قازىرگى ۋاقىتتا سەمەي ورمانىندا اتىشۋلى ءورت وقيعاسىنان كەيىن, كەلگەن شىعىنداردى ەسەپتەۋ جۇمىستارى قولعا الىنۋدا. بۇل بيىل العاش رەت تىركەلگەن وقيعا بولىپ وتىر.
ورمان رەزەرۆاتىندا بىلتىر 250 ءورت وقيعاسى بولسا, ولاردىڭ بارلىعى دا كۇن كۇركىرەپ, اعاشتارعا نايزاعاي ءتۇسۋى سياقتى تابيعات قۇبىلىسىنا بايلانىستى بولىپتى. جانە تۇتانعان كەزدە بىردەن ءوشىرىلىپ وتىرعان. سەبەبى, قازىردە «سەمەي ورمانى» مەملەكەتتىك تابيعي ورمان رەزەرۆاتىندا ءورت وقيعاسىن الدىن الا ءۇش كۇن بۇرىن انىقتاي الاتىن قۇرال-جابدىق ورناتىلىپتى. تۇگەلدەي بولماا دا, قاناتقاقتى جوبا رەتىندە ورماننىڭ ءبىراز تۇسىنداعى قاداعالاۋشى مۇنارالاردىڭ باسىندا تۇر. سونداعى باقىلاۋ جۇيەسىنىڭ بەلگىلەرى مەكەمە ىشىندەگى كەزەكشى وپەراتورعا دەرەۋ تۇسەدى ەكەن.
-بۇل سەمەي ورمانىنىڭ بارلىق فيليالدارىندا ازىرشە ورناتىلعان جوق, قاناتقاقتى جوبا رەتىندە ەۋروپالىق قايتا قۇرۋ جانە دامۋ بانكىنىڭ كومەگىمەن ورناتىپ ەدىك, كوپ پايداسى تيەتىندىگىن اڭعاردىق,-دەدى «سەمەي ورمانى» مەملەكەتتىك تابيعي ورمان رەزەرۆاتىنىڭ ديرەكتورى مۇرات داۋلەتوۆ,-ماسەلەن, نايزاعاي ءتۇسىپ, ول جەردە كوڭىرسىپ, وت جانىپ جاتۋى مۇمكىن. سول كەزدە كۇنى كەشەگىدەگىدەي قالىڭ ءورت الىپ كەتپەس ءۇشىن, وسى جۇيە بىزگە الدىن الا ءسال عانا شىققان ءتۇتىندى كورسەتىپ حابارلايدى. 24 ساعات بويى ۇزدىكسىز جۇمىس ىستەيدى. كەزەكشى وپەراتور بەلگىنى كورىپ, دەرەۋ ءورت سوندىرۋشىلەرگە حابارلاسادى. ارينە, كەشە ورتەنگەن تۇستا بۇنداي قۇرال-جابدىعى بار, باقىلاۋ جۇيەسىنە تىركەلگەن مونيتور بولمادى. بۇنداي جابدىق بەسقاراعاي اۋدانىنداعى بولىمشەلەرىمىزدە دە جوق بولىپ وتىر. ماسەلەن, بەگەن, دولون, بوكەباي, تاليتسا, ءتىپتى سەمەي فيليالىنىڭ ءبىراز جەرىندە ءالى ورناتىلماعان. جاقىندا عانا مەملەكەت تاراپىنان وسى قاناتقاقتى مۇنارالىق قاداعالاۋ جۇيەسى قولداۋ تاپتى. سوعان وراي الداعى ۋاقىتتا سەمەي ورمانى مەن كورشى پاۆلودارداعى ەرتىس ورمانى اۋماعىنا وسى جابدىق تولىق ورناتىلاتىن بولدى.بۇل ورمانشىلار ءۇشىن اسا قاجەت باقىلاۋ جۇيەسى.
راۋشان نۇعمانبەكوۆا
سەمەي