وڭتۇستىك قازاقستان وبلىسى شاردارا اۋدانى جاعاجاي ءتۋريزمىن دامىتۋعا قولايلى ايماق ەكەنى كوپتەن بەرى ايتىلىپ كەلەدى.
ايماق قولايلى, ارينە, الايدا الدىمەن ينفراقۇرىلىم مەن قوناقتارعا ساپالى قىزمەت كورسەتۋ دەڭگەيىن جاقسارتۋ قاجەت. بۇل ورايدا, ىلگەرىدە اۋەجاي سالىپ, شاعىن ۇشاقتاردى قاتىناسقا قويۋ جونىندە ۇسىنىس تا ايتىلعان بولاتىن.
بۇگىندە اۋدان اكىمدىگى ناقتى جۇزەگە اسىرىلۋى ءتيىس جۇمىستاردى قولعا الىپتى. وقو وڭىرلىك كوممۋنيكاتسيالار قىزمەتىندە وتكەن بريفينگتە شاردارا اۋدانىنىڭ اكىمى بولاتبەك قىستاۋوۆ الداعى ۋاقىتتا 255 گەكتار اۋماقتا 60 نىساننىڭ قۇرىلىسى جۇرگىزىلەتىنىن مالىمدەدى. اتاپ ايتقاندا, قوناق ۇيلەر, ياحت كلۋب, مەيرامحانالار, اڭشىلار جانە بالىقشىلار ءۇيى, اكۆاپارك سىندى عيماراتتار بوي كوتەرەدى. اۋدان باسشىسىنىڭ ايتۋىنشا, تۋريستىك اۋماققا تارتىلاتىن ينۆەستيتسيا كولەمى - 6,7 ملرد. تەڭگە.
جوباعا قىزىعۋشىلىق تانىتقان ينۆەستورلار دا بار. جوعارىدا اتالعان جوسپارلار ىسكە اسقان جاعدايدا 1000-نان استام جاڭا جۇمىس ورنى اشىلىپ, بىرنەشە نىسان بوي كوتەرەدى. وسىنداي ماقساتتى جۇمىستار ناتيجەسىندە وڭىرگە كەلۋشى تۋريستەردىڭ سانى 45 مىڭنان اسادى دەپ جوسپارلانۋدا.
ەركىن دوسىمباي,
وڭتۇستىك قازاقستان وبلىسى