فورۋمنىڭ نەگىزگى وتىرىستارىنىڭ ءبىرى «ەۋروپالىق وداقتىڭ ەۆوليۋتسياسى» دەپ اتالادى ەكەن. وندا وداقتىڭ قازىرگى قيىندىقتارى مەن بولاشاقتاعى دامۋ مۇمكىندىكتەرى تالقىلانادى دەيدى ۇيىمداستىرۋشىلار.
ولاردىڭ ايتۋىنشا, مۇنداي تاقىرىپتى تاڭداۋ قالىپتى جاعداي. سەبەبى, ەۋروپالىق وداق بىرەگەي. ول ەۋروپانىڭ دامۋى مەن تۇراقتىلىعىنىڭ بەلگىسى بولىپ سانالادى. مۇنىمەن قاتار, سوڭعى ۋاقىتتا ەۋروپالىق وداق: بوسقىندار جانە قارىزدىق داعدارىس, BREXIT سياقتى ەكونوميكالىق جانە ساياسي ماسەلەلەرمەن بەتپە-بەت كەلۋدە. سوندىقتان مەديا فورۋمدا وداقتىڭ بولاشاق ۇلگىسى مەن سيپاتى جان-جاقتى قارالادى-مىس.
وتىرىس بارىسىندا, ۇلىبريتانيا سىرتقى ىستەر مينيسترلىگىنىڭ ءباسپاسوز حاتشىسى سايمون ماكدجي, ۆۆس تەلەارناسىنىڭ جاڭالىقتار رەداكتورى گەۆين حيۋيتت, حالىقارالىق ساياسات بويىنشا ساراپشى, Le Figaro گازەتىنىڭ نەگىزىن قالاۋشى فرانتسۋزدىق رەنو جيرار, ەۋروپا كەڭەسىنىڭ «سەۆەر-يۋگ» ورتالىعىنىڭ باسشىسى, يتاليا پارلامەنتىنىڭ مۇشەسى دەبورا بەرگاميني پولشا «سويۋز دەموكراتيچەسكيح لەۆىح سيل» (SLD) پارتياسى توراعاسىنىڭ ورىنباسارى, ەجي ۆەندەرليح, Media & Strategic Communications ەۋروپالىق وداق ماسەلەلەرى بويىنشا مامان ەلي حادجيەۆا ءوزىنىڭ ساراپشىلىق كوزقاراستارىن بىلدىرەدى.
XV ەۋرازيالىق مەديا فورۋم, «ەۆوليۋتسيانىڭ 15 جىلى: الەم قالاي وزگەرەدى جانە ءبىزدى قالاي وزگەرتەدى» تاقىرىبىمەن ۇيىمداستىرىلىپ وتىر. سونداي-اق, بيىلعى جىلى فورۋمنىڭ كەڭەيتىلگەن باعدارلاماسى بويىنشا: «حالىقارالىق قارىم-قاتىناستار ەۆوليۋتسياسى: عالامدىق سالقىنداۋ», «قورشاعان ورتا ەۆوليۋتسياسى: بۇلتارتپاس اپوكاليپسيس نەمەسە جاسىل ەكونوميكاعا كوشۋ», «قوعامداعى سەنىم ەۆوليۋتسياسى: جاڭا زاماندا قوعامدى قالاي باسقارۋعا بولادى؟», «فاكتىدەن فەيك-جاڭالىقتارعا دەيىنگى اقپاراتتىق تەحنولوگيالار ەۆوليۋتسياسى. الاڭداۋ قاجەت پە؟», «مەديا ەۆوليۋتسياسى: بلوگ سالاسىنىڭ دامۋى - قاتەر مە الدە العا جىلجۋ ما؟», «ادامگەرشىلىك پەن قۇندىلىقتار ەۆوليۋتسياسى: جاڭا دۇنيەتانىمدى كىمدەر قالىپتاستىرىپ وتىر؟» – دەگەن اۋقىمدى تاقىرىپتار تالقىلاناتىن بولادى.
ەۋرازيا مەديا فورۋمى 22-24-ءشى مامىر ارالىعىندا العاش رەت الماتى قالاسىنداعى The Ritz-Carlton قوناقۇيىندە وتەدى.
وعان 60 ەلدەن جانە الەمنىڭ تۇكپىر-تۇكپىرىنەن كەلگەن 500 دەلەگات جينالىپ, 50-گە جۋىق حالىقارالىق جانە قازاقستاندىق ساراپشىلار, مەملەكەتتىك قايراتكەرلەر, ساياساتكەرلەر, باق وكىلدەرىنىڭ پىكىرىن تىڭداماقشى.