كەشە پارلامەنت سەناتىنىڭ توراعاسى قايرات ءماميدىڭ توراعالىق ەتۋىمەن پالاتانىڭ كەزەكتى جالپى وتىرىسى بولدى. وندا «قازاقستان رەسپۋبليكاسى مەملەكەتتىك تاۋەلسىزدىگىنىڭ 20 جىلدىعىنا بايلانىستى راقىمشىلىق جاساۋ تۋرالى» زاڭ قابىلداندى. ونى تالقىلاۋ بارىسىندا توراعا «Penal Reform International» (حالىقارالىق ءتۇرمەلەر ۇيىمى) ۇيىمى ورتالىق ازياداعى وكىلدىگىنىڭ دەرەكتەرى بويىنشا حالىقتىڭ ءار 100 مىڭ ادامىنا شاققاندا, وقشاۋلانعان ادامدار سانى جونىنەن قازاقستان دۇنيە جۇزىندە 22-ورىن الاتىنىن ايتتى. بۇل ۇيىم پايدالانعان مالىمەتتەر بويىنشا ءبىزدىڭ ەلىمىزدە باس بوستاندىعىنان ايىرۋ ورىندارىندا 52,6 مىڭ ادام بار. بۇل دا ءدال مالىمەت ەمەس, ويتكەنى, وندا ەكى دەرەك قانا جيناقتالىپ كورسەتىلگەن: كولونيالارداعى ادامدار سانى – 45 مىڭنان استام, سونداي-اق تەرگەۋدەگى وقشاۋلاۋ ورىندارىنداعى ادامدار سانى – 7 مىڭعا جۋىق, ياعني ءالى سوتتالماعاندار, دەي كەلىپ, توراعا بۇل ءماسەلەنى بارىنشا مۇقيات جانە كاسىبي تۇرعىدا قاراۋ قاجەتتىگىن اتاپ ءوتتى.
وتىرىستا «گاز جانە گازبەن جابدىقتاۋ تۋرالى» زاڭ جوباسى سەنات ەنگىزگەن وزگەرىستەرىمەن جانە تولىقتىرۋلارىمەن قابىلداندى. ودان باسقا, «مەملەكەتتىك قۇقىقتىق ستاتيستيكا جانە ارنايى ەسەپكە الۋ تۋرالى» زاڭعا ءوزگەرىستەر مەن تولىقتىرۋلار ەنگىزۋ تۋرالى», «كەيبىر حالىقارالىق ۇيىمداردىڭ جارعىلىق قۇجاتتارىن بەكىتۋ تۋرالى» زاڭعا وزگەرىس پەن تولىقتىرۋ ەنگىزۋ تۋرالى» زاڭ جوبالارى قابىلداندى.
قارالعان ماسەلەلەر بويىنشا ەكونوميكالىق دامۋ جانە ساۋدا ءمينيسترى ق.كەلىمبەتوۆ, مۇناي جانە گاز ءمينيسترى س.مىڭباەۆ, ادىلەت ءمينيسترى ر.تۇسىپبەكوۆ, ستاتيستيكا اگەنتتىگىنىڭ توراعاسى ءا.سمايىلوۆ ءتيىستى تۇسىنىكتەمەلەر بەردى.
وتىرىستا سونداي-اق ۇيىمدىق ماسەلەلەر قارالدى. اتاپ ايتقاندا, پارلامەنت سەناتىنىڭ ءۇش تۇراقتى كوميتەتىنىڭ اتاۋى ءوزگەردى. ولار كونستيتۋتسيالىق زاڭناما, سوت جۇيەسى جانە قۇقىق قورعاۋ كوميتەتى, ەكونوميكالىق دامۋ جانە كاسىپكەرلىك كوميتەتى, تابيعاتتى پايدالانۋ جانە اۋىلدىق اۋماقتاردى دامىتۋ كوميتەتى بولىپ اتالادى.
سونداي-اق پالاتاداعى تۇراقتى كوميتەتتەردىڭ توراعالارى مەن مۇشەلەرى سايلاندى. كونستيتۋتسيالىق زاڭناما, سوت جۇيەسى جانە قۇقىق قورعاۋ كوميتەتىنىڭ ءتوراعاسى بولىپ بەرىك يماشەۆ, قارجى جانە بيۋدجەت كوميتەتىنىڭ توراعاسى بولىپ راشيت احمەتوۆ, حالىقارالىق قاتىناستار, قورعانىس جانە قاۋىپسىزدىك كوميتەتىنىڭ توراعاسى بولىپ يكرام ادىربەكوۆ, ەكونوميكالىق دامۋ جانە كاسىپكەرلىك كوميتەتىنىڭ توراعاسى بولىپ تالعاتبەك ءابايدىلدين, الەۋمەتتىك-مادەني دامۋ كوميتەتىنىڭ توراعاسى بولىپ اقان بيجانوۆ, تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنىڭ ءتوراعاسى بولىپ بولات جىلقىشيەۆ سايلاندى.
جاقسىباي سامرات.