كەشە قايرات ءماميدىڭ توراعالىق ەتۋىمەن پارلامەنت سەناتى بيۋروسىنىڭ وتىرىسى بولدى. ءبىرىنشى كەزەكتە قازاقستان رەسپۋبليكاسى مەملەكەتتىك تاۋەلسىزدىگىنىڭ جيىرما جىلدىعى دەكلاراتسياسىنىڭ جوباسىنا قاتىستى ماسەلە قارالدى, دەپ حابارلادى پارلامەنت سەناتىنىڭ ءباسپاسوز قىزمەتى.
قۇجات جوباسىن بيىلعى 10 جەلتوقساندا بولاتىن پارلامەنت سەناتىنىڭ وتىرىسىندا قاراۋ جوسپارلانىپ وتىر. ق.ءمامي اتاپ وتكەندەي, قوعامدى توپتاستىراتىن جاڭا قۇجات بولعالى وتىرعان دەكلاراتسيانى پارلامەنتتە قابىلداۋ تۋرالى باستاماعا مەملەكەت باسشىسى قولداۋ بىلدىرگەن بولاتىن.
دەكلاراتسيادا قازاقستاننىڭ مەملەكەت قۇرىلىسىنداعى تۇڭعىش پرەزيدەنت – ەلباسى نۇرسۇلتان نازارباەۆتىڭ كورنەكتى ءرولى اتاپ وتىلگەن. مەملەكەت باسشىسىنىڭ جەتەكشىلىگىمەن اۋقىمدى ساياسي, ەكونوميكالىق جانە الەۋمەتتىك رەفورمالار ىسكە اسىرىلدى. «تاۋەلسىزدىكتىڭ العاشقى جىلدارىندا پرەزيدەنت ن.نازارباەۆ بەلگىلەگەن باعىت ءوزىنىڭ ءومىرشەڭدىگىن دالەلدەدى جانە «قازاقستاندىق دامۋ جولى» رەتىندە الەمگە تانىلدى», – دەدى ق.ءمامي.
توراعا اتاپ وتكەندەي, دەكلاراتسيانى ازىرلەۋ اياسىندا پارلامەنتتە ارنايى جۇمىس توبى قۇرىلدى. وندا قۇجاتتىڭ نەگىزگى ءمان-ماعىناسى, قۇرىلىمدىق جانە مازمۇندىق جاعى ناقتىلاندى. ق.ءمامي دەكلاراتسيا قابىلدانعاننان كەيىن مەملەكەت باسشىسىنا جىبەرىلەتىنىن ايتتى. قۇجات ءماتىنى رەسمي بۇقارالىق اقپارات قۇرالدارىندا جاريالاناتىن بولادى.
بيۋرودا ودان باسقا بيىلعى 14 جەلتوقساندا بولاتىن سەناتتىڭ كەزەكتى جالپى وتىرىسىنىڭ كۇن ءتارتىبى بەلگىلەندى.