«قايسار» سپورت كلۋبىنىڭ تاربيەلەنۋشىسى جاپوندىق وكيناۆا ارالىندا كاراتە-دودان ەرەسەكتەر مەن جاسوسپىرىمدەر اراسىندا وتكەن ازيا چەمپيوناتىنا قاتىستى. ازيا چەمپيناتىنا ءار ءتۇرلى مەملەكەتتەن 700-گە جۋىق سپورتشى قاتىستى. جارىستا الەم جانە ازيا چەمپيوناتىنىڭ جۇلدەگەرلەرى دە باق سىنادى, دەپ حابارلايدى اتىراۋ وبلىستىق وڭىرلىك كوممۋنيكاتسيالار قىزمەتى.
17 جاسار اتىراۋلىق ءابىلمانسۇر باتىرعالي 68 كگ دەيىنگى سالماق دارەجەسىندە جانە «يۋنيورى» جاس ساناتىندا سىنعا ءتۇستى. سپورتشى 4 كەزدەسۋ وتكىزىپ, شري-لانكا, وزبەكستان, تايلاند جانە يراندىق قارسىلاستارىنان باسىپ ءتۇسىپ, ازيا چەمپيونى اتاندى.
- ەڭ قيىن كەزدەسۋ فينالدا يراندىق سپورتشىمەن بولدى. بارلىعىنا بەلگىلى, يراندا بارلىق جەكپە-جەك تۇرلەرى جاقسى دامىعان, قارسىلاسىم وتە جاقسى دايىندالعان, سوندىقتان ءبىز سوڭىنا دەيىن بىردەي ۇپايدا بولدىق. بىراق, ماعان جەڭىس بۇيىردى,- دەيدى ءابىلمانسۇر باتىرعالي. جاتتىقتىرۋشى سانسىزباي تورعاەۆتىڭ ايتۋىنشا, جارىس جاسوسپىرىمدەرگە بۇدان دا جوعارى دەڭگەيدەگى جارىستارعا جولداما بولدى.
- الداعى ۋاقىتتا ءابىلمانسۇر بولگاريادا وتەتىن جاستار اراسىنداعى حالىقارالىق دەڭگەيدەگى جارىسقا قاتىسادى. وندا جەڭگەن سپورتشى ارگەنتيناداعى بۋەنوس-ايرەس قالاسىنداعى جاستار وليمپياداسىنا جولداما الادى,- دەيدى سانسىزباي تورعاەۆ.
ايتا كەتەيىك, 17 جاسا ءابىلمانسۇر باتىرعالي وتكەن جىلى استانادا وتكەن ازيا چەمپيوناتىنىڭ كۇمىس جۇلدەگەرى اتانعان بولاتىن, سول جىلى كاراتە-دودان الەم كۋبوگىنىڭ يەگەرى بولدى, سپورت شەبەرىنە ۇمىتكەر.