پاۆلوداردا №25 جالپى ورتا ءبىلىم بەرۋ مەكتەبىندە ايماعىمىزداعى تۇڭعىش «شاكارىمتانۋ» ورتالىعى اشىلدى, دەپ حابارلايدى pavlodarnews.kz.
مەكتەپ ديرەكتورىنىڭ ورىنباسارى مەيرامگۇل الاشباەۆانىڭ ايتۋىنشا, اتالمىش شارا «رۋحاني جاڭعىرۋ» باعدارلاماسى مەن ويشىل, اقىن, جازۋشى, فيلوسوف, تاريحشى, كومپوزيتور شاكارىم قۇدايبەردى ۇلىنىڭ 160 جىلدىعى اياسىندا جۇزەگە اسقان.
«بۇل ورتالىقتا اقىننىڭ ەڭبەكتەرى ورنالاستىرىلدى, سەمەي قالاسىنان ارنايى جۋرنالدار اكەلىندى. مەكتەبىمىزدەگى شاكارىمتانۋ ۇيىرمەسىنىڭ جەتەكشىسى, قازاق ءتىلى مەن ادەبيەتى ءپانىنىڭ مۇعالىمى جاننا تولەۋباەۆا ورتالىقتىڭ جوسپارىن قۇرىپ, سايتىن اشتى. وسى جەردە وقۋشىلار ءوز بىلىمدەرىن شىڭداي الادى. ءبىزدىڭ مەكتەپتە شاكارىم وقۋلارىندا, ءان بايقاۋلارىندا جەڭىسكە جەتكەن وقۋشىلارىمىز بار», - دەيدى مەيرامگۇل الاشباەۆا.
شاكارىم قۇدايبەردى ۇلىنىڭ ۇرپاعى قۇرالاي ۋاقباەۆا ورتالىقتىڭ اشىلۋىنا قولۇشىن سوزعان وبلىس اكىمى بولات باقاۋوۆقا جانە بىرقاتار زيالى قاۋىم وكىلدەرىنە العىسىن ايتتى.
«وتكەن جىلدىڭ 17 اقپان كۇنى وسى شارانى جۇزەگە اسىرۋ جۇمىستارىن قولعا الدىق. ءبىر جىل بويى قاجەتتى قۇجاتتار مەن ماتەريالداردى جينادىق. سەمەيدەگى شاكارىم اتىنداعى مەملەكەتتىك ۋنيۆەرسيتەت پەن جيدەبايداعى اباي مۇراجايىندا بولىپ, دەرەكتەر مەن كىتاپتاردى الىپ كەلدىم. قۇندى دۇنيەنىڭ ءبارى وسكەلەڭ ۇرپاققا مول پايداسىن تيگىزەدى دەگەن ۇمىتتەمىن. ەلىم, جەرىم دەپ وتكەن الاشتىڭ ارىسىنا قاراپ جاس بۋىن بوي تۇزەۋ كەرەك. ورتالىقتى اشۋ ءۇشىن كوپ ادام كومەك قولىن سوزدى. بارلىعىنا شەكسىز ريزامىن», - دەيدى اقىننىڭ شوبەرەسى.
ءىس-شارا بارىسىندا قۇرالاي ۋاقباەۆا «قارت ءولىمى» ءانىن تارتۋ ەتىپ, وبلىستىق ىشكى ساياسات باسقارماسىنىڭ باسشىسى ەرنۇر داۋەنوۆپەن بىرگە ورتالىقتىڭ لەنتاسىن كەستى.