆا وسكەمەندە وتكەن جيىندا.

رەسپۋبليكالىق ارنايى مونيتورينگتىك توپتىڭ مۇشەسى قوبلانبەك قوجين ءوزىنىڭ فەيسبۋكتەگى پاراقشاسىندا وسى جايتكە قاتىستى ينتەرنات تاربيەلەنۋشىلەرىنىڭ اتا-انالاردىڭ بىرىنەن شاعىم تۇسكەنىن جازىپتى.

«ناشا رودينا – سوۆەتسكي سويۋز», «ۆەزدە ي ۆو ۆسەم يميا لەنينا س نامي» - سەمەيدەگى ەستۋ قابىلەتى بۇزىلعان بالالارعا ارنالعان ينتەرناتتىڭ بالالارىنىڭ وقيتىنى – وسى. ولار سوۆەت زامانىنداعى, 1983 جىلى شىققان وقۋلىقتارمەن وقۋعا ءماجبۇر. ويتكەنى, جاڭا وقۋلىقتار جوق. وكىنىشكە قاراي بىز ازىرگە مۇمكىندىگى شەكتەۋلى بالالارعا نە قازاق, نە ورىس تىلىندە زامان تالابىنا ساي بىردە-ءبىر وقۋلىق شىعارا المادىق», - دەپ پىكىرىن ءبىلدىرىپتى رەسپۋبليكالىق ارنايى مونيتورينگتىك توپتىڭ مۇشەسى راقىم وشاقباەۆ ءوزىنىڭ فەيسبۋكتەگى پاراقشاسىندا.

شىنىمەن, وقۋلىق جەتپەي جاتىر ما؟ بۇل تاراپتا قانداي تۇيتكىلدەر بار؟ ماسەلەنىڭ انىق-قانىعىنا كوز جەتكىزەيىك دەپ وبلىستىق ءبىلىم باسقارماسىنا حابارلاسقانىمىزدا ونداعىلار ءبىلىم مينيسترلىگىنىڭ 2017 جىلعى 27 شىلدەدەگى №352 بۇيرىعىمەن مەكەمەدەگى ساباقتار جاڭارتىلعان ءبىلىم مازمۇنىنا سايكەس وقىتىلاتىنىن, ال 1987 جىلى شىققان «رازۆيتيە رەچي» وقۋلىعىن پەداگوگتار ورىس ءتىلى مەن وقۋ ساباعىنا قوسىمشا جاتتىعۋ رەتىندە پايدالانىلاتىنىن جەتكىزدى.

«مەكتەپكە دەيىنگى دايارلىق توبىنداعى ساباق جالپى ءبىلىم بەرەتىن مەكتەپتەردىڭ 1-10 سىنىپتارعا ارنالعان وقۋلىقتارى (2000-2016 جىلدارى شىققان) نەگىزىندە جۇرگىزىلەدى. 2018 جىلدىڭ 1 قاڭتارىنان 5-7 سىنىپتاردا ورىس ءتىلى, حيميا, بيولوگيا, الگەبرا, گەومەتريا پاندەرى 2017 جىلى شىققان جالپى ءبىلىم بەرەتىن وقۋلىقتارمەن وقىتىلىپ جاتىر», - دەلىنگەن وبلىستىق ءبىلىم باسقارماسى باسشىسىنىڭ مىندەتىن اتقارۋشى سايرانگۇل ءجۇمادىلوۆانىڭ ءبىلىم جانە عىلىم مينيسترلىگىنىڭ جالپى جانە ورتا ءبىلىم دەپارتامەنتىنە بەرگەن جاۋابىندا.

وبلىستىق ءبىلىم باسقارماسى ءبىلىم مينيسترلىگىنە بەرگەن جاۋابىندا يدەولوگيالىق تۇرعىدان ابدەن ەسكىرگەن, بۇگىنگى زامان تالابىنا مۇلدە سايكەس كەلمەيتىن وقۋلىقتاردىڭ الداعى ۋاقىتتا ينتەرناتتىڭ وقۋ باعدارلاماسىنان الىناتىنى-الىنبايتىنى جايىندا ءسوز قوزعاماپتى. الدە «قوسىمشا رەتىندە» ودان ءارى وقىتىلا بەرە مە؟ دەگەنمەن دە ءبىلىم مينيسترلىگى اتالعان جايتكە ءجىتى نازار اۋدارىپ, ءتيىستى شەشىم قابىلدايدى دەپ ءۇمىت ەتەمىز.  ​​​​​​ازامات قاسىم,

«ەگەمەن قازاقستان»

شىعىس قازاقستان وبلىسى