پرەزيدەنت جانىنداعى قوعامدىق سانانى جاڭعىرتۋ باعدارلاماسىن ىسكە اسىرۋ جونىندەگى ۇلتتىق كوميسسيانىڭ حاتشىسى, پرەزيدەنت Əكىمشىلىگى ىشكى ساياسات ءبولىمىنىڭ مەڭگەرۋشىسى ايدا بالاەۆا ارنايى ساپارمەن قاراعاندىعا كەلىپ, ە.بوكەتوۆ اتىنداعى قارمۋ-دا «رۋحاني جاڭعىرۋ» باعدارلاماسىن جۇزەگە اسىرۋ بارىسىن تالقىلاعان جيىن وتكىزدى.
القالى باسقوسۋعا «نۇر وتان» پارتياسىنىڭ حاتشىسى ف.قۋانعانوۆ, ءبىلىم جانە عىلىم مينيسترلىگىنىڭ جاۋاپتى حاتشىسى ا.ورساريەۆ, قاراعاندى وبلىسى اكىمىنىڭ ورىنباسارى ج.ابىشەۆ, قاراعاندى وبلىستىق قوعامدىق كەڭەسىنىڭ توراعاسى ە.ايماعامبەتوۆ, «رۋحاني جاڭعىرۋ» باعدارلاماسى بويىنشا ايماقتىق ساراپتامالىق كەڭەس مۇشەلەرى مەن قارمۋ-دىڭ پروفەسسور-وقىتۋشىلار قۇرامى, ماگيسترانتتارى مەن ستۋدەنتتەرى قاتىستى.
لاۋازىمدى قوناقتار وقۋ ورنىنداعى «تۇلعاتانۋ» ورتالىعىنىڭ جۇمىسىمەن تانىستى. ايدا بالاەۆا بولاشاق مامانداردى وقىتۋ مەن تاربيەلەۋدە اۋقىمدى جۇمىستار اتقارىپ كەلە جەتقان قارمۋ ۇجىمىنا ريزاشىلىعىن ءبىلدىردى.
– جاڭا تاريحي كەزەڭگە اياق باسقاندا قابىلدانعان «رۋحاني جاڭعىرۋ» باعدارلاماسى – مەملەكەت كەلەشەگىنىڭ ايقىن جوسپارلانعان باعىتى. قوعامدىق سانانى جاڭعىرتىپ, جارقىن بولاشاققا جەتۋ مۇمكىندىگىنە ءبىز ۇلكەن جاۋاپكەرشىلىكتى سەزىنۋ ارقىلى عانا يە بولامىز, – دەدى ايدا عالىمقىزى ءوز سوزىندە.
«رۋحاني جاڭعىرۋ» باعدارلاماسى سانانى جاڭعىرتىپ, باسەكەگە قابىلەتتىلىكتى دامىتۋمەن قاتار, وزىق وتىز ەلدىڭ قاتارىنا قوسىلۋ ماقساتىنداعى شارالاردى جۇزەگە اسىرۋدى كوزدەيدى. باعدارلامانىڭ ماڭىزدىلىعى مەن قاجەتتىلىگىن حالىققا جەتكىزە ءبىلۋ كەرەك.
كەزدەسۋ بارىسىندا, سونىمەن قاتار, لاتىن گرافيكاسىنا كوشۋگە, «100 جاڭا كىتاپ», «100 جاڭا ەسىم», «قازاقستاننىڭ كيەلى جەرلەرىنىڭ گەوگرافياسى», «جاھانداعى زاماناۋي قازاقستاندىق مادەنيەت» جوبالارىنا قاتىستى ماسەلەلەر تالقىلاندى.
كەزدەسۋدى قورىتىندىلاي كەلە, ا.بالاەۆا «رۋحاني جاڭعىرۋ» باعدارلاماسى اياسىنداعى جوبالار بويىنشا ۋنيۆەرسيتەت ۇجىمىنا ناقتى تاپسىرمالار بەردى. سونىمەن قاتار, وسى جىلدىڭ تامىز ايىنا دەيىن باعدارلامانىڭ بارلىق باعىتتارى بويىنشا ناقتى جوبالار ۇسىنىپ, ولاردى جۇزەگە اسىرۋ جولدارىن كورسەتۋگە ۇسىنىس جاسادى.
قايرات ءابىلدا,
«ەگەمەن قازاقستان»
قاراعاندى