ەلىمىزدەگى ۇلكەندى-كىشىلى قالالار, سونىڭ ىشىندە وبلىس ورتالىقتارى ەلورداسى –استاناعا قاراپ بوي تۇزەسە, وركەندەۋدىڭ جاڭا ءبىر ءورىسى اشىلارى انىق. سونداي-اق وسى ارقىلى وڭىرارالىق ىنتىماقتاستىقتى ودان ءارى دامىتۋ ىسىنە دە سونى سەرپىن بەرىلمەك. ەكى جاققا دا پايداسى مەن تيىمدىلىگى مول قارىم-قاتىناستار استانانىڭ 20 جىلدىعى قارساڭىندا تۇندىگىن ءتۇرىپ جاتسا, تىپتەن عانيبەت.
وسى ورايدا اقتوبەدە 3 كۇنگە سوزىلعان استانا قالاسىنىڭ اقتوبە وبلىسىنداعى كۇندەرى ينۆەستيتسيالىق جوبالاردى بىرلەسىپ يگەرۋ مەن وڭىارالىق كووپەراتسيانىڭ كوكجيەگىن كوتەرۋگە ۇلكەن سەپتىگىن تيگىزدى دەۋگە ابدەن بولادى. بۇل رەتتە اقتوبە ايماعىندا رەسپۋبليكانىڭ وزگە وڭىرلەرىمەن ساۋدا-ەكونوميكالىق قارىم-قاتىناستاردى دامىتۋدا ىرگەلى دە ىلكىمدى ىستەر قولعا الىنعانىن ايتا كەتۋدىڭ ءوزى ءبىر مارتەبە. ەندىگى كەزەك استانا مەن اقتوبە وبلىسى اراسىندا ورنىعىپ وتىر. اسىرەسە اتالعان ەكى ءوڭىر اراسىندا بۇعان دەيىن «ەكسپو-2017» كورمەسى اياسىندا ومىرشەڭ جوبالار جۇزەگە اسىرىلعان-دى. ارينە بۇل ءىس ەرتەڭگە ولشەم بولا المايدى. سوندىقتان دا قازىرگى كۇنى اقتوبە ونىمدەرىن استانا نارىعىنا جەتكىزۋدىڭ كەڭ اۋقىمدى باعدارلاماسى بەلگىلەنگەن. بۇعان قاجەتتى باستى فاكتوردىڭ ءبىرى ءتيىستى الەۋەت بولۋىندا, ونىڭ قالىپتاسا بىلۋىندە ەمەس پە. بۇل جونىنەن ءوڭىر مارتەبەسى بيىك تۇر.
ء"بىز ەلوردالىق كاسىپكەرلەرگە «اقتوبە» يندۋستريالدىق ايماعىنان 200 گەكتار جەر تەلىمى مەن تەگىن ينفراقۇرىلىم ۇسىنۋعا ءازىرمىز. ال ءوز كەزەگىندە استانا بىزگە قانداي كومەگىن تيگىزبەك؟ ءبىز استانادان نەنى ۇيرەنىپ, نەنى كوڭىلگە تۇيە الامىز؟ ءسوز جوق, ەلورداداعى اۋماقتاردى اباتتاندىرۋ جوبالارى قىزىقتىرماي قويمايدى. سونداي-اق قوعامدىق كەڭىستىكتى قالىپتاستىرۋ مەن قالا قۇرىلىسى ساياساتىن وڭتايلى جۇرگىزە ءبىلۋ ىسىندە دە ۇيرەنەتىن ۇردىستەر مول. استانانىڭ تۇرعىن ءۇي كوممۋنالدىق-شارۋاشىلىق سالاسىن وركەندەتۋ ىسىندەگى تاجىريبەسىنەن دە وڭىرلەر وزدەرىنە قاجەتتىسىن الا الادى", دەدى اقتوبە وبلىسىنىڭ اكىمى بەردىبەك ساپارباەۆ.
ءوز كەزەگىندە استانا قالاسى اكىمىنىڭ ورىنباسارى ەرمەك امانشاەۆ ەكى جاقتا قالىپتاسا باستاعان ينۆەستيتسيالىق الەۋەت وڭىرارالىق ىنتىماقتاستىقتىڭ ناتيجەلى بولۋىنا جانە باسەكەگە قابىلەتتىلىك دەڭگەيىن كوتەرۋگە وڭ ىقپالىن جاساي الاتىنىن جەتكىزدى. ال «استانا» الەۋمەتتىك-كاسىپكەرلىك كوورپوراتسياسى ۇق اق-نىڭ توراعاسى نۇرلان جاقىپوۆ وڭىرارالىق باعدارلامالىردىڭ ءبىر-بىرىمەن ءوزارا ۇيلەسىمدى بولۋى تۇرعىسىنان وي ءوربىتتى. ءارى ەكونوميكانى تسيفرلاندىرۋدىڭ يننوۆاتسيالىق تۇتقالارىن سارالاي, ەكشەي وتىرىپ, ەنگىزۋ قاجەتتىگىنە توقتالدى. ونىڭ ويىنشا بيزنەستى دامىتۋدا تسيفرلىق ماركەتينگتىڭ اتقاراتىن ءرولى جوعارى.
استانانىڭ اقتوبەدەگى كۇندەرى اياسىندا وتكىزىلگەن بيزنەس-فورۋم كەزىندە اقتوبە قالاسىنداعى «دارۋ» قالپىنا كەلتىرۋ ورتالىعىنىڭ باس ديرەكتورى عالىمجان ەلەۋوۆ مەملەكتەتتىك-جەكەمەنشىك ارىپتەستىگى اياسىنداعى بىرلەسكەن جوبالار ەكى جاققا دا ءتيىمدى ەكەنىن تۇيىندەپ بەردى. اقتوبەدە رەسپۋبليكا وڭىرلەرى اراسىندا بالاماسى جوق مەديتسينالىق كلاستەر قۇرىلعان. بۇل استانا مەن اقتوبە كلينيكالارى اراسىنداعى ءوزارا بايلانىستاردى تەرەڭدەتۋگە اسەر ەتە الادى دەدى ول بۇدان ءارى. سونداي-اق اقتوبە قالاسىنىڭ اكىمى ءىلياس يسپانوۆ وبلىس ورتالىعىنىڭ ستراتەگيالىق دامۋ سيپاتىن جاساقتاۋ ۇستىندە وڭىرارالىق ىنتىماقتاستىق جاڭا سەرپىن بەرە الاتىنىنا ەكپىن ءتۇسىردى.
كۇندەر كەزىندە تاۋار وندىرىۋشىلەر مەن وڭىرلەردى دامىتۋ ورتالىعىنىڭ وكىلدەرى باسقوسۋدىڭ بەرگەنى مول بولعانىن اتاپ كورسەتتى. ءتىپتى, وسى ءبىر كۇندەردە بىرقاتار ماسەلەلەر ۋاقىت وزدىرماي تەز شەشىمىن تابا بىلگەنى دە ءبىر مارتەبە. اتاپ ايتقاندا اقتوبەدەن استاناعا قۇرىلىس ماتەريالدارى مەن ءسۇت ونىمدەرىن جەتكىزۋ تۋرالى ماسەلەلەر شەشىمىن تاپقانى, ال ەلوردالىق كومپانيالار اقتوبەگە «ە-كسك» ەلەكتروندىق جۇيەسى مەن كوشە جارىعىنا قاتىستى اقىلدى باسقارۋ جۇيەسىن ەنگىزۋگە باستاماشىلدىق تانىتقانى وسى پىكىرىمىزدىڭ ايعاعى. جارىقتاندىرۋدىڭ اتالعان ينتەللەكتۋالدىق جۇيەسى ەلەكتر ەنەرگياسىن اسا كوپ مولشەردە ۇنەمدەۋگە سەپتىگىن تيگىزەدى دەيدى استانالىق «LED Colution» جشس ديرەكتورى قانىبەك ايتاقوۆ.
ءتۇيىپ ايتقاندا ەلورداسى استانانىڭ اقتوبە وبلىسىنداعى كۇندەرى وڭىرارالىق كووپەراتسيامەن ىنتىماقتاستىقتى دامىتۋدىڭ جاڭا پاراقتارىن اشىپ بەردى.